Joab 9:1-35
9 Den Joab seh:
2 “Ah noa fi shoar dat weh yu seh da chroo.
Bot how hyoomanz ku seh dat dehn raichos fronta Gaad?
3 If sombadi waahn aagyu wid Gaad,*Dehn wahn kyaahn ansa wan kweschan owta di towzn kweschanz weh hihn aks.
4 Hihn ga wahn waiz haat an ih powaful.
Hoo ku goh gens ahn, an noh geh hert?
5 Hihn moov* di mongtin dehn widowt enibadi noa bowt it.Hihn ton dehn oava wen ih beks.
6 Hihn shayk di ert owta ih plays,Soh dat ih fongdayshan chrimbl.
7 Hihn koman di son fi noh shain ih lait,An ih seel aaf di lait fahn di staar dehn.
8 Hihn schrech owt di hevn laik wahn klaat,An ih waak oava di big wayv dehn a di see.
9 Hihn mek di groop a staar dehn weh naym Ash,* Keesil,* ahn Kaima,*Ahn di groop a staar dehn weh shoa op eena di skai tuwaadz di sowt.
10 Hihn du lata amayzin tingz weh nobadi ku andastan,Wandaful tingz weh nobadi ku konk.
11 Hihn paas kloas tu mi, an Ah kyaahn si ahn;Hihn paas rait fronta mi, bot Ah noh rekonaiz ahn.
12 Wen ih tek weh sohnting, hoo ku stap ahn?
Enibadi ku aks ahn, ‘Da weh yu di du?’
13 Gaad noh wahn hoal bak ih anga;Eevn dehn wan weh help Rayhab* wahn bow dong tu ahn.
14 Soh Ah haftu bee kyaaful wen Ah ansa ahn,An Ah haftu bee kyaaful wen Ah chooz mi werdz wen Ah ansa ahn.
15 Eevn if Ah neva du notn rang, Ah neva mi wahn ansa ahn.
Aal Ah kud du da beg mi joj fi shoa mi mersi.
16 If Ah kaal owt tu ahn, yu tink hihn wahn ansa mi?
Ah noh bileev hihn wahn lisn tu mi vais,
17 Bikaaz ih krosh mi wid wahn staamAn ih mek Ah sofa wahn lat fi no reezn.
18 Hihn noh mek Ah kech mi bret,An ih kip di ful mi op wid bita tingz.
19 If wi di taak bowt powa, Gaad schranga.
If wi di taak bowt jostis, Gaad seh: ‘Ah noh haftu ansa tu nobadi.’*
20 If Ah neva du notn rang, mi oan mowt wuda kandem mi.Eevn if Ah inosent, hihn wahn stil seh dat Ah gilti.
21 Eevn if Ah inosent, Ah noh noa weh wahn hapm tu mi;Ah hayt mi laif.
22 Ih noh mek no difrens. Dat da wai Ah seh,‘Hihn dischrai inosent peepl* di saym way ih dischrai wikid peepl.’
23 If wahn flod kom owta no way ahn kil peepl,Hihn wuda mek fon a di inosent peepl weh noh ga no hoap.
24 Hihn gi di ert tu di wikid peepl;Hihn kova di joj dehn aiy.*
If da noh hihn, den da hoo?
25 Mi dayz goh faasa dan wahn rona;Ahn dehn ron weh widowt si eniting.
26 Dehn goh faas laik wahn boat weh mek owta reed,*Laik wahn eegl weh flai dong fi kech di animal weh ih di hont fa.
27 If Ah seh, ‘Ai wahn ferget weh Ai di komplayn bowt,An Ah wahn stap luk sad ahn bee hapi,’
28 Bot Ah wuda stil frayd bikaaz a aala mi payn,An Ah noa yu wudn seh dat Ah inosent.
29 Bot yu wuda seh dat Ah gilti.*
Soh wai Ah shuda eevn bada fi chrai proov dat Ah inosent?
30 If Ah bayd miself wid waata weh kohn fahn snoa weh don melt,An if Ah wash mi han wid soap,*
31 Yu wuda sink mi eena wahn hoal* weh ful op a mod,Soh dat eevn mi oan kloaz wuda hayt mi.
32 Hihn da noh wahn man laik mee weh Ah shuda ansa ahn kehr da koat.
33 Nobadi deh fi disaid bitween di too a wi, hoo ku serv az wi joj.*
34 If hihn wuda stap beet mi ahn stap fraitn mi,
35 Den Ah wudn frayd fi taak tu ahn,Bikaaz Ah noh naamali frayd fi taak tu ahn.
Futnoat
^ Er “waahn kehr Gaad da koat.”
^ Er “Hihn geh rid a.”
^ Ih pasabl dat dis da di groop a staarz weh naym di Grayt Byaa er Ursa Major.
^ Ih pasabl dat dis da di groop a staarz weh naym Oraiyon.
^ Ih pasabl dat dis da sohn staarz weh naym Pleeyadees weh deh eena wahn groop a staarz weh naym Taaros.
^ Dis praabli di rifaa tu wahn big monsta weh liv eena di see.
^ Er “Nobadi ku aada mi fi goh da koat.”
^ Er “Hihn dischrai peepl weh faytful.”
^ Lit., “fays.”
^ Si di Glasari, “Reed.”
^ Lit., “wikid.”
^ Er “potash.” Dis da wahn kaina soap weh mek owta ashiz.
^ Er “pit.”
^ Lit., “ku put ih han pahn di too a wi.”
