Joab 7:1-21
7 “Peepl haftu werk haad aal dehn laif,Ahn dehn dayz da laik di dayz a wahn werka weh sombadi haiya.
2 Dehn da laik wahn slayv weh waahn deh eena shayd,Ahn dehn da laik wahn werka weh di wayt fi ih pay.
3 Fi lata monts mi laif mi wertles,An Ah mi mizarabl fi wahn lata naits.
4 Wen Ah lidong, Ah aks miself, ‘Da wen maanin wahn kohn?’
Di nait feel lang an Ah kyaahn sleep ahn den maanin kohn.
5 Mi badi ful op a werm ahn dert;Mi skin ful op a skyab ahn pos.
6 Mi dayz goh faasa dan how sombadi weev tingz.Mi laif di kohn tu wahn en, an Ah noh ga no hoap.
7 Oa Gaad, memba dat mi laif da laik di breezAhn dat Ah wahn neva feel hapi agen.*
8 Yu di si mi now, bot yu noh wahn si mi nohmoh;Yu wahn luk fi mi, bot yu noh wahn fain mi.
9 Jos laik wahn klowd weh fayd weh ahn disapyaa,Da rait soh sombadi weh goh dong eena di Grayv* noh kohn bak op.
10 Dehn noh gwehn bak da dehn hows,Ahn di peepl weh mi noa ahn noh wahn memba ahn nohmoh.
11 Soh Ah noh wahn kanchroal mi mowt.
Ah wahn taak wail mi spirit deh eena payn;Ah wahn komplayn wail Ah di sofa.
12 Yu tink Ai da di see er wahn monsta weh liv eena di see,Dat yu fi put wahn gyaad fi wach oava mi?
13 Wen Ah seh, ‘Mi bed wahn komfert mi,An ih wahn help mi fi noh feel soh mizarabl,’
14 Den yu mek Ah ga sohn jreem weh fraitn mi,Ahn yu mek Ah si sohn vizhan weh fraitn mi.
15 Soh Ah* prifaa fi stap breed ahn jos ded.Yes, ih beta fi mek Ah ded dan fi mek mi badi* deh laik dis.
16 Ah hayt mi laif; Ai noh waahn kantinyu liv.
Lef mi loan, bikaaz mi dayz da laik wahn bret.
17 Wai yu kay soh moch bowt peeplAhn pay soh moch atenshan tu dehn?
18 Wai yu egzamin dehn evri maaninAhn tes dehn evri taim?
19 Wai yu noh stap luk pahn mi ahn lef mi loanSoh dat yu at lees gi mi taim fi swala mi spit?
20 If Ah sin, how dat afek yoo, di wan weh si evriting weh peepl du?
Wai yu di atak mi? Ai da wahn berdn tu yoo?
21 Wai yu noh fergiv mi sin dehnAn aala mi mistayk dehn?
Ah wahn soon lidong eena di dos,Ahn yu wahn luk fi mi, bot Ah noh wahn dehdeh.”
Futnoat
^ Er “Ahn mi aiy noh wahn si notn gud agen.”
^ Er “Sheeyol,” weh da di Grayv. Si di Glasari, “Grayv.”
^ Er “Soh mi soal.” Si di Glasari, “Soal.”
^ Er “mi boanz.”
