Joab 26:1-14
26 Den Joab seh:
2 “Oa ahn da soh yoo seh dat yu help sohnbadi weh noh ga no powa?
Ahn yoo reeli tink yu mi sayv sohnbadi weh noh ga no schrent?
3 Yoo reeli tink dat yu gi gud advais tu sohnbadi weh noh waiz?
Ahn da soh yoo seh dat yu mi wilin fi shayr yu wizdom wid adaz?
4 Da hoo yoo di chrai taak tu?Ahn da hoo tel yu fi seh dehndeh kaina tingz?
5 Peepl weh ded noh ga no powa, ahn dehn chrimbl fronta Gaad,Ahn dehn eevn loawa dan di see ahn di animal dehn weh liv eena it.
6 Notn deh eena di Grayv* weh ku haid fahn Gaad,*Ahn hihn ku eevn si wahn ded badi deh.
7 Hihn schrech owt di skai oava wahn emti spays,An ih mek di ert heng pahn notn.
8 Hihn kalek op waata, an ih faam sohn klowd owta dehn.Ahn di klowd dehn noh bos eevn doa dehn hevi.
9 Hihn spred owt wahn klowd oava ih chroanSoh dat nobadi ku see’t.
10 Hihn put wahn bongjri lain* bitween di skai ahn di see,An ih put wan bitween lait ahn daaknis.
11 Di poas dehn da hevn shayk,Ahn dehn geh fraitn wen Gaad rayz ih vais.
12 Hihn ster op di see wid ih powa,Ahn bikaaz ih ga andastandin, hihn brok op di see monsta* intu peesiz.
13 Hihn yooz di breez fi klayr op di skai;Ih kil di snayk weh moov faas.
14 Dehndeh da jos som a di tingz weh hihn don du,Ahn di tingz weh wi hyaa bowt ahn da onli laik wahn lee wispa.
Soh hoo ku andastan ih lowd tonda?”
Futnoat
^ Er “Sheeyol,” weh da di Grayv. Si di Glasari, “Grayv.”
^ Lit., “ahn.”
^ Lit., “wahn serkl.”
^ Lit., “Rayhab.”
