Joab 31:1-40
31 “Ah mek wahn kovenant* wid mi aiy dehn.
Soh how Ah kuda eva luk pahn wahn yong laydi eena wahn rang way?
2 If Ah wuda du dat, how Gaad weh deh da hevn wuda chreet mi?Ahn weh Ah wuda geh fahn di Almaiti?
3 Yu noh tink sohnting bad wahn hapm tu wahn persn weh du bad tingzAhn tu sombadi weh du tingz weh hert adaz?
4 Yu noh tink hihn si di way Ah liv?Ahn yu noh tink hihn pay atenshan tu evriting weh Ah du?
5 Ai eva tel lai?*
Ai eva chrik sombadi?
6 Mek Gaad way mi pahn wahn skayl weh gi di karek wayt.Den hihn wahn si dat Ah faytful tu ahn.
7 If Ah eva schray weh fahn di rait wayEr if mi haat eva gaan afta weh mi aiy dehn siEr if mi han dehn eva geh doti,
8 Den mek sombadi els eet weh Ah plaant,Ahn mek dehn root owt weh Ah plaant.*
9 If wahn laydi temp mi haat,An Ah wayt da mi nayba doa,
10 Den mek mai waif grain weet fi wahn neks man,Ahn mek sohn ada man ga sekshwal rilayshanz wid shee.*
11 If Ah wuda du dat, den dat wuda bee sohnting disgostin weh bring shaym,Wahn sin weh di joj dehn wuda ponish mi fa.
12 Dat wuda bee laik wahn faiya weh dischrai evriting,An ih wuda bon op evriting weh Ah oan.
13 If Ah neva chreet mi mayl er feemayl servant dehn fyaaWen dehn mi komplayn gens mi,*
14 Den weh Ah ku du wen Gaad joj mi?
Ahn weh Ah ku tel ahn wen ih kweschan mi?
15 Yu noh tink di wan weh mek mi eena mi ma woom da di saym wan weh mek dehn tu?
Ahn yu noh tink hihn da di saym wan weh mek wi bifoa wi baan?*
16 If Ah neva waahn gi poa peepl weh dehn waahntEr if Ah mek wahn wido looz hoap;
17 If Ah mi eet mi shayr a food bai miselfAn Ah neva shayr it wid di pikni dehn weh noh ga no ma ner pa,
18 Bikaaz fahn wen Ah mi yong, dehndeh pikni si mi laik dehn pa,Ahn fan Ah smaal Ah di help di wido dehn.
19 If Ah mi si sombadi di ded bikaaz ih koal an ih noh di wayr inof kloazEr if Ah si wahn poa persn weh noh ga notn fi kova ihself wid;
20 If ih neva tank mi wen Ah giv ahn mi wul fi kip ihself waam,
21 An if Ah mi eva chretn wahn pikni weh noh ga no ma ner paWen ih mi need mi help da di siti gayt,
22 Den mek mi han jrap aafa mi shoaldaAhn mek ih brok da mi elbo.
23 Ah mi frayd fi mek Gaad du bad tingz tu mi,An Ah kudn stan op fronta ih gloari.
24 If Ah chros eena goalEr if Ah tel pyoar goal, ‘Ah chros yu!’
25 If Ah mi prowd bikaaz Ah mi richAhn bikaaz a di lata tingz weh Ah mi get;
26 If Ah mi si di son* shainEr if Ah mi si how byootiful di moon luk wen ih di moov eena di skai;
27 An if mi haat chrik mi,An if mi mowt kis mi han fi shoa dat Ah wership dehndeh tingz,
28 Den dat wuda bee wahn sin weh di joj dehn ponish mi fa,Bikaaz Ai wuda di ton mi bak pahn di chroo Gaad weh deh da hevn.
29 Ai eva geh hapi bikaaz mi enimi geh dischrai?Er Ai eva geh hapi wen sohnting bad hapm tu ahn?
30 Ah neva wish dat mi enimi wuda ded,An Ah neva komit wahn sin laik dat bifoa.
31 Di peepl weh liv da Joab hows seh,‘Aala di peepl weh kohn da Joab hows ku eet food* til dehn ful.’
32 Nobadi weh da wahn schraynja* mi eva haftu spen di nait owtsaid.Ai mi aalwayz welkom peepl weh di chravl fi kohn stay da mai hows.
33 Ai eva chrai haid mi sin dehn laik ada peepl,Laik if Ah di haid dehn eena di pakit a mi kloaz?
34 Ai eva geh soh frayd a weh peepl wahn seh,Er soh frayd dat sohn ada famili wahn hayt miDat Ah kip kwaiyet ahn frayd fi eevn goh owtsaid?
35 If onli sombadi wuda lisn tu mi!
Ah wuda rait dong mi naym fi shoa dat Ah di tel di chroot.
Mek di Almaiti ansa mi!
If onli di wan weh di akyooz mi wuda rait dong di tingz weh ih di akyooz mi fa.
36 Ai wuda kehr it pahn mi shoalda,An Ah wuda wayr it pahn mi hed laik wahn krong.
37 Ai wuda tel Gaad bowt evri step weh Ah tek;Ah wuda bee kanfident laik wahn prins wen Ah goh fronta ahn.
38 If mi oan feel wuda krai owt gens mi,An if di lain dehn eena di feel weh Ah plow baal tugeda,
39 If Ai eva eet di food weh groa pahn wahn lan widowt pay far it,Er if Ai mek di peepl weh oan* di lan groan bikaaz Ah chrai tek weh dehn lan fahn dehn,
40 Den mek sohn prikl groa eena mi feel insteda weetAhn mek sohn weed weh smel bad groa eena mi feel insteda baarli.”
Da rait ya Joab stap taak.
Futnoat
^ Si di Glasari, “Kovenant.”
^ Dis ku aalso bee “Ai eva kip kompni wid peepl weh tel lai.”
^ Er “Mek dehn dischrai mi disendant dehn.”
^ Lit., “mek sohn ada man neel dong oava shee.”
^ Er “Wen dehn mi ga wahn leegal kays gens mi.”
^ Lit., “eena di woom.”
^ Lit., “lait.”
^ Lit., “meet.”
^ Er “wahn farina weh liv monks di peepl.”
^ Er “di oana dehn soal.” Si di Glasari, “Soal.”
