Jojiz 17:1-13
-
Maika aidol dehn an ih prees (1-13)
17 Soh dehn mi ga dis man weh mi naym Maika. Ih mi kohn fahn di mongtin dehn da Eefrayim chraib teritori.
2 Hihn tel ih ma: “Sombadi mi teef 1,100 pees a silva fahn yu, an Ah hyaa wen yu put wahn kers* pahn hooeva tek it. Si di moni ya, da mee tek it.” Den ih ma tel ahn: “Jehoava bles yu, mi son.”
3 Soh ih gi bak di 1,100 pees a silva tu ih ma, bot ih ma tel ahn: “Ah pramis Ah wahn dedikayt di silva tu Jehoava. Ah waahn mek yu tek it ahn mek wahn silva imij ahn wahn metal stachu. Soh now Ah di giv it bak tu yoo.”
4 Afta ih gi di silva bak tu ih ma, ih ma tek 200 pees a silva ahn gi dehn tu wahn man weh mek ting owta silva. Ih mek wahn silva imij ahn wahn metal stachu, ahn dehn put dehn eena Maika hows.
5 Maika mi ga ih oan templ wehpaat ih wership ih aidol dehn, ahn hihn mi mek wahn efod ahn sohn aidol,* ahn hihn mi aalso put wan a ih son fi serv ahn az prees.
6 Eena dehndeh dayz, Izrel neva ga no king. Evribadi mi jos du weh dehn tink rait.
7 Now wahn yong Leevait man mi deh da Betlihem weh deh eena Jooda. Ih da-mi fahn Jooda famili lain, an ih mi-di liv deh fi wahn wail.
8 Di man lef fahn Betlihem Siti weh deh eena Jooda fi fain wahn neks plays fi liv. Wail ih mi-di chravl, ih en op da Maika hows weh deh eena di mongtin dehn eena Eefrayim chraib teritori.
9 Den Maika aks ahn: “Weh yoo kohn fram?” Soh hihn tel ahn: “Ai kohn fahn Betlihem weh deh eena Jooda an Ai da wahn Leevait, an Ah di chrai fain sohnweh fi liv.”
10 Soh Maika tel ahn: “Stay wid mee ahn bee mi advaiza* ahn mi prees. Ah wahn gi yu food, kloaz, ahn ten pees a silva fi di yaa.” Soh di Leevait gaan eena di hows.
11 Ahn di Leevait disaid fi stay, ahn Maika chreet ahn laik wan a ih oan son dehn.
12 Maika mi aalso put di Leevait fi serv az wahn prees, ahn hihn mi liv eena Maika hows.
13 Den Maika seh: “Now Ah noa dat Jehoava wahn bles mi, bikaaz mai prees da wahn Leevait.”
Futnoat
^ Si di Glasari, “Kers.”
^ Lit., “terafim aidol.” Si di Glasari, “Terafim.”
^ Lit., “faada.”
