Jojiz 10:1-18
10 Afta Abimelek mi ded, Toala staat tu sayv Izrel. Hihn mi kohn fahn Isakar chraib ahn fi hihn pa da-mi Poowa, ahn Poowa pa da-mi Doadoa. Toala mi liv da Shaymir weh deh eena di mongtin dehn eena Eefrayim teritori.
2 Hihn mi joj Izrel fi 23 yaaz. Den ih ded ahn dehn beri ahn da Shaymir.
3 Afta hihn, Jayir staat tu joj Izrel, an ih mi joj Izrel fi 22 yaaz. Hihn mi kohn fahn Gilyad.
4 Hihn mi ga 30 son weh raid pahn 30 dongki, ahn dehn mi ga 30 siti eena Gilyad. Ahn tu dis day dehn kaal dehndeh siti Havot-jayir.
5 Afta dat Jayir ded, ahn dehn beri ahn da Kaymon.
6 Agen di Izrelait dehn mi du weh bad eena Jehoava sait, ahn dehn staat tu wership di Bayal gaad dehn,* di Ashtoret aidol dehn, Ayram* gaad dehn, Saidan gaad dehn, Moawab gaad dehn, di Amonait gaad dehn, ahn di Filisteen gaad dehn. Dehn mi abandan Jehoava ahn stap wership ahn.
7 Den Jehoava geh beks bad wid di Izrelait dehn, an ih han dehn oava tu di Filisteen an Amonait dehn.
8 Soh da yaa dehn haras di Izrelait dehn, ahn dehn onli chreet dehn kruwil. Fi 18 yaaz dehn mi kruwil tu di Izrelait dehn weh liv pahn di ada said a di Jaadn da Gilyad weh yoostu bilangz tu di Amorait dehn.
9 Di Amonait dehn wuda kraas di Jaadn Riva fi fait gens di chraib a Jooda, Benjamin, an Eefrayim, soh di Izrelait dehn mi-di sofa wahn lat.
10 Den di Izrelait dehn staat tu bayg Jehoava fi help. Dehn seh: “Wi sin gens yoo, wi Gaad, kaaz wi abandan yu ahn gaahn serv di Bayal gaad dehn.”
11 Bot Jehoava tel di Izrelait dehn: “Ai neva sayv unu fahn Eejip ahn fahn di Amorait, Amonait, Filisteen,
12 Sidoanyan, Amalekait, ahn Midyanait dehn wen dehn mi-di chreet unu kruwil? Wen unu mi krai owt tu mi, Ah sayv unu.
13 Bot unu lef mee ahn gaahn wership sohn ada gaad. Soh Ai noh wahn sayv unu agen.
14 Goh aks di gaad dehn weh unu di serv fi help unu. Mek dehn sayv unu fahn unu sofarin.”
15 Bot di Izrelait dehn tel Jehoava: “Wi sin gens yu. Du wateva yu waahn wid wi. Bot pleez sayv wi now.”
16 Ahn dehn geh rid a aala di farin gaad weh mi deh monks dehn ahn staat serv Jehoava. Soh ih geh taiyad a si di Izrelait dehn di sofa.*
17 Afta wahn wail, di Amonait dehn kohn tugeda fi waar, ahn dehn set op kyamp da Gilyad, soh di Izrelait dehn kohn tugeda ahn set op kyamp da Mizpa.
18 Di peepl ahn di cheef dehn da Gilyad mi taak tu wan anada, ahn dehn seh: “Hoo wahn tek di leed eena di waar gens di Amonait dehn? Mek hihn bee di cheef oava evribadi weh liv da Gilyad.”
Futnoat
^ Si di Glasari, “Bayal.”
^ Er “Siriya.”
^ Er “an ih soal geh impayshent bikaaz di Izrelait dehn mi-di sofa.”
