Joab 40:1-24
40 Den Jehoava tel Joab:
2 “Yu tink enibadi ku kwaaril wid mee, di Almaiti, laik if Ah mi du sohnting rang?
Mek di wan weh waahn karek mi seh sohnting.”
3 Den Joab tel Jehoava:
4 “Ai noh impoatant.
Weh Ah ku tel yoo?
Ah wahn put mi han oava mi mowt.
5 Ah mi taak oava ahn oava agen,Bot Ah noh wahn ansa ner seh notn els.”
6 Den Jehoava taak tu Joab fahn owta wahn schrang schrang breez, an ih tel ahn:
7 “Pleez geh redi, bikaaz Ah wahn kweschan yu.Ak laik wahn man an ansa mi.
8 Yu tink yu ku akyooz mi ahn seh dat Ai noh fyaa?
Yu tink yu ku kandem mi soh dat yoo ku bee rait?
9 Yu tink dat yu han powaful laik mai wan?Er yu tink dat yu vais da laik mai wan weh song lowd laik tonda?
10 Pleez put aan gloari ahn powa.Ahn jres op yuself wid aana ahn byooti.
11 Shoa dat yu beks bad,Ahn luk pahn evribadi weh prowd ahn bring dehn dong.
12 Luk pahn peepl weh prowd, ahn hombl dehn.Ahn dischrai di wikid peepl rait wehpaat dehn deh.
13 Haid aala dehn eena di dos;Lak dehn op eena di grayv.
14 If yu ku du aala dehndeh tingz,Ah wahn admit dat yu rait han ku sayv yu.
15 Tink bowt di hipopatimos* weh eet graas jos laik wahn bul.
Da mee mek di too a unu.
16 Luk how schrang ih leg dehn,Ahn luk how powaful ih mosl dehn fahn ih beli.
17 Ih tayl haad laik seeda wud,An aala ih nerv fahn ih leg dehn luk laik if sohnbadi plat dehn tugeda.
18 Da laik if ih boan dehn mek owta kapa,Ahn da laik if ih leg dehn mek owta aiyan.
19 Ih tek fers plays monks di tingz weh Ah mek.An onli mee, di wan weh mek ahn, ku kil ahn wid wahn soad.
20 Wahn lata food weh ih ku eet groa pahn di mongtin dehn.Ahn da rait deh di wail animal dehn play.
21 Ih lidong andaneeta di bush dehn.*An ih haid monks di taal graas dehn eena wahn swampi ayrya.
22 Dehndeh kaina bush giv ahn shayd.Ahn di poplar* chree dehn weh groa eena di vali* deh aal rong ahn.
23 Eevn if di riva rof, ih noh geh fraitn,
An ih kanfident eevn doa di Jaadn Riva lash gens ih mowt.
24 Yu tink enibadi ku kech ahn wail ih di luk pahn dehn?Er enibadi ku yooz wahn huk fi boar ih noaz?
Futnoat
^ Eena Heebroo dis werd da Beheemot.
^ Dis da wahn kaina prikl bush weh naym loatos an ih groa eena sohn swampi ayrya.
^ Dis werd eena Heebroo di rifaa tu wahn chree weh groa kloas tu di riva dehn da di Midl Ees.
^ Er “wadi.” Si di Glasari, “Wadi.”
