Jojiz 13:1-25
13 Agen di Izrelait dehn staat fi du weh bad eena Jehoava sait, soh Jehoava mek di Filisteen dehn tek kanchroal oava dehn fi 40 yaaz.
2 Meenwail, dehn mi ga wahn man fahn Zoara weh mi naym Manoawa, hoo da-mi fahn Dan chraib. Fi hihn waif neva ga no pikni kaaz ih kudn geh pregnant.
3 Afta wahn wail, Jehoava aynjel apyaa tu di laydi ahn tel ahn: “Yoo noh ga no pikni kaaz yu kyaahn geh pregnant. Bot yu wahn geh pregnant ahn yu wahn ga wahn lee bwai.
4 Now mek shoar yu noh jrink no wain ner eniting weh gat een alkohol, ahn noh eet eniting weh noh kleen needa.
5 Fi shoar yu wahn geh pregnant ahn yu wahn ga wahn lee bwai. Yu noh fi kot ih hyaa, kaaz Gaad pik ahn fi bee wahn Nazarait* eevn bifoa ih baan.* Hihn wahn bee di wan weh wahn sayv Izrel fahn di Filisteen dehn.”
6 Den di laydi gaahn tel ih hozban: “Wahn servant a di chroo Gaad kohn tu mi, an ih mi luk laik wan a Gaad aynjel; ih mi soh amayzin. Ah neva aks ahn wehpaat ih kohn fram, an ih neva tel mi ih naym needa.
7 Bot ih tel mi, ‘Fi shoar yu wahn geh pregnant ahn yu wahn ga wahn lee bwai. Noh jrink no wain er eniting weh gat een alkohol, ahn noh eet notn weh noh kleen, bikaaz Gaad pik ahn fi bee wahn Nazarait fahn di day ih baan* til di day ih ded.’”
8 Den Manoawa bayg Jehoava ahn seh: “Sari Jehoava, bot pleez sen bak yu servant soh dat ih ku kohn tel wi how fi rayz wi lee bwai wen ih baan.”
9 Soh di chroo Gaad lisn tu Manoawa, ahn di aynjel apyaa agen tu di laydi wen ih mi-di sidong eena di feel, bot ih hozban Manoawa neva deh wid ahn.
10 Di laydi hori ron gaahn tel ih hozban: “Di man weh apyaa tu mi di ada day kohn bak agen.”
11 Den Manoawa get op ahn gaahn wid ih waif. Ih gaan op tu di man an aks ahn: “Yoo da di man weh mi taak tu mi waif?” Hihn tel ahn: “Yes, da mee.”
12 Den Manoawa seh: “Ah pray dat weh yu pramis wi kohn chroo! Da weh kaina laif ih wahn liv, ahn da weh kaina werk ih wahn du?”
13 Soh Jehoava aynjel tel Manoawa: “Yu waif shuda stay weh fahn evriting weh Ah mi tel ahn bowt.
14 Ih noh fi eet notn weh di grayp vain projoos, ih noh fi jrink no wain er alkohol, an ih noh fi eet eniting weh noh kleen. Mek ih du evriting weh Ah koman ahn fi du.”
15 Den Manoawa tel Jehoava aynjel: “Pleez noh goh yet. Stay, soh wi ku kuk op wahn yong goat fi yu.”
16 Bot Jehoava aynjel tel Manoawa: “If Ah stay, Ah noh wahn eet yu food, bot if yu waahn yu ku aafa wahn bon aafrin* tu Jehoava.” Now Manoawa neva noa dat di man da Jehoava aynjel.
17 Den Manoawa tel Jehoava aynjel: “Tel wi yu naym soh wi ku aana yu wen yu pramis kohn chroo.”
18 Bot Jehoava aynjel tel ahn: “Noh aks mi weh Ah naym, bikaaz mai naym da wahn wandaful naym.”
19 Den Manoawa geh di yong goat ahn di grayn aafrin* ahn put it pahn di rak fi aafa it tu Jehoava, ahn wail Manoawa an ih waif mi-di wach, Hihn mi-di du sohnting amayzin.
20 Wail di faiya mi-di goh op fahn di alta tuwaadz hevn, Jehoava aynjel gaan op eena di skai wid di faiya weh mi-di kohn fahn di alta wail Manoawa an ih waif mi-di wach. Rait away dehn bow dong wid dehn fays tu di grong.
21 Jehoava aynjel neva did apyaa agen tu Manoawa an ih waif. Den Manoawa riyalaiz dat di man da-mi Jehoava aynjel.
22 Den Manoawa tel ih waif: “Fi shoar wi wahn ded, kaaz da Gaad wi mi si.”
23 Bot ih waif tel ahn: “If Jehoava mi waahn kil wi den ih neva mi wahn aksep wi bon aafrin ner wi grayn aafrin, an ih neva mi wahn shoa wi aala dehnya tingz, ner tel wi eni a dehnya tingz needa.”
24 Laytaraan di laydi mi ga wahn lee bwai ahn naym ahn Samson, an az di lee bwai geh oalda, Jehoava kantinyu fi bles ahn.
25 Afta wahn wail Jehoava spirit mi moov Samson wen ih mi deh da Mayhana-dan, weh deh bitween Zoara an Eshtaol.
Futnoat
^ Si di Glasari, “Nazarait.”
^ Lit., “fahn di woom.”
^ Lit., “fahn di woom.”
^ Si di Glasari, “Bon aafrin.”
^ Si di Glasari, “Grayn aafrin.”
