Joab 20:1-29
20 Den Zoafar, di Nayamatait man, seh:
2 “Di tingz weh yu jos seh di bada mi, ahn sayka dat, Ah di looz mi payshens.
Soh dat da wai Ah haftu taak.
3 Yu insolt mi wid weh yu seh,Bot Ah wahn ansa yu bikaaz Ah waiz.
4 Yu wel ahn noa dat fahn di taim Gaad mek hyoomanz* pahn di ert,Dis da weh di hapm:
5 Di wikid persn showt owt wid jai fi wahn shaat taim,An ih* onli hapi fi wahn lee wail.
6 Eevn doa ih praid reech way op da hevnAn ih hed reech eena di klowd dehn,
7 Ih wahn disapyaa fareva, jos laik ih oan stool.Dehn wan weh yoostu si ahn wahn aks, ‘Wehpaat ih deh?’
8 Ih wahn disapyaa jos laik wahn jreem, ahn nobadi wahn eva si ahn agen.
An ih wahn disapyaa laik wahn vizhan weh sombadi si da nait.
9 Di wan weh yoostu si ahn noh wahn si ahn agen,An ih hows noh wahn si ahn nohmoh.
10 Ih oan pikni dehn wahn aks poa peepl fi help,An ih wahn gi bak evriting weh ih tek weh fahn adaz.
11 Ih boan dehn schrang ahn helti laik wen ih mi yong,Bot ih schrent wahn lidong wid ahn eena di dos.
12 If bad tingz da laik food weh tays sweet eena ih mowt,An if ih haid it anda ih tong,
13 An if ih injai di tays an ih noh let it goh,Bot ih kip it eena ih mowt,
14 Den da food wahn ton bita eena ih beli,An ih wahn bee laik di paizn* fahn wahn koabra snayk eena ih badi.
15 Ih swala op richiz, bot ih wahn vamit dehn owt,Ahn Gaad wahn tek dehn owta ih beli.
16 Ih wahn sok di paizn fahn wahn koabra snayk,Ahn wahn paiznos snayk wahn bait ahn an kil ahn.
17 Hihn wahn neva injai di milk ahn honi weh floa laik how waata floa.
18 Ih wahn giv op ih tingz weh ih noh wahn yooz.*An ih noh wahn injai di richiz weh ih geh fahn ih bizniz.
19 Ih krosh poa peepl an abandan dehn,An ih tek weh wahn hows weh ih neva bil.
20 Ih noh wahn ga no pees,An ih richiz noh wahn sayv ahn.
21 Dehn noh ga notn els fi mek ih tek weh;Dat da wai ih richiz noh wahn laas fareva.
22 Wen ih geh rich rich, ih wahn ga lata woriz,Ahn lata bad tingz wahn hapm tu ahn.
23 Wail ih di ful op ih beli, Gaad* wahn sen ih grayt anga pan ahn.Hihn wahn mek ih rayn dong pan ahn til ih reech way eena ih gots.
24 Wen ih di ron weh fahn sohn wepan weh mek owta aiyan,Sohn aro fahn wahn kapa boa gwehn eena ahn.
25 Ih haal owt wahn aro fahn ih bak,Wahn shaini wepan fahn ih liva,An ih staat tu geh fraitn.
26 Ih chrezha wahn geh laas eena kompleet daaknis.Wahn faiya weh nobadi di fan wahn bon ahn op.Ahn bad tingz wahn hapm tu enibadi weh stay eena ih tent.
27 Hevn wahn shoa ih mistayk dehn,Ahn di ert gwehn gens ahn.
28 Wahn flod wahn wash weh ih hows,Ahn wen Gaad geh beks, ih wahn mek da big flod hapm.
29 Dat da di riwaad weh Gaad wahn gi wahn wikid persn.Dat da weh Gaad don seh ih wahn inherit.”
Futnoat
^ Er “Adam.”
^ Er “Ahn di apastayt.” Si di Glasari, “Apastayt.”
^ Er “di bail.”
^ Er “swala.”
^ Lit., “hihn.”
