Joana 2:1-10
2 Wail Joana mi deh eena di fish beli, ih pray tu Jehoava ih Gaad,
2 an ih seh:
“Ah mi-di sofa wahn lat soh Ah krai owt tu yu, Jehoava, ahn yu ansa mi.
Fahn deep dong eena* di Grayv* Ah krai fi help,
Ahn yoo hyaa mi vais.
3 Yu chroa mi eena deep waata, rait da di midl a di see,Ahn di waata swala mi op.
Di powaful wayv dehn weh yu mek wash oava mi.
4 An Ah seh, ‘Yu jraiv mi weh fahn fronta yu!
Da how Ai ku eva luk pahn yu hoali templ agen?’
5 Di waata kova oava mi ahn chretn fi kil mi;Di deep waata lak mi een.
Seeweed mi tangl op aal rong mi hed.
6 Ah sink way dong tu di batam a di see, tu di batam a di mongtin dehn.
Ah mi feel laik di gayt tu di grayv* di kloaz oava mi.
Bot, Jehoava, yoo pul mi* fahn owta da deep hoal.
7 Wen Ah mi-di ded, yoo da di Wan weh Ah memba, Jehoava.
Fahn way eena yu hoali templ yu hyaa mi pryaa.
8 Enibadi weh wership wertles aidolz ton dehn bak pahn di Gaad weh aalwayz shoa dehn lov.*
9 Bot Ai noh wahn du dat, Ah wahn mek sakrifais tu yoo an Ah wahn prayz yu.
Jehoava, wateva Ah pramis yu, Ah wahn du.
Yoo da di wan weh gi salvayshan.”
10 Afta wahn wail, Jehoava koman di fish fi vamit Joana owt pahn lan.
Futnoat
^ Er “Fahn eena di beli a.”
^ Er “Sheeyol,” weh da di Grayv. Si di Glasari, “Grayv.”
^ Lit., “ert.”
^ Er “mi laif.”
^ Er “laayal lov.” Dis ku aalso bee “Enibadi weh wership wertles aidolz stap shoa lov.” Si di Glasari, “Laayal lov.”
