Joab 36:1-33
36 Den Ilaihoo seh:
2 “Bee payshent wid mi wahn lee bit langa wail Ah di taak,Bikaaz Ah di taak fi Gaad.
3 Ah wahn tel yu evri singl ting weh Ah noa,An Ah wahn tel adaz dat di wan weh mek mi da wahn raichos Gaad.
4 Soh yu ku bee shoar dat Ah noh tel lai,Bikaaz weh Ah seh kohn fahn di wan weh noa evriting.
5 Yes, Gaad powaful an ih noh rijek nobadi.Dehn noh ga notn weh hihn kyaahn andastan.
6 Hihn noh wahn protek wikid peepl,Bot insted, hihn mek dehn wan weh di sofa geh jostis.
7 Hihn kip di wach pahn raichos peepl, an ih mek dehn rool wid sohn king,*
Ahn dehn wahn aalwayz geh prayz.
8 Bot if raichos peepl sin ahn sayka dat dehn kech dehn ahn tai dehn op,An if dehn di sofa bikaaz dehn chayn dehn op,
9 Den Gaad mek dehn noa bowt di rang tingz dehn du,An ih mek dehn noa dat dehn sin bikaaz dehn prowd.
10 Hihn oapm dehn ayz fi mek dehn hyaa wen ih karek dehn,An ih tel dehn fi stap du bad tingz.
11 If dehn obay ahn, an dehn serv ahn,Den dehn wahn liv wahn gud laif,Ahn dehn wahn injai di res a dehn laif.
12 Bot if dehn noh obay ahn, peepl wahn yooz dehn soad fi kil dehn,
Ahn dehn wahn ded widowt ga wizdom.
13 Wikid peepl* hoal malis,
Ahn dehn noh baal fi help eevn wen Gaad tai dehn op.
14 Dehn liv dehn laif wid di mayl prastichoot dehn,*Ahn dehn ded* wail dehn stil yong.
15 Bot Gaad* sayv dehn wan weh di sofa,An ih oapm dehn ayz fi mek dehn hyaa ahn wen peepl di chreet dehn kruwil.
16 Hihn tek yu weh fahn sofarin,An ih kehr yu da wahn sayf plays wehpaat nobadi di sofa.An ih put lata nais food pahn yu taybl fi gi yu komfert.
17 Den yu wahn satisfai wen Gaad joj wikid peepl,Wen ih anonks weh wahn hapm tu dehn, ahn wen ih bring jostis.
18 Mek shoar dat yu noh hoal malis sayka weh yu geh soh beks,Ahn noh mek wahn braib kaaz yu fi schray weh.
19 If yu krai fi help er du evriting weh yu kud fi get weh fahn sofarin,Yu tink dat meenz yu noh wahn sofa?
20 Yu noh fi wish fi mek di nait kohn,Wen peepl disapyaa fahn wehpaat dehn deh.
21 Noh chooz fi du bad tingzSayka weh yu noh waahn sofa nohmoh.
22 Gaad ga wahn hai pozishan sayka ih powa.Ahn hoo ku teech laik hihn?
23 Hoo tel Gaad weh fi du?*Er hoo tel ahn dat weh ih du rang?
24 Memba fi prayz ahn fi di tingz weh ih du,Tingz weh peepl sing bowt.
25 Evribadi see’t;Peepl luk pahn evriting weh ih du fahn faar.
26 Yes, wi kuda neva andastan humoch powa Gaad gat,Ahn nobadi ku andastan humoch yaaz hihn don liv.
27 Hihn mek sohn lee jrap a waata weh nobadi ku si goh op,Ahn dehn ton intu sohn klowd.
28 Den waata poar owt fahn di klowd dehn,Ahn rayn kohn dong pahn di peepl.
29 Yu tink enibadi ku andastan how di klowd dehn spred owtAn andastan di tonda weh kohn fahn wehpaat hihn deh?
30 Luk how ih flash laitnin* oava it,An ih kova di batam a di see wid lata waata.
31 Dat da how hihn tek kayr a peepl,An ih gi dehn lata food.
32 Hihn kova di laitnin wid ih han dehn,An ih mek ih schraik wehpaat hihn waahnt.
33 Tonda anonks wen hihn di kohn,Eevn di animal dehn noa hoo* di kohn.
Futnoat
^ Dis ku aalso bee “ih mek dehn bee king.”
^ Er “Di apastayt dehn.” Si di Glasari, “Apastayt.”
^ Lit., “di mayl templ prastichoot dehn.”
^ Er “dehn soal ded.” Si di Glasari, “Soal.”
^ Lit., “Hihn.”
^ Dis ku aalso bee “Hoo ku kritisaiz Gaad fi weh ih du?” er “Hoo hihn haftu ansa tu fi weh ih du?”
^ Lit., “lait.”
^ Dis ku aalso bee “weh.”
