Jojiz 2:1-23
2 Den Jehoava aynjel gaan op fahn Gilgal tu Boakim ahn seh: “Da mee bring unu fahn owta Eejip tu di lan weh Ah mi swayr fi giv unu ansesta dehn. Pahn tap a dat, Ah mi seh, ‘Ai wahn neva brok mi kovenant* wid unu.
2 Bot unu mosn mek wahn kovenant wid di peepl weh liv eena di lan an unu fi pul dong aala dehn alta.’ Bot unu neva lisn tu mi. Da wai unu neva obay mi?
3 Ahn dat da wai Ah mi seh, ‘Ai noh wahn jraiv dehn weh fahn fronta unu. Dehn wahn chrap unu, ahn dehn wahn chrik unu, ahn dehn wahn mek unu goh serv fi dehn gaadz.’”
4 Wen Jehoava aynjel tel di Izrelait dehn dat, dehn staat baal haad.
5 Soh dehn naym da plays Boakim,* ahn da rait deh dehn aafa sakrifais tu Jehoava.
6 Wen Jashwa sen di peepl dehn weh, eech wan a dehn gaahn da di lan weh dehn inherit fi tek it oava.
7 Di peepl mi kantinyu fi serv Jehoava aal chroo Jashwa laiftaim ahn joorin di laiftaim a di elda dehn weh mi liv langa dan Jashwa ahn weh mi si aala di gud tingz weh Jehoava mi du fi Izrel.
8 Den Non son Jashwa, hoo da-mi Jehoava servant, ded wen ih mi 110 yaaz oal.
9 Soh dehn beri ahn eena di teritori weh ih inherit da Timnat-heeres. Timnat-heeres mi deh tu di naat a Mongt Gayash eena di mongtin dehn da Eefrayim.
10 Evribadi fahn Jashwa taim mi ded, ahn di jenarayshan weh mi kom afta dehn neva noa Jehoava ner aal weh hihn mi du fi Izrel.
11 Soh di Izrelait dehn mi du weh bad eena Jehoava sait, ahn dehn mi wership* di Bayal aidol dehn.*
12 Soh dehn abandan Jehoava, di Gaad a dehn ansestaz, hoo mi bring dehn owta Eejip. Ahn dehn wership di gaad dehn a di peepl weh mi liv rong dehn, ahn bow dong tu dehndeh gaad ahn mek Jehoava beks bad.
13 Dehn abandan Jehoava ahn serv di Bayal an Ashtoret* aidol dehn.
14 Bikaaz a dat Jehoava geh beks bad wid di Izrelait dehn, soh hihn mek dehn enimi atak dehn ahn tek weh aala dehn bilanginz, ahn dehn kudn fait gens dehn enimi nohmoh.
15 Evriway wehpaat dehn gaan, Jehoava mi deh gens dehn, ahn hihn bring kalamiti pahn dehn. Dehn gaahn chroo lata sofarin, jos laik weh Jehoava mi seh ahn jos laik weh Jehoava mi swayr tu dehn.
16 Soh Jehoava apoint sohn joj fi sayv dehn fahn dehn enimiz.
17 Bot dehn eevn rifyooz fi lisn tu di joj dehn, ahn dehn mek dehnself laik prastichoot* tu di ada gaadz ahn bow dong tu dehn. Kwik-wan dehn stap fala dehn ansestaz hoo yoostu obay Jehoava komanment dehn. Dehn da neva laik dehn ansestaz ataal.
18 Weneva Jehoava wuda apoint wahn joj, Jehoava wuda help da joj aal chroo ih laiftaim fi sayv di Izrelait dehn fahn dehn enimiz, bikaaz Jehoava mi feel sari fi dehn wen ih hyaa dehn di krai owt kaaz a weh peepl mi chreet dehn kruwil.
19 Bot wen di joj ded, dehn wuda staat goh aan wers dan dehn ansestaz, kaaz dehn wuda goh bow dong tu ada gaadz ahn wership dehn. Dehn neva chaynj dehn wikid wayz ner dehn stoban atichood.
20 Soh Jehoava geh beks bad wid di Izrelait dehn, an ih seh: “Bikaaz dis nayshan neva shoa no rispek fi di kovenant weh Ah koman dehn ansestaz fi kip, ahn dehn neva lisn tu mi,
21 Ai noh wahn jraiv weh nat eevn wan a di nayshan dehn weh Jashwa neva kanka bifoa ih ded.
22 Dis da fi tes weda er nat Izrel wahn fala Jehoava standadz ahn kantinyu fala dehn jos laik how dehn ansestaz mi du.”
23 Soh Jehoava alow dehnya nayshanz fi stay eena di lan. Ih neva jraiv dehn owt rait away, an ih neva mek Jashwa kanka dehn.
Futnoat
^ Si di Glasari, “Kovenant.”
^ Dis naym meenz “Peepl Weh Baal.”
^ Er “serv.”
^ Si di Glasari, “Bayal.”
^ Si di Glasari, “Ashtoret.”
^ Si di Glasari, “Prastichoot.”
