Joana 1:1-17
1 Joana,* Amitai son, geh wahn mesij fahn Jehoava weh seh:
2 “Get op ahn goh da di big siti weh naym Niniveh, ahn tel di peepl dat Ah wahn dischrai dehn bikaaz Ah si how wikid dehn wikid.”
3 Bot insteda du dat, Joana chrai ron weh fahn Jehoava. Soh ih gaahn da Japa, an ih fain wahn boat weh gwehn da Tarshish. Ih pay ih pasij ahn get pahn di boat fi get weh fahn Jehoava.
4 Den Jehoava mek wahn schrang breez bloa, ahn dat kaaz wahn staam weh mi soh bad dat ih mi feel laik ih mi wahn brok op di boat.
5 Di sayla dehn mi soh fraitn dat dehn staat tu pray tu dehn gaad fi help. Ahn dehn staat chroa tingz aafa di boat fi mek it laita. Bot Joana mi deh batam a di boat di sleep.
6 Soh di kyaptin gaahn aks ahn: “Wai yu di sleep? Get op ahn pray tu yu gaad! Maybi di chroo Gaad wahn feel sari fi wi ahn wi noh wahn ded.”
7 Den dehn tel wan anada: “Kohn mek wi fain owt da hoo fi blaym fi dis staam.” Soh dehn chroa lats* fi si da hoo, ahn dehn fain owt dat da mi Joana.
8 Dehn aks ahn: “Tel di chroot, hoo fi blaym fi weh di hapm? Wehpaat yu kohn fram, ahn weh kaina werk yu du? Wich konchri yu kohn fram, ahn hoo da yu peepl?”
9 Hihn seh: “Ai da wahn Heebroo, an Ai wership Jehoava di Gaad weh liv da hevn, di Gaad weh mek di see ahn di lan.”
10 Den di man dehn geh eevn moa frayd wen hihn tel dehn dat hihn di ron weh fahn Jehoava. Ahn dehn aks ahn: “Wai yu gaahn du dat?”
11 Den dehn aks ahn: “Weh wi need fi du fi mek di see kaam dong?” Kaaz di see mi-di geh moa ahn moa rof.
12 Joana tel dehn: “Dash mi eena di see ahn di see wahn kaam dong, kaaz Ai noa dat da sayka mee dis di hapm tu unu.”
13 Bot dehn mi-di padl haad fi chrai get bak da lan, bot dehn kudn mek eni hedway bikaaz di see mi-di geh rofa ahn rofa.
14 Den dehn hala owt tu Jehoava ahn seh: “Wi bayg yu, Jehoava, pleez noh mek wi ded sayka dis man! Noh blaym wi fi weh wi tek weh dis inosent man laif, bikaaz dis da how yu mi waahn ih hapm, Jehoava.”
15 Soh dehn pik op Joana ahn dash ahn da see, ahn di see kaam rait dong.
16 Afta dat di man dehn staat tu ga wahn lata rispek fi Jehoava, soh dehn aafa sakrifais tu Jehoava ahn pramis fi serv ahn.
17 Ahn Jehoava sen wahn big fish fi swala Joana, ahn Joana mi deh eena di fish beli fi chree dayz ahn chree naits.
