Joab 17:1-16
17 “Ah noh ga nohmoh schrent, an Ah wahn soon ded.Ahn di grayv di wayt fi mi.
2 Peepl weh laik mak adaz deh aal rong mi,Ahn mi aiy haftu si how dehn goh aan laik sohn rebl.
3 Pleez pramis mi dat yu wahn help mi.
Enibadi els deh weh ku help mi?
4 Yoo haid wizdom fahn dehndeh peepl.Dat da wai yoo noh aana dehn.
5 Dehndeh man seh dat dehn wahn shayr weh dehn ga wid dehn frenz,Wail dehn oan pikni kyaahn si gud bikaaz dehn hongri.
6 Gaad mek peepl skaan mi,Ahn sayka dat, dehn spit pahn mi fays.
7 Mi aiy kyaahn si gud, bikaaz Ah ga wahn lata payn.Ahn mi han ahn leg dehn maaga.
8 Wen raichos peepl si dat, dehn geh sopraiz,An inosent peepl geh beks wid wikid peepl.*
9 Raichos peepl wahn kantinyu fi du weh rait,An inosent peepl chrai haad fi du weh rait.
10 Soh aala unu ku kantinyu aagyu,Bikaaz non a unu waiz.
11 Ah noh ga lata taim lef fi liv.Mi planz ahn di tingz weh Ah mi waahn du neva werk owt.
12 Unu kip di ton nait intu day.Den unu seh, ‘Sayka weh ih daak, lait soon kom.’
13 Ah wahn wayt wahn lee bit langa, ahn di Grayv* wahn en op di bee mi hoam.
Rait dehsoh Ah wahn pripyaa wahn plays fi sleep eena daaknis.
14 Ah wahn hala owt ahn tel di grayv, ‘Yoo da mi pa!’
An Ah wahn hala owt ahn tel di werm dehn, ‘Unu da mi ma ahn mi sista!’
15 Soh wehpaat mi hoap deh?
Enibadi tink dat Ai ga hoap?
16 Mi hoap gwehn dong tu di gayt a di Grayv* wehpaat ih wahn geh lak op,An Ai gwehn dong eena di dos lang wid mi hoap.”
Futnoat
^ Er “wid di apastayt dehn.” Si di Glasari, “Apastayt.”
^ Er “Sheeyol,” weh da di Grayv. Si di Glasari, “Grayv.”
^ Er “Sheeyol,” weh da di Grayv. Si di Glasari, “Grayv.”
