Joab 42:1-17
42 Den Joab ansa Jehoava, an ih tel ahn:
2 “Now Ah noa dat yoo ku du enitingAhn dat wen yu mek op yu main fi du sohnting, notn ku stap yu.
3 Yoo mi seh, ‘Yu tink yu fi kweschan mi disizhan dehn ahn taak bowt weh yu noh noa?’Da chroo, Ah mi taak bowt tingz weh Ah noh noa, bowt tingz weh soh wandaful dat Ah kyaahn andastan dehn.
4 Yu mi seh, ‘Pleez lisn tu mi, an Ah wahn tel yu sohnting.
Ah wahn kweschan yu, ahn yu fi ansa mi.’
5 Mi ayz dehn mi hyaa bowt yu,Bot now Ah si yu wid mi oan aiy.
6 Ah rigret weh Ah seh.Dat da wai Ah sidong eena dos ahn ashiz.”
7 Afta Jehoava mi tel Joab dehndeh tingz, Jehoava tel Elifaz di Teemanait man:
“Ah reeli beks wid yoo ahn yu too fren dehn, bikaaz unu da noh laik mi servant Joab; unu noh tel di chroot bowt mi.
8 Now, unu geh sevn bul ahn sevn mayl sheep an unu goh goh si mi servant Joab. Unu fi bon di animal dehn an aafa dehn op az wahn sakrifais, ahn mai servant Joab wahn pray fi unu. An Ah wahn lisn tu ahn* wen ih aks mi fi noh ponish unu fi di foolish tingz weh unu seh, bikaaz unu da noh laik mi servant Joab; unu noh taak di chroot bowt mi.”
9 Soh Elifaz di Teemanait man, Bildad di Shoohait man, ahn Zoafar di Nayamatait man gaahn du weh Jehoava tel dehn fi du. Ahn Jehoava mi lisn tu Joab pryaa.
10 Afta Joab mi don pray fi ih fren dehn, Jehoava mi mek ih stap sofa, an ih giv ahn bak aala ih richiz. Jehoava giv ahn dobl di amonk a evriting weh ih mi ga bifoa.
11 Aala Joab breda ahn sista dehn an aala ih fren dehn gaahn vizit ahn, an dehn eet sohn food wid ahn da ih hows. Dehn mi feel sari far ahn, an dehn mi komfert ahn sayka aala di bad tingz weh Jehoava mi alow ahn fi gaahn chroo. Eech wan a dehn mi giv ahn sohn moni ahn wahn goal ring.
12 Soh Jehoava mi bles di laas paat a Joab laif moa dan di fers paat, ahn Joab mi en op di ga 14,000 sheep, 6,000 kyamil, 2,000 kow, ahn 1,000 feemayl dongki.
13 An ih mi en op di ga sevn moa son ahn chree moa daata.
14 Ih mi naym ih fers daata Jemaima, di sekant wan Kizaiya, ahn di terd wan Karen-hapok.
15 Non a di ada wuman dehn eena di hoal konchri mi az byootiful az Joab daata dehn, ahn dehn pa mi gi dehn wahn inheritans lang wid dehn breda dehn.
16 Afta dat Joab mi liv 140 yaaz moa, an ih mi geh fi si ih pikni dehn an ih granpikni dehn. Aal tugeda da mi foa jenarayshan.
17 Soh Joab mi liv wahn lang ahn hapi laif, an afta dat ih ded.
Futnoat
^ Lit., “Fi shoar Ah wahn lif op ih fays.”
