Jojiz 7:1-25
7 Den Jerobayal, weh aalso naym Gidiyan, an aal di peepl lang wid ahn get op erli ahn set op kyamp da Hayrod Spring, wail di Midiyanait dehn set op kyamp naat a weh hihn mi deh da Moareh Hil eena di vali.*
2 Jehoava tel Gidiyan: “Da tu moch peepl deh wid yu fi mek Ah gi yu vikchri oava Midiyan. Sayka dat, Izrel mait tel mi, ‘Wee sayv wiself wid fi wee oan schrent.’
3 Now pleez, anonks fronta evribadi: ‘Hooeva frayd ahn di chrimbl, mek dehn goh bak hoam.’” Soh Gidiyan tes dehn, ahn 22,000 a di peepl gaahn bak hoam, ahn 10,000 stay.
4 Bot Jehoava tel Gidiyan: “Da stil tu moch peepl deh wid yu. Mek dehn goh dong da di spring soh dat Ah ku tes dehn fi yu deh. Wen Ah tel yu, ‘Dis wan gwehn wid yu,’ hihn wahn goh wid yu, bot wen Ah tel yu, ‘Dis wan noh gwehn lang wid yu,’ hihn noh wahn goh lang wid yu.”
5 Soh Gidiyan kehr di peepl dong da di spring.
Den Jehoava tel Gidiyan: “Separayt evribadi weh pik op di waata wid dehn han ahn jrink it di way how wahn daag jrink waata, fahn dehn wan weh get dong pahn dehn nee ahn ben dong fi jrink di waata.”
6 Di amonk a man weh mi-di jrink op di waata fahn dehn han da-mi 300. Di res a di peepl mi-di get dong pahn dehn nee ahn ben dong fi jrink di waata.
7 Jehoava tel Gidiyan: “Ah wahn sayv yu wid di 300 man weh mi jrink waata fahn dehn han, an Ah wahn gi yu vikchri oava Midiyan. Bot mek aal di ada peepl goh bak hoam.”
8 Soh afta dehn tek di haan dehn ahn di food fahn di peepl, ih sen aala di ada Izrelait man dehn bak hoam, an ih onli kip di 300 man. Di Midiyanait kyamp mi deh dong eena di vali.
9 Da nait, Jehoava tel ahn: “Get op, atak di kyamp, bikaaz Ai wahn mek yu win di fait.
10 Bot if yu frayd fi atak, kehr yu helpa Poora wid yu ahn goh da di kyamp.
11 Lisn tu weh dehn di seh, an afta dat yu wahn ga korij fi atak dehn kyamp.” Soh hihn an ih helpa Poora gaahn kloas tu di enimi kyamp.
12 Now di Midiyanait dehn, di Amalekait dehn, ahn di peepl fahn di ees mi kova di vali laik wahn swaam a loakos, ahn da mi soh moch kyamil dat dehn da-mi laik di san pahn di seesaid; yu kudn eevn konk dehn.
13 Now Gidiyan reech dehn kyamp, ahn wahn man mi dehdeh weh mi-di tel wahn neks man bowt wahn jreem weh ih mi gat. Ih seh: “Lisn tu dis jreem weh Ah mi gat. Wahn rong loaf a bred* mi roal intu di Midiyanait kyamp. Ih bok op intu wahn tent ahn nak it soh haad dat di tent jrap. Seeryos, di tent ton oava an ih jrap flat pahn di grong.”
14 Soh di neks man seh: “Wel dis ku onli stan fi di soad weh bilangz tu Joawash son Gidiyan, di man fahn Izrel. Gaad wahn mek ih kanka Midiyan an aala di soalja dehn eena dis kyamp.”
15 Az soon az Gidiyan hyaa di jreem ahn weh ih meen, ih bow dong fi wership Gaad. Afta dat ih gaahn bak da di Izrelait kyamp ahn tel dehn: “Get op, kaaz Jehoava gi wi vikchri oava di Midiyanait soalja dehn.”
16 Den ih divaid op di 300 man intu chree groop, an ih gi eech wan a dehn wahn haan ahn wahn big emti klay pat wid wahn taach eensaida di pat.
17 Den ih tel dehn: “Unu wach mi ahn du egzakli weh Ai du. Wen Ah geh kloas tu di kyamp, unu mos du egzakli weh Ai du.
18 Wen mee an evribadi weh deh wid mi bloa wi haan, unu mos bloa unu haan aal rong di kyamp tu, ahn hala, ‘Fi Jehoava ahn fi Gidiyan!’”
19 Gidiyan ahn di 100 man weh mi deh wid ahn gaahn kloas tu di kyamp bifoa midnait, rait afta di wachman shif chaynj. Dehn bloa dehn haan ahn brok op dehn klay pat weh mi deh eena dehn han.
20 Soh di chree groop bloa dehn haan ahn brok op dehn big klay pat. Dehn mi hoal dehn taach eena dehn lef han ahn bloa dehn haan weh mi deh eena dehn rait han ahn dehn hala owt: “Di soad da fi Jehoava ahn Gidiyan!”
21 Ahn di hoal wail, aala di man dehn stan op eena dehn spat aal rong di kyamp, ahn di hoal Midiyanait aami staat tu ron ahn hala.
22 Di 300 man dehn kantinyu bloa dehn haan, ahn Jehoava mek di Midiyanait dehn ton dehn soad gens wan anada aal chroo di kyamp, ahn di aami kantinyu ron weh az faar az Bet-shita, den dehn gaahn da Zerera, ahn den az faar az di ej a Aybl-mehoala weh deh kloas tu Tabat.
23 Den Gidiyan kaal tugeda aala di Izrelait man dehn fahn Naftalai chraib, Asher chraib, ahn Manaaseh chraib, ahn dehn chays di Midiyanait dehn.
24 Gidiyan sen mesij aal chroo di mongtin dehn da Eefrayim teritori, di tel di peepl: “Unu goh dong goh atak Midiyan aami, ahn goh heda dehn da Bet-bara ahn di Jaadn Riva ahn put sohn man fi gyaad deh ahn stap dehn fahn kraas di riva.” Soh aala di man dehn fahn Eefrayim chraib gyada tugeda ahn dehn gaahn hed da Bet-bara ahn di Jaadn Riva fi stap dehn fahn kraas.
25 Ahn dehn kyapcha Oareb ahn Zeeyeb, di too Midiyanait prins. Dehn kil Oareb pahn wahn rak ahn den naym di rak Oareb. Ahn dehn kil Zeeyeb da di plays wehpaat dehn mash grayps fi mek wain ahn dehn naym di plays Zeeyeb. Dehn mi kip aan di chays di Midiyanait dehn, ahn dehn kehr Oareb ahn Zeeyeb hed fi Gidiyan kloas tu di Jaadn Riva.
