Joab 18:1-21
18 Den Bildad, di Shoohait man, seh:
2 “Wen unu* wahn stap taak?
If unu wuda tink bifoa unu taak, den wee kuda taak.
3 Wai unu luk pahn wi laik if wee da sohn animal?Ahn wai unu tink dat wee schupid?*
4 Eevn if yu tayr op yuself* intu peesiz bikaaz yu beks,Yu tink evribadi wahn lef di ert jos fi yoo,Er yu tink di rak dehn wahn moov fahn wehpaat dehn deh jos fi yoo?
5 Yes, di lait a di wikid persn wahn owt,Ahn di flaym a ih faiya noh wahn shain.
6 Ahn di lait eena ih tent wahn geh daak,Ahn di lamp weh di shain pan ahn wahn owt.
7 Ih looz ih schrent fi waak,Ahn non a di tingz weh ih plan wahn ga sokses.
8 Ih fut dehn wahn leed ahn tu wahn net,An ih fut wahn geh nat op eena it.
9 Ih fut wahn geh kech eena wahn chrap,An ih wahn geh kech wid wahn roap.
10 Sohnbadi haid wahn roap pahn di grong fi chrap ahn,Ahn wahn chrap deh rait wehpaat ih waak.
11 Evriway wehpaat ih goh tingz fraitn ahn,Ahn dehn chays afta ahn.
12 Ih geh week, ahn di bad tingz weh hapm tu ahn wahn mek ih jrap dong.*
13 Ih skin ratn weh an ih badi kech wahn dizeez weh wahn kil ahn.
14 Dehn separayt ahn fahn ih tent wehpaat ih sayf,Ahn dehn mek ih maach tu wahn terabl det.*
15 Sohn schraynja* wahn liv eena ih tent;Ahn dehn wahn skyata solfa* pan ih hows.
16 Ahn jos laik wahn chree, ih root dehn wahn jrai opAn ih branch dehn wahn jrai op.
17 Nobadi pahn di ert wahn memba ahn,Ahn peepl pahn di schreet noh wahn noa ih naym.
18 Peepl wahn tek ahn owt fahn di lait ahn put ahn eena di daaknis,Ahn dehn wahn chays ahn weh fahn di ert.
19 Ih noh wahn ga no pikni ner eni disendant monks ih peepl,An ih noh wahn ga nobadi weh servaiv eena di plays weh ih liv.
20 Wen ih day kohn, peepl fahn di Wes wahn deh eena shakAhn peepl fahn di Ees wahn geh fraitn bad.
21 Aala dat wahn hapm eena di tent a sohnbadi weh du bad tingz,Ahn dat da weh wahn hapm tu sohnbadi weh noh noa Gaad.”
Futnoat
^ Ih pasabl dat dis di rifaa tu Joab an ada peepl weh da laik hihn er weh feel sari far ahn.
^ Dis ku aalso bee “dat wi noh kleen.”
^ Er “yu soal.” Si di Glasari, “Soal.”
^ Er “mek ih limp.”
^ Er “tu wahn king weh mek peepl frayd.”
^ Lit., “Sohnting weh da noh fi hihn.”
^ Si di Glasari, “Solfa.”
