Jojiz 6:1-40
6 Bot agen di Izrelait dehn du weh bad eena Jehoava sait, soh Jehoava gi dehn oava tu di Midyanait dehn fi sevn yaaz.
2 Di Midyanait dehn staat tu tek kanchroal oava Izrel, soh di Izrelait dehn gaahn haid eena di mongtin dehn, eena kayv, an eena ada plays weh haad fi reech.
3 Evritaim di Izrelait dehn wuda plaant seed, di Midyanait dehn, di Amalekait dehn, ahn di peepl fahn di ees wuda atak dehn.
4 Dehn wuda set op kyamp pahn dehn teritori fi atak dehn, ahn dehn wuda dischrai dehn kraps aal di way op tu Gaza. Dehn neva lef notn fi mek di Izrelait dehn eet, ahn dehn neva lef no sheep, no bul, ahn no dongki eeda.
5 Laik wahn swaam a loakos, dehn kohn wid aala dehn animal ahn tent. Da mi soh moch a dehn wid dehn kyamil, dat yu kudn eevn konk dehn. Dehn kohn ahn jos dischrai di lan.
6 Soh di Izrelait dehn mi poa bad bikaaz a di Midyanait dehn, ahn soh dehn aks Jehoava fi help.
7 Wen di Izrelait dehn aks Jehoava fi help sayka di Midyanait dehn,
8 Jehoava sen wahn prafit tu di Izrelait dehn, ahn di prafit tel dehn: “Dis da weh Jehoava di Gaad a Izrel seh, ‘Ai mi bring unu fahn owta Eejip, fahn di lan weh unu da-mi slayv.
9 Soh Ah sayv unu fahn Eejip an enibadi els weh chreet unu kruwil. Ah jraiv unu enimi dehn owt fahn fronta unu ahn giv unu dehn lan.
10 An Ah tel unu: “Unu weh liv eena di lan weh bilangz tu di Amorait dehn, unu noh fi wership dehn gaadz. Ai da Jehoava unu Gaad.” Bot unu neva obay mi.’”*
11 Laytaraan, Jehoava aynjel kohn ahn sidong anda di big chree da Ofra, weh da fi Joawash, hoo da wan a Abi-eezer disendant. Fi hihn son Gidiyan mi-di beet owt weet eena di plays wehpaat dehn mash grayps fi mek wain soh dat ih ku haid it fahn di Midyanait dehn.
12 Jehoava aynjel apyaa tu ahn an tel ahn: “Yoo da wahn brayv ahn schrang soalja, ahn Jehoava deh wid yu.”
13 Den Gidiyan tel ahn: “Sari, mi laad, bot if Jehoava deh wid wi, den wai aala dis di hapm tu wi? Weh hapm tu aala di wandaful tingz weh wi pa tel wi bowt? Fi wee pa tel wi, ‘Da Jehoava bring wi owt fahn Eejip.’ Bot now Jehoava abandan wi ahn han wi oava tu di Midyanait dehn.”
14 Den Jehoava ton tu ahn an seh: “Yooz di schrent weh yu gat fi sayv Izrel fahn di Midyanait dehn, kaaz da mee di sen yu.”
15 Gidiyan ansa ahn: “Pleez, Jehoava, how Ai ku sayv Izrel? Luk pahn mi! Mai peepl* da di lees impoatant eena Manaaseh chraib, an Ai da di lees impoatant persn eena mi pa hows.”
16 Bot Jehoava tel ahn: “Bikaaz Ai wahn deh wid yu, yu wahn kanka di Midyanait dehn laik if dehn da-mi onli wan man.”
17 Den Gidiyan tel ahn: “If yu hapi wid mi, den shoa mi wahn sain dat yoo da di wan weh di taak tu mi.
18 Pleez stay ya til Ah kohn bak wid wahn gif ahn set it fronta yu.” Soh ih tel Gidiyan: “Ah wahn stay ya til yu kohn bak.”
19 Ahn Gidiyan gaan ahn kuk op wahn yong goat ahn mek sohn bred widowt ees fahn owta bowt 24 pong* a flowa. Ih put di meet eena wahn baaskit ahn di soop fahn di meet eena wahn pat, ahn den ih kehr dehn owt tu di aynjel ahn serv it tu ahn anda di big chree.
20 Di aynjel a di chroo Gaad tel ahn: “Tek di meet ahn di bred weh noh ga ees ahn put dehn rait dehsoh pahn da big rak, den poar owt di soop pahn di meet.” Ahn soh dat da weh ih du.
21 Den Jehoava aynjel toch di meet ahn di bred weh noh ga ees wid di en a di rad weh ih mi gat eena ih han, ahn faiya blayz op fahn di rak an eet op di meet ahn di bred weh noh ga ees til notn lef. Den Jehoava aynjel disapyaa fahn fronta ahn.
22 Ahn da til den Gidiyan kanshos dat da mi Jehoava aynjel.
Soh rait away Gidiyan seh: “Da weh wahn hapm tu mi now, Moas Hai Laad Jehoava? Ai don si Jehoava aynjel fays-tu-fays!”
23 Bot Jehoava tel ahn: “Kaam dong. Noh frayd; yu noh wahn ded.”
24 Soh Gidiyan bil wahn alta rait deh fi Jehoava, ahn dehn kaal it Jehoava-shaylom* dong tu dis day. Ih stil deh da Ofra, weh da fi Abi-eezer disendant dehn.
25 Da nait, Jehoava tel ahn: “Tek di yong bul weh bilangz tu yu pa, di sekant wan weh sevn yaaz oal, ahn tayr dong di alta fi Bayal weh bilangz tu yu pa, ahn chap dong di Ashera poas* saida it.
26 Bil wahn alta fi yu Gaad Jehoava pahn tap a dis sayf plays ahn lain op di stoan dehn eena wahn roa. Den tek di sekant yong bul ahn yooz di wud fahn di Ashera poas weh yu chap dong fi aafa it az wahn bon aafrin.”*
27 Soh Gidiyan kehr ten a ih mayl servant dehn lang wid ahn an du egzakli weh Jehoava tel ahn fi du. Bot ih neva gaahn joorin di day, bikaaz ih mi frayd fi ih pa famili ahn di man dehn eena di siti, soh ih gaahn du it da nait.
28 Wen di man dehn fahn di siti get op erli di neks maanin, dehn si dat sombadi mi tayr dong Bayal alta ahn chap dong di Ashera poas saida it, ahn dehn bil wahn nada alta an aafa di sekant yong bul pan it.
29 Dehn aks wan anada: “Da hoo du dis?” Den dehn gaahn aks rong, an afta dat dehn seh: “Da Joawash son Gidiyan du dis.”
30 Soh di man dehn fahn di siti tel Joawash: “Bring owt yu son mek wi kil ahn, kaaz ih tayr dong di alta fi Bayal, an ih chap dong di Ashera poas weh mi deh saida it.”
31 Den Joawash tel dehn wan weh mi-di kom aata ahn: “Da unu haftu difen Bayal? Da unu haftu sayv ahn? Bifoa di maanin don tudeh, kil enibadi weh di difen Bayal. If Bayal da wahn gaad fi chroo, mek ih difen ihself, sins da fi hihn alta dehn pul dong.”
32 Ahn Joawash staat kaal Gidiyan Jerobayal* pahn da day, kaaz ih seh: “Mek Bayal difen ihself, kaaz sombadi tayr dong fi hihn alta.”
33 Aala di Midyanait ahn di Amalekait dehn lang wid dehn wan fahn di ees kohn tugeda ahn kraas di riva da Jezriyel Vali* ahn set op kyamp deh.
34 Den Jehoava spirit kohn pahn Gidiyan, an ih bloa di haan, an Abi-eezer disendant dehn gyada bihain ahn.
35 An ih sen mesij tu di res a Manaaseh chraib, ahn dehn kohn tugeda fi sopoat ahn tu. An ih aalso sen mesij tu Asher chraib, Zebyulon chraib, ahn Naftalai chraib, ahn dehn kohn fi sopoat ahn tu.
36 Den Gidiyan tel di chroo Gaad: “If yu di yooz mee fi sayv Izrel, jos laik weh yu mi pramis,
37 Ah di put sohn sheep wul dong ya pahn di grong wehpaat dehn beet owt grayn. If joo jrap onli pahn di wul bot aal di grong rong it jrai, den Ah wahn noa dat yu wahn yooz mee fi sayv Izrel, jos laik weh yu pramis.”
38 Ahn dat da weh hapm. Wen ih get op erli di neks day, ih skweez owt di sheep wul, an inof waata kom owt fi ful op wahn big bowl.
39 Bot Gidiyan tel di chroo Gaad: “Pleez noh geh beks wid mi, bot mek Ah aks yu jos wan moa ting. Pleez mek Ah du jos wan moa tes wid di wul. Pleez mek onli di wul stay jrai ahn mek joo jrap aal oava di grong rong it.”
40 Soh da nait, dat da weh Gaad mi du; onli di wul mi jrai, bot joo mi deh aal oava di grong.
Futnoat
^ Lit., “lisn tu mi vais.”
^ Lit., “towzn.”
^ Er “fahn wahn eefa.” Si Apendiks B14.
^ Dis naym meenz “Jehoava Da Pees.”
^ Si di Glasari, “Ashera poas.”
^ Si di Glasari, “Bon aafrin.”
^ Dis naym meenz “Mek Bayal Difen Ihself Akaadn tu di Laa.”
^ Er “di loa lan a Jezriyel.”
