Joab 2:1-13
2 Wahn day di aynjel dehn* gaahn fronta Jehoava, ahn Saytan gaahn monks dehn fi goh fronta Jehoava tu.
2 Den Jehoava tel Saytan: “Wehpaat yu kohn fram?” Den Saytan tel Jehoava: “Ah mi-di waak bowt ahn jrif bowt pahn di ert.”
3 Ahn Jehoava tel Saytan: “Yoo di wach mai servant Joab? Dehn noh ga nobadi laik hihn pahn di ert. Hihn aalwayz du weh rait an ih faytful. Ih ga lata rispek fi mee, an ih ton weh fahn eniting weh bad. Eevn doa yu waahn mek Ah kil ahn fi no reezn, hihn stil di stay faytful tu mee.”
4 Bot Saytan tel Jehoava: “Skin fi skin. Wahn persn wahn giv evriting weh ih ga fi sayv ih laif.*
5 Bot now, schrech owt yu han an hert ahn,* an si if ih noh wahn insolt* yu rait fronta yu fays.”
6 Den Jehoava tel Saytan: “Ah wahn mek yu ga kanchroal oava ahn,* bot jos noh kil ahn.”*
7 Afta dat Saytan lef fahn fronta Jehoava, ahn Saytan mek Joab kech sohn terabl bail. Ih mi ga lata bail, fahn di tap a ih hed rait dong tu di batam a ih fut.
8 Joab mi sidong pahn sohn ashiz, an ih tek wahn pees a brok op klay pat fi skrach ihself.
9 Afta dat Joab waif tel ahn: “Yoo stil di stay faytful tu Gaad? Wai yu noh insolt* Gaad ahn ded?”
10 Bot hihn tel ahn: “Yoo di taak laik wan a dehn laydi weh noh ga no sens. If wee kud aksep di gud tingz fahn Gaad, wai wi kyaahn aksep di bad tingz tu?” Eevn doa Joab gaahn chroo aala dehndeh tingz, hihn neva seh notn rang.*
11 Now Joab mi ga chree fren, ahn dehn da-mi Elifaz di Teemanait, Bildad di Shoohait, ahn Zoafar di Nayamatait. Dehn mi hyaa bowt aala di bad tingz weh mi hapm tu Joab, soh dehn lef fahn wehpaat dehn mi-di liv bikaaz dehn mi disaid fi meet op tugeda fi goh komfert Joab ahn shoa dat dehn kay bowt ahn.
12 Wen dehn mi si Joab fahn faar, dehn neva rekonaiz ahn. Soh dehn staat tu baal haad ahn tayr op dehn kloaz, ahn dehn chroa dos eena di ayaa ahn pahn dehn hed.
13 Den dehn mi sidong pahn di grong wid ahn fi sevn dayz ahn sevn naits. Nobadi neva tel ahn notn, bikaaz dehn mi si dat ih mi deh eena lata payn.
Futnoat
^ Lit., “Gaad son dehn.”
^ Er “soal.” Si di Glasari, “Soal.”
^ Lit., “schraik ih boan ahn flesh.”
^ Lit., “kers.” Si di Glasari, “Kers.”
^ Lit., “Hihn deh eena yu han.”
^ Er “kil ih soal.”
^ Lit., “kers.”
^ Lit., “neva sin wid ih lip.”
