Joab 24:1-25
24 “Wai di Almaiti noh set wahn day fi joj peepl?
Ahn wai dehn wan weh noa ahn noh si da day?
2 Peepl moov dehn bongjri maaka eena ada peepl lan.Dehn teef ada peepl sheep ahn kehr dehn da fi dehn paascha.
3 Dehn tek weh di dongki dehn fahn di pikni dehn weh noh ga no pa,Ahn dehn tek weh di wido bul fi mek shoar dat shee pay bak wahn loan.
4 Dehn foas poa peepl fi get aafa di road,Ahn dehn wan weh kyaahn help dehnself haftu haid fahn dehn.
5 Poa peepl saach fi food laik sohn wail dongki eena di wildanes,*Ahn dehn luk fi food eena di dezert fi dehn pikni dehn.
6 Dehn haftu gyada op food eena sombadi els feel*Ahn pik op di grayp dehn weh lefoava fahn di wikid peepl aachad dehn.
7 Wen dehn goh sleep da nait,Dehn noh ga notn fi kova dehnself wen ih koal.
8 Wen dehn deh tap a di mongtin, di rayn soak dehn op.Dehn stay kloas tu di rak dehn bikaaz dehn noh ga no way fi shelta.
9 Wikid peepl tek weh di lee pikni weh noh ga no pa fahn ih ma bres.Ahn dehn tek weh poa peepl kloaz bikaaz dehn oa dehn.
10 Soh wikid peepl foas dehn fi waak wid lee bit a kloaz,Ahn dehn hongri wail dehn kehr sohn bondl a grayn.
11 Joorin di day wen ih hat, poa peepl werk haad* monks di stoan waal dehn pahn di hilsaid dehn.
Ahn dehn mash op di grayp dehn soh dehn ku geh wain, bot dehn stil tersti.
12 Peepl weh di ded kip di baal eena di siti;Dehn di ded sayka weh dehn geh hert bad, ahn dehn di baal owt fi help.
Bot Gaad noh si dat az sohnting rang.
13 Wikid peepl hayt lait,Dehn rijek ih wayz,Ahn dehn noh fala ih road dehn.
14 Di merdara get op bifoa di son kom op.Ih kil poa peepl ahn dehn wan weh need help,Ahn da nait ih goh teef.
15 Wahn hozban weh noh faytful tu ih waif* wayt fi mek ih geh daak,An ih seh, ‘Nobadi noh wahn si mi!’
An ih kova ih fays.
16 Dehndeh wikid peepl brok eena peepl hows da nait;Dehn lak op dehnself eena dehn hows joorin di day.
Ahn dehn da schraynjaz tu di lait.
17 Dehn frayd fi di maanin jos laik how ada peepl frayd fi di nait.Bot dehn yoostu di tingz weh fraitn peepl eena di daaknis.
18 Bot di riva kehr dehn weh faas.
Sohnbadi wahn kers* dehn pees a lan,
Ahn dehn noh gwehn bak da dehn grayp aachad.
19 Jos laik how jrai weda ahn heet mek snoa disapyaa,Da rait soh di Grayv* mek peepl weh sin disapyaa!
20 Dehn ma* wahn ferget dehn, ahn di werm dehn wahn eet dehn op.
Nobadi wahn memba dehn nohmoh,
Ahn wikid peepl wahn geh chap dong jos laik wahn chree.
21 Dehn tek advantij a di laydi dehn weh kyaahn ga pikni,Ahn dehn chreet di wido dehn bad.
22 Gaad* wahn yooz ih schrent fi dischrai powaful peepl.Dehn wahn geh wahn hai pozishan, bot eevn soh dehn noh shoar if dehn wahn liv.
23 Gaad* alow wikid peepl fi feel sayf ahn kanfident,Bot ih aiy dehn si evriting weh dehn du.
24 Dehn prayz dehnself fi wahn lee wail, den dehn noh egzis nohmoh.
Dehn da laik sohn weet plaant weh peepl kot dong ahn gyada op.Ahn dehn bring dehn dong, ahn dehn ded jos laik evribadi els.
25 Hoo ku proov dat Ai laiyad?Er hoo ku proov dat weh Ah seh rang?”
Futnoat
^ Si di Glasari, “Wildanes.”
^ Dis ku aalso bee “gyada op jrai graas eena wahn feel.”
^ Dis ku aalso bee “Dehn mash op aliv fi mek ail.”
^ Dis ku rifaa tu wahn man weh ga sekshwal rilayshanz wid wahn wuman weh marid tu wahn nada man.
^ Si di Glasari, “Kers.”
^ Er “Sheeyol,” weh da di Grayv. Si di Glasari, “Grayv.”
^ Lit., “Di woom.”
^ Lit., “Hihn.”
^ Lit., “Hihn.”
