Joab 13:1-28
13 “Yes, mi aiy don si aala dehndeh tingz.Ahn mi ayz don hyaa dehn an Ah andastan dehn.
2 Weh unu noa, Ai noa tu,An unu noh beta dan mee.
3 Az fi mee, Ah wuda prifaa fi taak tu di Almaiti Gaad,Soh Ah waahn goh fronta ahn fi tel ahn mi kays.
4 Bot unu di stayn op mi naym wid laiz;Aala unu da wertles daktaz.
5 If unu wuda onli kip kwaiyet,Den dat wuda shoa dat unu waiz.
6 Pleez lisn tu weh Ah di seh,Ahn pay atenshan tu mi kays.
7 Wai unu yooz Gaad naym fi akyooz mi a tingz weh da noh chroo?Ahn wai unu tel lai eena fi hihn naym?
8 Wai unu di tek fi hihn said?*Wai unu di chrai difen di chroo Gaad kays?
9 If Gaad wuda egzamin unu, unu tink tingz wuda goh gud fi unu?
Unu tink unu ku fool ahn jos laik how unu wuda fool sohnbadi?
10 Fi shoar Gaad wahn karek unuIf unu di priten fi tek fi hihn said wail unu di chreet mi bad.
11 Unu noh tink dat ih gloari wahn mek unu frayd?An unu noh tink dat hihn wahn mek unu frayd far ahn?
12 Unu waiz werdz wertles laik ashiz.Di tingz weh unu don seh fi difen unuself yoosles jos laik wahn sheel weh mek owta klay.
13 Unu kip kwaiyet soh dat Ah ku taak.
Ahn wateva fi hapm tu mi, mek ih hapm tu mi!
14 Wai Ai put miself eena daynja ahn ris mi laif?*
15 If hihn wuda kil mi, Ah wuda stil chros ahn.Ah wuda goh fronta ahn fi proov dat Ai da wahn inosent man.
16 Den hihn wuda sayv mi,Bikaaz wikid peepl* kyaahn goh fronta ahn.
17 Pleez lisn gud tu weh Ah di tel yu,Ahn pleez pay atenshan tu weh Ah di seh.
18 Ah don redi fi kehr mi kays da koat;Ai noa dat Ai rait.
19 Hoo ku proov dat Ai rang?
Ah wuda ded if Ah kip kwaiyet.*
20 Oa Gaad, Ah noh waahn haid miself fahn yu nohmoh,Soh Ah wuda laik fi aks yu fi dehnya too tingz:*
21 Tek yu hevi han fahn aafa mi ahn put it faar fahn mi.Ahn noh mek Ah kantinyu frayd fi yu.
22 Eeda yu kaal mi an Ah wahn ansa yu,Er yu mek Ah taak ahn yoo ansa mi.
23 Wat da di mistayk dehn weh Ah mek ahn wat da mi sin dehn?
Tel mi wat da mi mistayk ahn sin dehn.
24 Wai yu haid yu faysAhn si mi az yu enimi?
25 Ai da laik wahn leef weh di breez di bloa bowt, soh wai yu di chrai fraitn mi?
An Ai da laik jrai graas, soh wai yu di chays afta mi?
26 Yu kip di rait dong di bad tingz weh yu seh Ah du.Ahn yu mek Ah sofa fi di sin dehn weh Ah mi du wen Ah mi yong.
27 Da laik if yu put mi fut dehn bitween sohn hevi blak a wud,*Ahn yu wach eniway wehpaat Ah goh,Ahn yu fala mi futprint dehn.
28 Peepl* ratn weh jos laik how wahn pees a leda ratn weh.Dehn ratn weh laik klaat weh wahn insek* eet op.
Futnoat
^ Er “Wai unu di chreet hihn beta dan mee.”
^ Lit., “put mi oan soal eena mi han.” Si di Glasari, “Soal.”
^ Er “Bikaaz wahn apastayt.” Si di Glasari, “Apastayt.”
^ Dis ku aalso bee “If sombadi kud, den Ai wahn kip kwaiyet ahn ded.”
^ Lit., “Noh du dehnya too tingz tu mee.”
^ Lit., “mi fut dehn eena staks.” Si di Glasari, “Staks.”
^ Lit., “Hihn.” Dis praabli di rifaa tu Joab.
^ Lit., “maat.” Dis kaina insek luk laik wahn botaflai.
