Joab 28:1-28
28 “Dehn ga wahn plays wehpaat dehn dig fi silvaAhn wahn plays wehpaat dehn dig fi goal weh dehn wahn kleen.
2 Dehn dig owt aiyan fahn di grong,ahn dehn melt sohn rak fi geh kapa.
3 Peepl lait op wahn plays weh daak daak,An eena da daaknis dehn dig til dehn fain dehndeh metal.*
4 Dehn dig sohn tonil faar fahn wehpaat peepl liv, eena sohn plays weh nobadi memba, faar fahn wehpaat peepl waak.Sohn man yooz wahn roap fi goh dong eena di grong,
Ahn dehn hoal aan tu da roap wail dehn di werk.
5 Food groa pahn tap a di ert,Bot andaneeta di ert, da laik if faiya di damij it.*
6 Da rait deh dehn ku fain di safaiya stoan dehn,Ahn dehn ga goal eena di dos.
7 Di eegl noh noa di way fi get deh,Ahn di aiy a wahn blak kait* noh see’t.
8 Non a di daynjaros wail animal dehn waak pan it,Ahn wahn yong laiyan noh hont deh.
9 Peepl brok op di haad rak dehn,Ahn wen dehn dig da di batam a di mongtin dehn da laik if dehn ton oava di mongtin dehn.
10 Dehn dig sohn kanal chroo di rak dehn,Ahn dehn fain aal kaina preshos stoan.
11 Dehn stap op di waata weh kohn fahn di riva dehn,Ahn dehn bring owt di preshos tingz weh dehn fain.
12 Bot wehpaat peepl ku fain wizdom?Ahn wehpaat andastandin kohn fram?
13 Peepl noh noa humoch wizdom wert,Ahn nobadi ku fain it eniway pahn di ert.
14 Di deep waata seh, ‘Ih noh deh eena mi!’
Ahn di see seh, ‘Ih noh deh wid mi!’
15 Nobadi ku bai it wid pyoar goal,Ahn nobadi ku giv eni amonk a silva far it.
16 Nobadi ku bai it wid di bes goal,Ahn nobadi ku bai it wid preshos oniks ahn safaiya needa.
17 Wizdom faar moa preshos dan goal ahn glaas,Ahn nobadi ku gi wahn bowl weh mek owta di bes* goal far it.
18 Ih way moa preshos dan koaral ahn kristal,Bikaaz wahn bag weh ful op a wizdom wert moa dan wahn bag weh ful a perl.
19 Ih way moa preshos dan di toapaz weh kohn fahn Kush,Ahn nobadi ku eevn bai it wid pyoar goal.
20 Bot wehpaat wizdom kohn fram?Ahn wehpaat andastandin kohn fram?
21 Dehn haid it fahn di aiy dehn a evri livin ting,Ahn dehn haid it fahn di berd dehn weh flai eena di skai.
22 Dischrokshan ahn det seh,‘Wi ayz onli hyaa weh dehn seh bowt it.’
23 Onli Gaad noa how fi geh wizdom,An onli hihn noa weh ih liv.
24 Gaad si tingz weh eevn deh da di faardis paat a di ert,An ih si evriting weh deh anda hevn.
25 Wen Gaad gi di breez ih powa*An ih divaid op di waata dehn,
26 Ahn wen ih mek wahn laa fi di raynAn ih disaid wich way di tonda ahn di hevi rayn fi goh,
27 Ih mi si wizdom eena di tingz weh ih du an ih mi eksplayn it;Hihn mi proov dat ih wizdom egzis an ih mi tes it.
28 Ahn Gaad tel peepl:
‘Wizdom da wen unu ga lata rispek* fi Jehoava,An andastandin da wen unu ton weh fahn du weh bad.’”
Futnoat
^ Lit., “stoan.”
^ Dis praabli di rifaa tu wen peepl dig anda grong fi fain preshos stoan ahn metal.
^ Di kait da wahn kaina berd weh luk laik di eegl.
^ Er “pyoar.”
^ Lit., “wayt.”
^ Lit., “fyaa.”
