Joab 3:1-26
3 Afta dat Joab staat tu taak an ih mi kers di day wen ih baan.*
2 Joab seh:
3 “Kers di day wen Ah mi baan,Ahn kers di nait wen sombadi mi seh: ‘Wahn baybi bwai baan.’
4 Mek da day bee loan daaknis.
Mek Gaad ferget da day;Noh mek no lait shain pan it.
5 Mek da day geh pich blak ahn mek di daaknis tek it oava.
Mek wahn daak klowd kom oava it.
Mek ih geh fraitn sayka di tingz weh mek wahn day geh daak.
6 Mek da nait geh pich blak.Mek ih noh rijais monks di dayz weh deh eena wahn yaa,Ahn mek da day noh bee paat a eni mont.
7 Yes, ih wuda mi bee beta if nobadi mi baan pahn da nait.Mek nobadi krai owt wid jai pahn da nait.
8 Mek dehn wan weh kers di day put wahn kers pahn da nait.Dehn da peepl weh ku wayk op wahn krakadail.*
9 Ah wish di staarz weh mi kom owt di neks maanin wuda stap shain dehn lait;Mek da nait wayt fi wahn maanin weh ih wahn neva si.Noh mek ih si di lait fahn di son weh di kom op,
10 Bikaaz ih neva stap mi ma fahn baan mi,Ahn now Ah di goh chroo prablemz.
11 Wai Ah neva ded wen Ah mi baan?
Wai Ai neva ded wen Ah mi kom owta mi ma woom?
12 Wai mi ma put mi pahn fi shee lapAhn bresfeed mi?
13 If Ah mi ded da taim, Ah mi wahn di lidong eena pees;Ai mi wahn di sleep ahn di res
14 Lang wid di king dehn a di ert ahn dehn kongslaWeh bil sohn plays fi dehnself weh deh eena rooinz rait now,*
15 Er lang wid di prins dehn weh mi ga goal,Ahn weh mi ga hows weh ful op a silva.
16 Wai Ai da neva laik wahn baybi weh wahn ma looz,Wai Ah neva ded eevn bifoa Ah mi baan?
17 Eena di grayv eevn di wikid peepl noh ga woriz;Ahn rait deh dehn wan weh taiyad di res.
18 Rait deh di prizna dehn di res.Dehn noh hyaa di vais fahn di wan weh di foas dehn fi werk.
19 Da rait deh di impoatant ahn kaman peepl deh,Ahn di maasta noh ga no kanchroal oava ih slayv nohmoh.
20 Wai Gaad gi lait tu sombadi weh di sofa?Ahn wai ih gi laif tu dehn wan weh di ponish?
21 Wai dehn waahn ded, bot ih noh hapm?
Dehn dig far it moa dan how dehn dig fi chrezha.
22 Dehn di rijais wahn lat,Ahn dehn hapi wen dehn fain di grayv.
23 Wai Gaad gi lait tu wahn persn weh kyaahn fain ih wayWen hihn ihself put wahn fens rong ahn?
24 Bikaaz Ah soh sad, Ah kyaahn eet mi food.An Ah kip di baal haad laik how wahn riva kip di floa.
25 Weh Ah mi frayd fa don hapm tu mee,Ahn weh mek Ah feel frayd don hapm tu mi.
26 Ah noh ga no pees, Ah noh feel kaam, an Ah noh ga no res,An Ah stil di fays prablemz.”
Futnoat
^ Lit., “kers ih day.” Si di Glasari, “Kers.”
^ Eena Heebroo dis werd da Levaiyatan.
^ Dis ku aalso bee “Weh bil sohn plays wehpaat nobadi liv.”
