Jojiz 14:1-20
14 Den Samson gaahn dong da Timna, ahn wen ih mi dehdeh ih si wahn Filisteen wuman.
2 Soh hihn gaahn bak hoam ahn tel ih ma an ih pa: “Dehn ga wahn Filisteen laydi da Timna weh Ah laik si, an Ah waahn mek unu get ahn fi mi mek ih bee mi waif.”
3 Bot ih ma an ih pa tel ahn: “Da wai yu haftu marid sombadi fahn monks di Filisteen dehn weh nat eevn serkomsaiz? Yu kyaahn jos marid sombadi fahn monks yu oan famili er fahn monks aala wi peepl?” Bot Samson tel ih pa: “No, get shee fi bee mi waif, bikaaz shee da di rait wan fi mee.”
4 Bot fi hihn ma ahn pa neva riyalaiz dat aala dis da-mi paat a Jehoava plan, kaaz di Filisteen dehn mi-di rool oava Izrel rong da taim, ahn hihn mi-di luk fi wahn apachooniti fi ponish di Filisteen dehn.
5 Soh Samson gaahn dong da Timna wid ih ma an ih pa. Ahn wen ih reech da di grayp aachad dehn weh deh da Timna, wahn laiyan* kom aata ahn di roar.
6 Bot den Jehoava spirit ful op Samson wid powa, an ih tayr di laiyan eena haaf, jos laik how sombadi wuda tayr wahn yong goat eena haaf wid jos ih han. Bot hihn neva tel ih ma ner ih pa weh ih mi du.
7 Den hihn gaahn dong da Timna ahn taak tu di wuman, ahn Samson mi stil feel dat shee da-mi di rait wuman fi hihn.
8 Laytaraan, wen ih mi-di goh bak da Timna fi marid di Filisteen wuman, ih gaahn luk pahn di laiyan ded badi, an ih si dat wahn swaam a bee ahn lata honi mi deh eena di laiyan badi.
9 Soh ih skrayp owt di honi wid ih han an eet it lang di way. Wen ih get bak tu ih ma ahn pa, ih gi dehn som fi eet. Bot ih neva tel dehn dat ih geh di honi fahn owta wahn laiyan ded badi.
10 Fahn deh Samson an ih pa gaahn dong da Timna fi si di Filisteen wuman, ahn rait deh Samson mi ga wahn bankwit, kaaz dat da weh di yong man dehn yoostu du.
11 Wen di peepl si ahn, dehn kehr 30 man fi help ahn owt wid di bankwit.
12 Den Samson tel dehn: “Pleez mek Ah tel unu wahn ridl. If unu ku gi mi di ansa joorin dehnya sevn dayz a di bankwit, Ah wahn haftu giv unu 30 linen kloaz ahn 30 set a kloaz.
13 Bot if unu kyaahn tel mi di ansa, den unu wahn haftu gi mee 30 linen kloaz ahn 30 set a kloaz.” Soh dehn tel ahn: “Mek wi hyaa di ridl.”
14 Soh hihn tel dehn:
“Sohnting fi eet kom owta sohnting weh eet,Ahn sohnting sweet kom owta sohnting weh schrang.”
Ahn dehn kudn ansa di ridl fi chree dayz.
15 Pahn di foat day, dehn tel Samson waif:* “Chrik yu hozban* soh dat ih ku tel wi di ansa tu di ridl. If nat, wi wahn bon op yoo an evribadi eena yu pa hows wid faiya. Unu jos invait wi ya fi tek wi bilanginz?”
16 Soh Samson waif stay mi-di krai tu ahn, an ih seh: “Yoo mosi hayt mi, noh chroo? Yu noh eevn lov mi. Yu gi mi peepl wahn ridl, bot yu nat eevn tel mi di ansa.” Den hihn tel ahn: “Gyal, Ai nat eevn tel mi oan ma ahn pa di ansa! Wai Ah wahn tel yoo fa?”
17 Bot fi di res a di sevn dayz a di bankwit, shee stay mi-di krai tu ahn. Soh pahn di sevent day hihn fainali giv ahn di ansa tu di ridl, bikaaz shee stay mi-di presha ahn. Ahn den shee gaahn tel fi shee peepl di ansa tu di ridl.
18 Soh pahn di sevent day bifoa di son gaahn dong,* di man dehn fahn di siti tel ahn:
“Weh sweeta dan honi,Ahn weh schranga dan wahn laiyan?”
Hihn ansa dehn:
“If unu neva yooz mi kyaaf fi plow di lan,Yu neva mi wahn solv mi ridl.”
19 Den Jehoava spirit ful ahn op wid powa, an ih gaahn dong da Ashkelon ahn kil 30 man fahn deh ahn tek dehn kloaz, an ih gi di set a kloaz tu di wan dehn weh mi ansa ih ridl. An az ih gaahn bak da ih pa hows, hihn mi beks bad.
20 Ahn soh dehn gi Samson waif tu wan a di man dehn weh mi-di help owt da di bankwit.
Futnoat
^ Er “wahn yong mayl laiyan.”
^ Akaadn tu Heebroo kostom, dehn kaal wahn wuman waif wans ih geh ingayj.
^ Akaadn tu Heebroo kostom, dehn kaal wahn man hozban wans ih geh ingayj.
^ Dis ku aalso bee “bifoa ih gaan eensaid.”
