Joana 3:1-10
3 Den Jehoava gi Joana di mesij agen, an ih seh:
2 “Get op ahn goh da di big siti weh naym Niniveh ahn gi di peepl di mesij weh Ah gi yu.”
3 Soh Joana du weh Jehoava mi tel ahn fi du an ih gaahn da Niniveh. Niniveh da-mi wahn big big siti. Ih mi soh big dat ih tek chree dayz fi waak rong* it.
4 Den Joana gaan eena di siti an ih waak fi wahn hoal day di anonks: “Eena jos 40 dayz, Niniveh wahn geh dischrai!”
5 Ahn soh di peepl da Niniveh staat shoa fayt eena Gaad, ahn dehn disaid dat evri singl wan a dehn, fahn di rich wan tu di poa wan, fahn di oal wan dehn rait dong tu di wan dehn weh yong wahn faas ahn put aan kloaz weh mek owta goat hyaa.*
6 Wen di king a Niniveh hyaa di mesij, ih get op aafa ih chroan, tek aaf ih raiyal kloaz ahn put aan kloaz weh mek owta goat hyaa, den ih sidong eena ashiz.
7 Di king mek wahn anonksment fi evribadi da Niniveh:“Di king an aala ih ofishal koman dat no man ner animal fi eet er jrink eniting ataal. Dehn noh fi eet no kaina food ahn dehn nat eevn fi jrink waata.
8 Mek aala di peepl wayr klaat weh mek owta goat hyaa ahn kova dehn animal wid di saym kaina klaat. Ahn mek dehn krai owt tu Gaad wid dehn hoal haat ahn ton fahn dehn wikid wayz ahn stap bee vailent.
9 An if wi du dat, di chroo Gaad mait noh geh soh beks wid wi, an ih jos mait chaynj ih main ahn noh dischrai wi.”
10 Wen di chroo Gaad mi si dat di peepl mi chaynj dehn wayz ahn stap du weh wikid, hihn mi chaynj ih main ahn neva dischrai dehn agen.
