Joab 39:1-30
39 “Yoo noa wen di mongtin goat dehn fi ga baybi?
Yoo eva wach di dyaa dehn wen dehn di ga dehn baybi?
2 Yoo ku konk humoch monts dehn fi bee pregnant?
Ahn yoo noa wen dehn fi ga baybi?
3 Dehn ben dong wen dehn di ga dehn baybi,Ahn den dehn layba payn stap.
4 Dehn yong wanz groa op eena di oapm feel ahn dehn geh schrang.Den dehn lef ahn dehn noh kohn bak agen.
5 Hoo set di wail dongki free,Ahn hoo loos di wail dongki weh tai op wid wahn roap?
6 Ah mek di wail dongki liv da di dezert,An Ah mek ih liv da wahn plays weh ga saalt.
7 Ih stay weh fahn di siti weh mek lata naiz,An ih noh hyaa di vais a di wan weh koman ahn fi werk.
8 Ih waak bowt pahn di hil dehn di luk fi food fi eet.Ih luk fi eni kaina graas weh ih ku fain.
9 Yu tink di wail bul wilin fi werk fi yu?
Yu tink ih wahn sleep eena yu staybl?*
10 Yoo ku tai op wahn wail bul wid wahn roap fi mek ih plow di grong?Er yu tink ih wahn fala yu fi plow di vali?
11 Yoo wahn put yu chros eena ih schrent?Ahn yoo wahn mek ih du yu hevi werk?
12 Yoo wahn pen pan ahn fi bring bak di tingz weh yu haavis?Ahn yu tink ih wahn kehr dehn da di plays wehpaat yu beet owt grayn?
13 Di oschrij flap ih wingz bikaaz ih hapi,Bot fi shee wingz da noh laik di wingz fahn wahn stoark.
14 Shee lef ih eg dehn pahn di grong,Ahn shee kip dehn waam eena di san.
15 Shee noh wori dat sombadi mait waak pan ih eg dehn ahn brok dehn opEr dat wahn wail animal mait mash dehn op.
16 Shee chreet ih pikni dehn rof, laik if dehn da noh fi shee.Ahn shee noh frayd dat aala ih werk mait en op di bee fi notn.
17 Gaad noh giv ahn* wizdom,An ih noh giv ahn no andastandin.
18 Bot wen shee get op an ih flap ih wing dehn,Shee laaf aata di haas ahn di wan weh di raid it.
19 Yu tink yoo da di wan weh gi di haas ih schrent?
Ahn yu tink yu ku jres op ih nek wid sohn byootiful hyaa?
20 Yoo tink yu ku mek ih jomp laik wahn loakos?
Di lowd naiz weh ih mek wid ih noaz fraitnin.
21 Ih stamp ih fut dehn pahn di grong eena di vali fi shoa dat ih eksaitid ahn schrang.An ih ron faas intu wahn waar.
22 Ih laaf aata fyaa an ih noh frayd fi notn.
Ih noh ron weh wen ih si wahn soad.
23 Di bag weh hoal di aro dehn shayk gens di haas,Ahn di big spyaa ahn di smaal spyaa shain eena di lait.
24 Ih chrimbl wen ih eksaitid, ahn sayka dat ih ron faawod.Ih kyaahn stay wan spat* wen ih hyaa di song a di haan.
25 Wen sombadi bloa di haan, da laik if di haas seh, ‘Ahaahn!’
Ih smel waar fahn faar, an ih hyaa wen di komanda dehn showt owt lowd
Ahn wen di soalja dehn hala owt fi staat di waar.
26 Yoo mi eva teech wahn falkon* how fi flai?Yoo mi teech ahn fi flai tuwaadz di sowt?
27 Er da yoo koman wahn eegl fi flai op hai ahn mek ih nes?
28 Da nait ih sleep pahn wahn klif,An ih liv da wahn plays weh ga lata rak weh mek ih feel sayf.
29 Ih saach fi food fahn rait deh.Ih aiy dehn ku si fahn faar.
30 Ih yong wanz sip op blod,Ahn di eegl deh rait wehpaat di ded badi dehn deh.”
Futnoat
^ Er “maynja.”
^ Er “Gaad mek shee ferget.”
^ Dis ku aalso bee “Ih noh bileev.”
^ Dis da wahn berd weh luk laik wahn haak.
