Joab 21:1-34
21 Den Joab seh:
2 “Lisn gud tu weh Ah di seh;Mek dat bee di way how unu komfert mi.
3 Pleez ga payshens wid mi wail Ah di taak,Ahn wen Ah don taak, unu ku mek fon a mi.
4 Unu tink Ah di komplayn tu wahn man?
If dat da-mi di kays, Ah wuda mi don looz mi payshens lang taim.
5 Luk pahn mi an unu wahn shak ahn geh fraitn,Ahn unu wahn put unu han oava unu mowt.
6 Wen Ah tink bowt weh aal Ah gaahn chroo, ih bada mi,Ahn mi hoal badi chrimbl.
7 Wai wikid peepl liv fi wahn lang taim, geh oal, ahn geh rich?*
8 Dehn pikni aalwayz deh wid dehn,Ahn dehn liv lang inof fi si dehn pikni disendant dehn.
9 Dehn feel sayf eena dehn hows, dehn noh frayd fi notn,
Ahn Gaad noh ponish dehn.
10 Dehn bul mayt wid di kow dehn,Ahn dehn kow noh looz non a dehn baybi wail dehn pregnant.
11 Ahn fi dehn pikni ron owtsaid laik wahn flak a sheep,Ahn dehn goh play.
12 Dehn pikni sing wail dehn play di tambareen ahn di haap,Ahn dehn hapi wen dehn hyaa peepl di play di floot.*
13 Dehn liv wahn hapi laif,Ahn dehn noh sofa wen dehn goh dong* eena di Grayv.*
14 Bot dehn tel di chroo Gaad, ‘Lef wi loan!
Wi noh waahn laan bowt yu komanment dehn.
15 Hoo da di Almaiti ahn wai wi shuda serv ahn?
How wee wuda benifit if wi get fi noa ahn?’
16 Bot Ai noa dat dehn noh ga di powa fi mek tingz goh gud fi dehn.
An Ai noh tink laik how wikid peepl tink.
17 Bot humoch taimz di lamp a di wikid peepl owt?
Humoch taimz bad tingz hapm tu dehn?
Humoch taimz Gaad dischrai dehn sayka weh ih geh beks wid dehn?
18 Dehn eva ton laik jrai graas weh di breez bloa weh?Ahn dehn eva ton laik chrash fahn di grayn weh di breez fahn wahn staam bloa weh?
19 Gaad wahn ponish di wikid persn pikni dehn sayka weh dehn pa du.
Bot mek Gaad ponish ahn soh dat ih noa dat ih du sohnting rang.
20 Mek di wikid persn aiy dehn si ih oan dischrokshan,Ahn mek ih jrink fahn di kop weh ful op a di Almaiti anga.
21 Yu tink ih wahn wori bowt weh wahn hapm tu ih disendant dehn if ih ded yong?
22 Yu tink enibadi ku teech Gaad eniting,Wen hihn da di wan weh joj impoatant peepl?
23 Wahn persn ded wail ih helti ahn schrang,Wen ih ga pees an ih noh ga no woriz,
24 Wen ih leg dehn ful op a fat,Ahn wen ih boan dehn schrang.
25 Bot wahn nada persn sofa til ih ded,An ih neva tays gud tingz.
26 Bot dehn wahn lidong tugeda eena di dos,Ahn di werm dehn wahn eet op di too a dehn.
27 Ah noa egzakli weh unu di tink,An Ah noa di bad tingz weh unu di plan fi du tu mi.*
28 Unu aks, ‘Wehpaat di impoatant persn hows deh?Ahn wehpaat di tent deh weh di wikid persn liv eena?’
29 Unu don aks peepl weh di chravl?
Unu noh bileev dehn wen dehn seh
30 Dat wahn wikid persn noh sofa wen sohnting bad hapmAn ih geh sayv wen Gaad beks?
31 Hoo wahn tel ahn dat ih noh di bihayv gud?Ahn hoo wahn ponish ahn fi weh ih du?
32 Wen dehn kehr ahn da di bering grong,Sohnbadi wahn wach oava ih toom.
33 Ih wahn res eena pees wehpaat dehn beri ahn eena di ert.An evribadi els gwehn da di saym plays wehpaat ih deh,*Jos laik weh hapm tu lata peepl weh don gaahn wehpaat ih deh.
34 Soh weh unu di seh noh di komfert mi ataal;
Unu di tel mi loan lai!”
Futnoat
^ Er “powaful.”
^ Er “paip.”
^ Er “dehn noh tek lang fi goh dong.” Dis meenz dat wen da taim fi mek dehn ded, ih hapm kwik ahn dehn noh sofa.
^ Er “Sheeyol,” weh da di Grayv. Si di Glasari, “Grayv.”
^ Dis ku aalso bee “Ah noa dat unu di plan fi ak vailent tuwaadz mi.”
^ Lit., “An ih wahn jreg evribadi els lang wid ahn.”
