Joab 12:1-25
12 Den Joab seh:
2 “Fi shoar unu da peepl weh noa evriting,*Ahn wen unu ded, dehn noh wahn ga nobadi els weh waiz.
3 Bot Ai ga andastandin* tu.
Unu noh beta dan mee.
Hoo noh noa dehndeh tingz weh unu mi taak bowt?
4 Mi fren dehn laaf aata mi,Bikaaz Ah kaal owt tu Gaad an ekspek ahn fi ansa mi.
Peepl laaf aata wahn persn weh raichos ahn weh aalwayz du weh rait.
5 Sohnbadi weh noh ga notn fi wori bowt luk dong pahn dehn wan weh di sofa.
Ahn dehn tink dat bad tingz onli hapm tu dehn wan weh ga shayki fut.
6 Di teef dehn liv eena pees eena dehn tent.Ahn dehn wan weh mek Gaad beks feel sayf.Dehn kehr dehn gaad eena dehn han.
7 Bot pleez aks di animal dehn, ahn dehn wahn teech unu.An aks di berd dehn, ahn dehn wahn tel unu.
8 Er luk pahn* di tingz weh deh pahn di ert, ahn dehn wahn teech unu.
Ahn luk pahn di fish dehn eena di see an unu wahn laan.
9 Hoo fahn monks dehndeh tingz noh noaDat Jehoava mek dehn?
10 Di laif a evri livin ting*Ahn di laif* a evri hyooman deh eena fi hihn han.
11 Di ayz tes owt werdzDi saym way di tong tays food.
12 Yu noh tink oal peepl ga wizdom?Yu noh tink sohnbadi weh liv fi wahn lang taim ga andastandin?
13 Gaad waiz ahn powaful.Hihn ga andastandin an ih wahn mek ih perpos kohn chroo.
14 Nobadi ku bil op bak eniting weh Gaad tayr dong,Ahn nobadi ku oapm eniting weh Gaad don kloaz.
15 Wen Gaad noh mek ih rayn, evriting jrai op.Ahn wen hihn mek ih rayn, di waata flod op di ert.
16 Hihn schrang ahn waiz.Ih ga atariti oava peepl weh sin an oava peepl weh mek adaz sin.
17 Hihn mek di kongsla dehn waak bayrfut,*An ih mek di joj dehn luk foolish.
18 Hihn tek aaf di chayn weh di king dehn put pahn peepl,An ih tai wahn belt rong dehn ways.
19 Hihn mek di prees dehn waak bayrfutAn ih mek dehn wan weh ga atariti fi wahn lang taim looz it.
20 Hihn mek di kongsla dehn weh peepl chros stap taak.An ih tek weh wizdom fahn di oalda man dehn.*
21 Hihn hayt di roola dehn,An ih mek wahn powaful persn week.*
22 Hihn shoa di tingz weh deh eena daaknis,An ih shain lait pahn di ayrya dehn weh deh eena lata daaknis.
23 Hihn mek di nayshan dehn geh schrang soh dat ih ku dischrai dehn.Ih mek di nayshan dehn tek oava ada teritori, soh dat ada nayshanz ku kehr dehn az priznaz.
24 Hihn mek di leeda dehn a di peepl foolish,An ih mek dehn wanda bowt eena di dizert wehpaat no road deh.
25 Dehn wanda bowt eena daaknis wehpaat no lait deh;Hihn mek dehn wanda bowt laik sohnbadi weh jronk.
Futnoat
^ Lit., “unu da di peepl.”
^ Lit., “wahn haat.”
^ Dis ku aalso bee “Er taak tu.”
^ Er “di soal a evribadi weh alaiv.” Si di Glasari, “Soal.”
^ Er “bret.”
^ Er “Hihn tek weh evriting fahn di kongsla dehn.”
^ Er “di eldaz.” Si di Glasari, “Elda.”
^ Lit., “ih loos di belt fahn dehn wan weh powaful.”
