Joab 22:1-30
22 Den Elifaz, di Teemanait man, seh:
2 “Yu tink wahn persn yoosful tu Gaad?
Yu tink wahn waiz persn ku help Gaad?
3 Yu tink di Almaiti kay* dat yu raichos,Er yu tink hihn get eniting bikaaz yu stay faytful tu ahn?
4 Yu tink Gaad wahn ponish yu ahn joj yuBikaaz yu ga lata rispek far ahn?
5 Yu noh tink hihn di ponish yu sayka aala di wikid tingz yu mi duAhn bikaaz yu kyaahn stap sin?
6 Ahn yu tek weh tingz* fahn peepl* fi no gud reezn.Ahn yu eevn tek weh poa peepl kloaz ahn yu lef dehn naykid.
7 Yu noh gi peepl weh taiyad waata fi jrink,Ahn yu noh gi peepl weh hongri food fi eet.
8 Powaful peepl tek lata lan,An onli impoatant peepl laik unu liv pan it.
9 Bot yu neva waahn help di wido dehn, soh yu sen dehn weh.Ahn yu hert di pikni dehn weh noh ga no pa.*
10 Dat da wai bad tingz di hapm rong yu,An aal af a sodn daynjaros tingz hapm weh fraitn yu.
11 Dat da wai ih soh daak dat yu kyaahn si,Ahn flod waata kova yu.
12 Gaad deh da di haiyis paat a hevn,
An aala di staar dehn deh hai tu.
13 Bot yoo aks: ‘Weh Gaad reeli noa?
Yu tink hihn ku joj chroo sohn daak daak klowd?
14 Di klowd dehn kova ahn soh dat ih kyaahn siWail ih di waak bowt eena di haiyis paat a hevn.’
15 Yoo wahn waak pahn di saym roadWeh wikid peepl yoostu waak pan?
16 Dehndeh peepl mi ded wail dehn mi stil yong,Ahn dehn geh wash weh jos laik how wahn flod* wash weh wahn bildin.
17 Dehn mi-di tel di chroo Gaad: ‘Lef wi loan!’
Ahn dehn mi aks: ‘Weh di Almaiti ku du tu wi?’
18 Ah wuda neva taak laik dehndeh wikid peepl.
Eevn doa dehn seh dehndeh tingz, Gaad da di wan weh ful op dehn hows wid gud tingz.
19 Raichos peepl wahn hapi wen dehn si wikid peepl geh dischrai.An inosent peepl wahn mek fon a dehn ahn seh:
20 ‘Wi enimi dehn geh dischrai,Ahn fi dehn tingz wahn geh bon op.’
21 Geh fi noa Gaad, ahn yu wahn ga pees;Den lata gud tingz wahn hapm tu yu.
22 Aksep di laa weh kohn fahn ih mowt,Ahn kip ih werd dehn eena yu haat.
23 If yu goh bak tu di Almaiti, den tingz gwehn gud fi yu agen.If yu geh rid a tingz weh noh raichos fahn yu tent,
24 An if yu wuda chroa yu goal pahn di grongAhn chroa di bes goal eena sohn vali weh ga lata rak,
25 Den di Almaiti wahn bee laik preshos goalAhn laik di bes silva tu yu.
26 Ahn yu hapinis wahn kohn fahn di Almaiti,Ahn yu wahn luk tu Gaad wid kanfidens.
27 Yu wahn beg ahn, an hihn wahn hyaa yu;Ahn yu wahn du weh yu vow fi du.
28 Tingz wahn ton owt gud fi yu noh mata weh yu disaid fi du,Ahn lait wahn shain pahn di road weh yu waak pan.
29 Gaad wahn shaym yu wen yu ak prowd,Bot ih wahn sayv hombl peepl.*
30 Hihn wahn sayv inosent peepl;Soh if yu neva du notn bad,* fi shoar Gaad wahn sayv yu.”
Futnoat
^ Er “hapi.”
^ Dehnya tingz da weh wahn persn tek weh fahn peepl fi mek shoar dat dehn pay weh dehn oa.
^ Lit., “yu bradaz.”
^ Er “weh noh ga no ma ahn pa.”
^ Lit., “riva.”
^ Er “sayv peepl weh luk dong.”
^ Lit., “if yu han dehn kleen.”
