Joab 29:1-25
29 Joab kantinyu ih speech,* an ih seh:
2 “If onli Ah mi liv di way Ah yoostu liv bifoa,Joorin di taim wen Gaad mi protek mi,
3 Wen ih mi gaid mi laik if ih mi shain ih lamp pahn miAz Ah mi-di waak chroo daaknis,
4 Wen Ah mi yonga ahn schranga,Ahn wen Ah mi ga wahn kloas rilayshanship wid Gaad,
5 Wen di Almaiti mi stil deh wid mi,Ahn wen Ah mi ga mi pikni dehn,*
6 Wen Ah mi geh lata milk fahn mi animal dehn,Ahn wen Ah mi geh lata aliv ail.
7 Wen Ah yoostu goh da di siti gayt,Ah wuda sidong wehpaat di peepl fahn di siti gyada tugeda.
8 Wen di yong man dehn wuda si mi, dehn wuda moov ahn gi mi spays fi paas,*
An eevn di oal man dehn wuda stan op bikaaz dehn rispek mi.
9 Di prins dehn yoostu kip kwaiyet;Dehn wuda put dehn han oava dehn mowt.
10 Di impoatant man dehn mi stay kwaiyet;Dehn tong mi geh hevi eena dehn mowt.
11 Enibadi weh hyaa bowt mi wuda taak gud bowt mi,An enibadi weh si mi wuda prayz mi.
12 Ah wuda sayv poa peepl weh krai fi help lang wid di pikni dehn weh noh ga no pa
An enibadi els weh neva ga nobadi fi help dehn.
13 Peepl weh mi wahn soon ded mi bles mi,An Ah mek di wido dehn haat hapi.
14 Ah put aan raichosnis jos laik how Ah put aan mi kloaz,An Ah put aan jostis jos laik how Ah put aan mi roab* ahn mi hedrap.
15 Ai da-mi laik di aiy dehn fi blain peepl,An Ai da-mi laik di fut dehn fi dehn wan weh kyaahn waak.
16 Ai da-mi laik wahn pa tu poa peepl,An Ah wuda help peepl weh Ah noh noa geh jostis.
17 Ah wuda tek weh di powa fahn sohnbadi weh du bad tingz, jos laik if Ah wuda brok wahn wail animal jaa;
An Ah wuda sayv ih viktim dehn.
18 Ah yoostu seh, ‘Ah wahn ded eena mi oan hows,*An Ah wahn liv fi wahn lata dayz, jos laik how dehn ga lata san pahn di seesaid.
19 Mi root dehn wahn spred owt eena di waata,Ahn joo wahn stay pahn mi branch dehn aal nait.
20 Peepl wahn aalwayz rispek mi,An Ah wahn kip di shoot mi aro dehn wid di boa weh deh eena mi han.’
21 Peepl kyaahn wayt fi hyaa weh Ah ga fi seh.Dehn kip kwaiyet wail dehn wayt fi hyaa mi advais.
22 Afta Ah finish taak, dehn neva ga notn fi seh,Ahn mi werdz wuda bee sohnting nais fi mek dehn ayz hyaa.*
23 Dehn mi wayt fi mi jos laik how dehn wayt fi di rayn,Ahn dehn da-mi laik peepl weh kyaahn wayt fi mek ih rayn eena spring taim.
24 Wen Ah mi smail wid dehn, dehn kudn bileev dat Ah mi hapi wid dehn,
Ahn dehn wuda fain komfert wen dehn si mi hapi fays.*
25 Ai da-mi laik dehn leeda weh gi dehn dairekshan.Ah mi liv laik wahn king monks ih soalja dehn,An Ai da-mi laik sohnbadi weh komfert peepl weh moarn.
Futnoat
^ Lit., “praverb.”
^ Er “Ahn wen mi servant dehn mi deh rong mi.”
^ Lit., “haid dehnself.”
^ Er “mi koat weh noh ga no sleev.”
^ Lit., “eena mi nes.”
^ Er “Ahn mi werdz wuda jrip pahn dehn ayz.”
^ Dis ku aalso bee “Dehn neva mek mi hapi fays luk sad.”
