Joab 33:1-33
33 “Bot now, Joab, pleez lisn tu weh Ah ga fi seh.Lisn tu evriting weh Ah wahn tel yu.
2 Pleez lisn tu mi! Ah kyaahn kip mi mowt kloaz.Mi mowt* haftu seh sohnting.
3 Mi werdz shoa dat Ah ga wahn aanis haat.Ahn mi mowt noh wahn tel lai wen Ah tel yu weh Ah noa.
4 Gaad yooz ih powa fi mek mee,Ahn di Almaiti yooz ih bret fi gi mi laif.
5 Ansa mi if yu kud.Bee redi fi tel mi weh yu ga fi seh.
6 Di chroo Gaad si mi di saym way ih si yu.Hihn mek mi owta klay tu.
7 Soh yu noh fi feel frayd fi mi,Ahn yu noh fi feel laik Ah di presha yu tu moch wid weh Ah di tel yu.
8 Bot dis da weh Ah hyaa yu di seh,Yes, dis da weh yu mi kip di seh:
9 ‘Ai pyoar, Ai noh sin.Ai kleen, Ai noh mek no mistayk.
10 Bot Gaad fain reezn fi goh gens mi.Ih si mi laik ih enimi.
11 Hihn put mi fut dehn bitween sohn hevi blak a wud,*Ahn hihn wach eniway wehpaat Ah goh.’
12 Bot weh yu seh noh rait, soh dat da wai Ah di tel yu dis:
Nobadi da laik Gaad. Hihn waiza dan hyoomanz.
13 Wai yu komplayn gens ahn?
Yu tink da bikaaz ih neva ansa yu?
14 Gaad taak oava ahn oava agen,Bot nobadi lisn tu ahn.
15 Hihn du dat eena wahn jreem, wahn vizhan weh hapm da nait,Wen peepl deh eena dehn bed ahn dehn deh eena wahn deep sleep.
16 Hihn taak eena dehn ayz ahn teech dehn.
17 Soh ih ku mek sombadi kip weh fahn du bad tingz,An ih ku protek dehn fahn bee prowd.
18 Gaad noh mek dehn ded,*An ih noh mek nobadi kil dehn wid wahn soad.
19 Sombadi ku laan sohnting wen dehn deh eena payn di lidong eena bed
Ahn wen dehn boanz di hert aal di taim.
20 Ahn bikaaz a dat, bred en op di bee sohnting disgostin fi dehn,Ahn dehn* noh eevn waahn eet gud food.
21 Dehn geh soh maaga dat dehn boanz stik owt.
22 Dehn wahn soon ded,Ahn peepl wahn soon chrai kil dehn.
23 If owta wahn towzn mesinja,*Wan a dehn difen dehn ahn tel dehn weh rait,
24 Den Gaad shoa dehn kompashan an ih seh,‘Noh mek dehn goh dong eena di grayv!
Ah fain wahn ransom!*
25 Mek dehn badi geh moa helti dan wen dehn mi yong.Ahn mek dehn geh bak dehn schrent weh dehn mi gat wen dehn mi yong.’
26 Dehn wahn pray tu Gaad, ahn hihn wahn pleez wid dehn.Ahn wen dehn si Gaad fays, dehn wahn hala owt bikaaz dehn hapi.Ahn hihn wahn kansida dehn fi bee raichos peepl agen.
27 Dehn wahn tel* peepl:‘Ah sin an Ah neva du weh rait,Bot Ah neva geh ponish.*
28 Ah mi gwehn dong eena di grayv* bot Gaad sayv mi,*An Ah wahn kantinyu si* di lait.’
29 Yes, Gaad du aala dehndeh tingz.Ih du dehn oava ahn oava agen fi peepl,
30 Soh dat ih ku sayv dehn fahn di grayvAhn dehn ku injai laif.
31 Joab, pleez pay atenshan! Lisn tu mi!
Kip kwaiyet, an Ah wahn kantinyu taak.
32 If yu ga sohnting fi seh, ansa mi.
Tel mi, bikaaz Ah waahn proov dat yu inosent.
33 If yu noh ga notn fi seh, yu shuda lisn tu mi.Pleez kip kwaiyet, an Ah wahn teech yu how fi bee waiz.”
Futnoat
^ Lit., “tong.”
^ Lit., “mi fut dehn eena staks.” Si di Glasari, “Staks.”
^ Er “noh mek dehn goh dong eena di grayv.”
^ Er “dehn soal.” Si di Glasari, “Soal.”
^ Er “aynjel.”
^ Si di Glasari, “Ransom.”
^ Lit., “sing tu.”
^ Dis ku aalso bee “An ih neva benifit mee.”
^ Lit., “pit.”
^ Lit., “bai mi bak.”
^ Lit., “Ahn mi laif wahn si.”
