Joab 14:1-22
14 “Di laif weh wahn man liv shaat,An ih ful op a prablemz.
2 Hihn da laik wahn flowaz weh blaasam ahn den ih jrai op.*Hihn da laik wahn shado weh apyaa fi wahn lee wail ahn den disapyaa.
3 Yes, yu pay kloas atenshan tu ahn,An yu kehr ahn* da koat.
4 Yu tink sombadi weh kleen ku kohn fahn sombadi weh noh kleen?
No, af koars nat!
5 Di nomba a dayz weh wahn hyooman liv ga wahn limit,Ahn di nomba a monts weh wahn hyooman liv deh eena yu han.Yu set wahn limit pahn how lang wahn hyooman fi liv.
6 Stap wach pan ahn soh dat ih ku res ahn soh dat ih ku finish ih day,
Jos laik wen sombadi finish dehn werk fi di day.
7 If dehn kot dong wahn chree,
Wee ga hoap dat ih wahn groa agen,An ih branch dehn wahn kantinyu fi groa.
8 If ih root dehn geh oal eena di grongAn ih stomp ded eena di dert,
9 Wen ih geh wet, ih wahn groa bak;An ih wahn groa sohn branch laik wahn nyoo plaant.
10 Bot wen wahn man ded, ih noh ga nohmoh powa.Ahn wen wahn hyooman ded, wehpaat ih goh?
11 Waata disapyaa fahn di see,Ahn wahn riva jrayn owt ahn jrai op.
12 Wen wahn persn ded, ih kyaahn get op.
Az lang az hevn egzis, ih noh wahn get op.Ahn nobadi noh wahn wayk ahn op fahn ih sleep.
13 If onli yu wuda haid mi eena di Grayv*Ahn haid mi til yu noh beks nohmoh.Yu wuda set wahn taim fi mi ahn memba mi.
14 If sombadi ded, yu tink dehn ku liv agen?
Ah wahn wayt fi az lang az Ah haftuTil wen Ah ku bee free agen.
15 Yu wahn kaal mi, an Ah wahn ansa yu.
Yu wahn reeli waahn si mi, bikaaz yu mi mek mi wid yu oan too han.
16 Bot now yu di wach aala di tingz weh Ah du;Yu onli foakos pahn mi sin dehn.
17 Yu put mi sin dehn eena wahn bag ahn yu kloaz it tait,Ahn yu put gloo pahn it fi seel op mi mistayk dehn.
18 Jos laik wen wahn mongtin jrap ahn brok opAhn laik wen wahn rak kom owt fahn ih plays,
19 Ahn jos laik how waata ku brok op stoanAhn wahn schreem a waata ku wash weh di dert fahn di ert,Da rait soh yu tek weh wahn persn hoap.
20 Yu kip di krosh ahn til ih ded.Yu chaynj di way ih luk, ahn yu sen ahn da di grayv.
21 Weda peepl aana ih pikni dehn er nat,Ih noh noa bowt it.
22 Ih onli feel payn wail ih da flesh ahn blod;Ih* onli baal ahn feel sad* wail ih stil alaiv.”
Futnoat
^ Dis ku aalso bee “ahn dehn kot it aaf.”
^ Lit., “mi.”
^ Er “Sheeyol,” weh da di Grayv. Si di Glasari, “Grayv.”
^ Er “Ih soal.” Si di Glasari, “Soal.”
^ Er “Ih onli moarn.” Si di Glasari, “Moarn.”
