Joab 15:1-35
15 Den Elifaz, di Teemanait man, seh:
2 “Yu tink wahn waiz persn wahn ansa wid emti werdz?Er yu tink ih wahn ful op ih beli wid di breez weh kohn fahn di ees?
3 Nobadi wahn benifit if ih yooz yoosles werdz wen ih karek sombadiAn if ih seh tingz weh noh mek sens.
4 Yu mek peepl stap ga lata rispek fi Gaad,Ahn yu mek dehn stap tink bowt Gaad.
5 Yu seh dehndeh tingz bikaaz a di mistayk dehn weh yu mek,*Ahn yu chrik adaz wid weh yu seh.
6 Ai noh seh dat yu gilti, bot da yu oan mowt seh dat;Ahn yu oan lip taak gens yu.
7 Yu tink yoo da-mi di fers persn weh eva baan?Er yu tink yu mi baan bifoa di hil dehn mi egzis?
8 Yoo lisn tu tingz weh Gaad plan op eena seekrit?Er yoo da di onli persn weh waiz?
9 Weh yoo noa weh wee noh noa?
Ahn weh yoo andastan weh wee noh andastan?
10 Wi don oal ahn ga gray hyaa,Eevn yu pa yonga dan wee.
11 Yu noh tink di komfert weh Gaad gi yu inof fi yu?Er ih noh inof wen sombadi tel yu kain werdz?
12 Wai yu mek yu feelinz kanchroal yu?Ahn wai yu beks wen yu luk pahn wi?
13 Yu geh beks wid Gaad,Ahn dat da wai yu seh wikid tingz bowt ahn.
14 Nobadi ku bee kleen fronta Gaad,Ahn nobadi ku bee raichos.
15 Hihn noh ga no fayt eena ih aynjel dehn,*An eevn hevn noh pyoar tu hihn.
16 Soh how ih ku chros sombadi weh disgostin ahn korop?Da persn eega fi du bad tingz, jos laik how sombadi weh tersti bad eega fi jrink waata.
17 Ai ga sohnting fi tel yu, soh lisn tu mi.
Ah wahn tel yu weh Ah don si,
18 Tingz weh sohn waiz man tel mi ahn weh dehn neva haid,Tingz weh fi dehn pa tel dehn.
19 Onli fi dehn pa mi geh di lan,Ahn no schraynja mi deh monks dehn.
20 Wahn wikid persn sofa bad tingz aal ih laif,An ih ga prablemz aal ih laif.
21 Ih ayz hyaa sohn fraitnin naiz.Joorin di taim wen ih ga pees, sohn teef atak ahn.
22 Ih noh bileev dat ih wahn get weh fahn daaknis.Dehn pik ahn fi kil ahn wid wahn soad.
23 Ih goh bowt di luk fi food* an ih aks: ‘Wehpaat Ah ku fain food?’
Ih noa dat di day a daaknis deh kloas.
24 Sadnis ahn payn kip di fraitn ahn;Dehn wahn kip di fraitn ahn jos laik wahn powaful king weh redi fi atak.
25 Ih rayz ih han gens Gaad,An ih chrai stan op gens* di Almaiti.
26 Ih stobant an ih goh gens GaadWid ih sheel weh tik ahn schrang;*
27 Ih fays ful op a fat,An di fat fahn ih hip stik owt.
28 Ih liv eena sohn siti weh wahn geh dischrai,Eena sohn hows wehpaat nobadi livAhn weh wahn en op fi bee sohn pail a stoan.
29 Ih noh wahn geh rich, an ih noh wahn oan lata tingz.Ahn di tingz weh ih oan noh wahn kova di lan.
30 Ih noh wahn get weh fahn daaknis;Ih wahn bee laik wahn chree weh ga sohn tin branch weh faiya bon op.*An if Gaad* jos bloa pan ahn, ih wahn ded.
31 Ih noh fi fool ihself ahn put ih fayt eena wertles tingz,Bikaaz ih noh wahn geh notn fahn dehndeh tingz.
32 Dat wahn hapm tu ahn soon,An ih wahn bee laik wahn chree weh ga sohn branch weh wahn neva groa helti.
33 Ih wahn bee laik wahn vain weh shayk aaf ih grayp dehn weh noh raip yet.
An ih wahn bee laik wahn aliv chree weh geh rid a ih blaasam dehn.
34 Di tingz weh wikid peepl* du noh wahn benifit dehn,Ahn faiya wahn bon op di tent dehn fahn peepl weh aksep wahn braib.
35 Dehn plan wikid tingz eena dehn haat, ahn sayka dat, di tingz weh dehn du hert adaz.
Ahn dehn main aalwayz di plan how dehn ku chrik adaz.”
Futnoat
^ Er “Yu mistayk dehn teech yu mowt weh fi seh.”
^ Lit., “ih hoali wan dehn.”
^ Lit., “bred.”
^ Er “chrai shoa dat ih schranga dan.”
^ Lit., “Wid ih tik nob dehn weh deh fronta ih sheel.”
^ Dis meenz dat ih noh ga no hoap fi geh bak weh ih laas.
^ Lit.. “hihn.”
^ Er “weh di apastayt dehn.” Si di Glasari, “Apastayt.”
