Jojiz 12:1-15
12 Den di man dehn fahn Eefrayim mi kohn tugeda ahn dehn kraas oava ahn gaahn da Zayfon* ahn tel Jefta: “Wai yu neva kaal wi fi goh wid yu wen yu gaahn fait di Amonait dehn? Wi wahn bon dong yu hows wid yoo een deh.”
2 Bot Jefta tel dehn: “Mee ahn mai peepl mi-di fait wahn big waar wid di Amonait dehn, ahn wi mi did aks unu fi help, bot unu neva kohn help wi.
3 Wen Ah si dat unu wudn kohn help mi, den Ah disaid fi ris mi oan laif* ahn goh fait gens di Amonait dehn, ahn Jehoava gi mi vikchri oava dehn. Soh wai unu kohn ya tudeh kohn fait gens mi?”
4 Den Jefta gyada aala di man dehn fahn Gilyad tugeda ahn gaahn fait gens di man dehn fahn Eefrayim. Ahn dehn kanka di man dehn fahn Eefrayim weh mi seh: “Aala unu peepl fahn Gilyad weh liv da Eefrayim ahn Manaaseh da notn, kaaz unu da jos man weh mi ron weh fahn Eefrayim.”
5 Gilyad tek kanchroal oava di shalo paat a di Jaadn soh dat di man dehn fahn Eefrayim kudn paas. Wen di man dehn fahn Eefrayim mi chrai get weh, dehn wuda seh: “Mek Ah kraas.” Den di man dehn fahn Gilyad wuda aks eech wan, “Yoo da fahn Eefrayim chraib?” Wen ih ansa, “No!”
6 dehn wuda tel ahn, “Pleez seh Shibolet.” Bot ih wuda seh, “Sibolet,” kaaz ih kudn seh it karek. Den dehn wuda grab ahn, an kil ahn rait deh da di Jaadn. Soh 42,000 man fahn Eefrayim chraib mi ded da taim deh.
7 Jefta, hoo kohn fahn Gilyad, da-mi wahn joj oava Izrel fi siks yaaz. Afta dat ih ded, ahn dehn beri ahn eena ih siti da Gilyad.
8 Afta hihn, Ibzan da-mi joj oava Izrel. Hihn da-mi fahn Betlihem.
9 Hihn mi ga 30 son ahn 30 daata. Ih sen ih daata dehn fi mek dehn geh marid tu sohn man fahn owtsaida ih famili lain, an ih bring 30 wuman fi marid ih son dehn. Hihn mi joj Izrel fi sevn yaaz.
10 Den Ibzan ded, ahn dehn beri ahn da Betlihem.
11 Afta hihn, Eelon da-mi joj oava Izrel. Hihn mi joj Izrel fi ten yaaz, ahn hihn da-mi fahn Zebyulon chraib.
12 Den Eelon fahn Zebyulon chraib ded, ahn dehn beri ahn da Aijalon eena di lan weh bilangz tu Zebyulon chraib.
13 Afta hihn, Abdon mi joj Izrel. Hihn da-mi fahn Piraton ahn fi hihn pa da-mi Hilel.
14 Hihn mi ga 40 son ahn 30 granson hoo mi raid pahn 70 dongki. Hihn mi joj Izrel fi ayt yaaz.
15 Den Hilel son Abdon hoo kohn fahn Piraton ded, ahn dehn beri ahn da Piraton eena di lan weh bilangz tu Eefrayim chraib pahn di Amalekait dehn mongtin.
