Joab 5:1-27
5 “Pleez, krai owt fi help! Yu tink dehn ga enibadi weh wahn ansa yu?
Wich wan a di hoali wan dehn yu wahn kaal fi help yu?
2 Bikaaz wahn groj wahn kil wahn foolish persn,Ahn jelosi wahn kil wahn persn weh bileev eniting.
3 Ah si wahn foolish persn ga sokses jos laik wahn chree weh groa roots.An owta no way ih hows geh kers* ahn sohnting bad hapm tu it.
4 Ih son dehn deh eena daynja,Ahn dehn shaym dehn da di siti gayt, ahn nobadi deh fi sayv dehn.
5 Peepl weh hongri eet weh dehn haavis,Ahn dehn eevn tek eniting weh groa monks di prikl.An ada peepl tek tingz weh bilangz tu dehn.
6 Bot tingz weh kaaz payn noh kom owt fahn di dos,Ahn chrobl noh kohn fahn di grong.
7 Jos laik how wahn faiya bon fi shoar,Sayhn way soh wahn man baan fi sofa bad tingz.
8 Bot if Ai da-mi yoo, Ai wuda ton tu Gaad,Ahn da tu hihn Ah mi wahn kehr mi kays.
9 Hihn da di wan weh du lata amayzin tingz weh nobadi ku andastan.Hihn du soh moch wandaful tingz weh nobadi ku konk.
10 Hihn mek ih rayn pahn di ert,Ahn tanks tu hihn, di lan dehn ga waata.
11 Hihn rayz op dehn wan weh adaz noh tink impoatant,Ahn hihn sayv dehn wan weh sad.
12 Hihn mek wahn chriki persn planz fayl,Soh dat di werk weh dehn du wid dehn han noh ga no sokses.
13 Hihn mek wahn waiz persn geh kech eena ih oan chrap,Soh dat ih planz fayl.
14 Daaknis sorong dehn joorin di day,An eevn eena braad daylait, dehn da laik peepl weh saach fi tingz eena daaknis.
15 Gaad sayv dehn fahn peepl weh ga wahn soad eena dehn mowt,An ih sayv poa peepl fahn dehn wan weh schrang,
16 Soh dat dehn wan weh adaz noh tink impoatant ku ga hoap,Bot dehn wan weh noh raichos haftu kip dehn mowt kloaz.
17 Dehn wan weh Gaad karek wahn bee hapi;Soh noh rijek di karekshan fahn di Almaiti!
18 Gaad ku kaaz payn, bot hihn bandij op sombadi weh geh hert;Hihn ku dischrai, bot ih heel wid ih oan han.
19 Hihn wahn sayv yu fahn wan dizaasta afta di ada;Nat eevn di sikst er sevent wan wahn haam yu.
20 Joorin wahn famin hihn wahn sayv yu fahn det,An ih wahn sayv yu fahn wahn soad joorin waar.
21 Gaad wahn protek yu fahn werdz weh ku hert yu,Ahn yu noh wahn frayd wen dizaasta kom.
22 Yu noh wahn wori bowt dischrokshan ner honga,Ahn yu noh wahn frayd fi wail animalz.
23 Di stoan dehn fahn di feel noh wahn haam yu,*Ahn di wail animal dehn fahn di feel wahn liv eena pees wid yu.
24 Fi shoar yu wahn injai pees eena yu tent,Ahn wen yu goh chek yu feel, non a yu animal wahn misn.
25 Yu wahn ga lata pikni,Ahn yu disendant dehn wahn bee plenti laik di graas weh deh pahn di ert.
26 Yu wahn stil bee schrang wen yu goh dong eena di grayv,Laik sohn bondl a grayn weh dehn gyada op joorin di taim wen dehn fi haavis dehn.
27 Luk! Wi don egzamin dis, ahn da soh tingz goh.
Soh lisn an aksep it.”
