Joab 11:1-20
11 Den Zoafar, di Nayamatait man, seh:
2 “Yu don seh wahn lata tingz. Yu tink wi wahn stay kwaiyet?
Er yu tink yu rait wen yu di seh wahn lata tingz?*
3 Yu tink peepl wahn stay kwaiyet wen dehn hyaa yu di seh tingz weh noh mek no sens?
Yu noh tink sohnbadi wahn skoal yu wen dehn hyaa yu di mek fon a ada peepl?
4 Bikaaz yu seh, ‘Evriting weh Ah teech da chroo,Ahn Gaad noa dat Ai da wahn inosent man.’
5 Bot if onli Gaad wuda taak tu yuAn oapm ih mowt fi ansa yu,
6 Den hihn wuda tel yu di seekrit dehn weh hihn noa bikaaz hihn waiz.Ahn yu wahn ku laan wahn lata tingz bowt chroo wizdom.
Den yu wahn si dat Gaad noh waahn memba som a yu mistayk dehn.
7 Yu tink yu ku laan di tingz bowt Gaad weh haad fi andastan?Er yu tink yu ku laan evriting bowt di Almaiti?
8 Yu tink yu ku geh wizdom weh haiya dan hevn?
Yu tink yu ku andastan wizdom weh deepa dan di Grayv?*
9 Da wizdom biga dan di ert,An ih waida dan di see.
10 If Gaad ares sohnbadi ahn kehr dehn da koat,Yoo tink enibadi ku stap ahn?
11 Hihn noa wen sohnbadi di lai.
Yu noh tink hihn noatis wen wikid tingz hapm?
12 Bot wahn foolish persn ku onli geh waizWen wahn wail dongki baan wahn hyooman baybi.
13 Yu shuda pripyaa yu haatAhn schrech owt yu han dehn tu Gaad.
14 If yu han di du sohnting rang, put it faar fahn yu,Ahn noh mek notn wikid liv eena yu tent dehn.
15 Den yu ku lif op yu fays ahn noh feel shaym.Yu ku stan op schrang, ahn yu noh haftu frayd.
16 Den yu wahn ferget aala yu prablemz.Yu noh wahn memba dehn jos laik how yu noh memba waata weh goh dong wahn krik.
17 Yu laif wahn bee braita dan wen di son shain da di midl a di day.Eevn di daaknis eena yu laif wahn bee brait laik di lait eena di maanin.
18 Yu wahn bee kanfident bikaaz yu ga hoap.Yu wahn luk rong, ahn yu wahn feel sayf wen yu lidong.
19 Yu wahn lidong, ahn nobadi wahn mek yu feel frayd.Lata peepl wahn du tingz fi yoo soh dat yu ku bee kain tu dehn.
20 Bot di wikid peepl aiy dehn gwehn blain,Ahn dehn wahn ron weh, bot dehn noh wahn ga no way fi haid.Ahn det wahn bee dehn onli hoap.”
Futnoat
^ Er “yu tink sohnbadi weh boasi wahn bee rait.”
^ Er “Sheeyol,” weh da di Grayv. Si di Glasari, “Grayv.”
