Joab 19:1-29
19 Den Joab seh:
2 “Wen unu wahn stap provoak mi*Ahn seh tingz weh hert mi?
3 Unu don skoal* mi ten taimz,An unu noh shaym dat unu chreet mi soh bad.
4 An if Ah mek wahn mistayk fi chroo,Den dat da mai prablem.
5 If unu kip di tink dat unu beta dan mee,An if unu seh dat Ah dizerv fi feel shaym sayka mi prablemz,
6 Den da Gaad da di wan weh neva chreet mi fyaa,Ahn hihn kech mi eena ih net weh ih yooz fi hont.
7 Ah kip di krai owt, ‘Dehn hert mi!’ bot nobadi ansa mi.Ah kip di aks fi help, bot nobadi chreet mi fyaa.
8 Da laik ih blak di road weh Ah waak pan wid wahn stoan waal, an Ah kyaahn paas.
Ih mek di road weh Ah waak pan luk daak daak.
9 Hihn don tek weh mi aana,An ih tek weh di krong weh deh pahn mi hed.
10 Hihn brok mi dong jos laik how sombadi brok dong wahn bildin; hihn kip di atak mi til Ah ded.
An ih root owt mi hoap jos laik how sombadi root owt wahn chree.
11 Hihn geh beks bad wid mi,An ih chreet mi laik if Ai da ih enimi.
12 Ih soalja dehn gyada tugeda fi kyapcha mi,Ahn dehn kyamp aal rong mi tent.
13 Hihn chays weh mi oan faamli fahn mi,Ahn dehn wan weh noa mi ton dehn bak pahn mi.
14 Mi kloas fren dehn* abandan mi,Ahn dehn don ferget bowt mi.
15 Dehn wan weh Ah yoostu invait da mi hows ahn mi slayv gyal dehn chreet mi laik wahn schraynja;
Ai da laik wahn farina tu dehn.
16 Ah kaal mi servant, bot ih noh ansa,An Ah beg ahn fi shoa mi kompashan.
17 Mi bret smel bad tu mi waif,Ahn mi oan breda dehn noh waahn kohn rong mi bikaaz Ah stink.
18 Eevn di lee pikni dehn hayt mi,Ahn wen Ah get op, dehn staat mek fon a mi.
19 Aala mi kloas fren dehn hayt mi,Ahn dehn wan weh Ah lov ton gens mi.
20 Ah geh soh maaga dat yu ku si mi boan dehn,An Ah nayli ded.
21 Unu weh da mi fren, pleez ga mersi pahn mi.Ga mersi pahn mi bikaaz Gaad mek Ah sofa.*
22 Wai unu kip di persikyoot mi jos laik how Gaad di persikyoot mi?
Ahn wai unu kip di atak mi?
23 Ah wish sohnbadi wuda rait dong mi werdz.Ah wish sohnbadi wuda rait dehn dong eena wahn buk!
24 Ah wish sombadi wuda kaav owt mi werdz pahn wahn rak wid wahn aiyan tool
Ahn ful dehn op wid led soh dat dehn ku laas fareva.
25 Ah noa fi shoar dat di wan weh bai mi bak* stil egzis;Hihn wahn kohn layta ahn stan op pahn di ert.*
26 Afta mi skin geh dischrai eena dis way,Wail Ah stil alaiv, Ah wahn si Gaad.
27 Ai wahn si ahn fi miself;Ai wahn si ahn wid mi oan aiy dehn, ahn nobadi els wahn si ahn.
Bot deep eensaida mi, Ah feel laik Ah kyaahn tek it nohmoh!*
28 Unu seh, ‘Eena weh way wi di persikyoot ahn?’
Laik if Ai da di wan fi blaym fi evriting.
29 Da unu fi bee frayd fi di soad,Bikaaz di soad wahn ponish dehn wan weh du bad tingz.An unu shuda noa dat wahn joj egzis.”
Futnoat
^ Er “mi soal.” Si di Glasari, “Soal.”
^ Er “insolt.”
^ Er “Mi faamli dehn.”
^ Lit., “bikaaz Gaad han don toch mi.”
^ Si di Glasari, “Bai bak.”
^ Lit., “dos.”
^ Er “Mi kidni dehn stap werk.”
