Jojiz 8:1-35
8 Den di man dehn fahn Eefrayim chraib tel ahn: “Wai yu gaahn du wi dat fa? Wai yu neva kaal wi wen yu gaahn fait gens di Midiyanait aami?” Ahn dehn staat tu kwaaril wid ahn.
2 Bot hihn tel dehn: “Weh Ai du kyaahn eevn kompyaa tu aal weh unu du. Eevn di lefoavaz fahn Eefrayim haavis beta dan di hoal grayp haavis fahn Abi-eezer.
3 Gaad mek unu kanka Midiyan prins dehn, Oareb ahn Zeeyeb, rait? Soh weh Ai du kyaahn kompyaa tu weh unu du.” Wen ih taak tu dehn laik dat, dehn kaam rait dong.
4 Den Gidiyan reech di Jaadn ahn kraas it. Hihn ahn di 300 man weh mi deh wid ahn mi taiyad, bot dehn kip aan di chays dehn enimi.
5 Soh ih tel di man dehn weh liv da Sokot: “Pleez gi di peepl weh di fala mi sohn loaf a bred, kaaz dehn taiyad ahn wi di chays afta di Midiyanait king dehn, Zeeba ahn Zalmona.”
6 Bot di cheef dehn da Sokot tel ahn: “Da wai wee haftu gi bred tu yu aami? Unu don kyapcha Zeeba ahn Zalmona, den?”
7 Soh Gidiyan tel dehn: “Jos fi dat, wen Jehoava help mi kyapcha Zeeba ahn Zalmona, Ah wahn beet unu wid prikl bush fahn di wildanes.”*
8 Den ih lef fahn deh ahn gaahn aks di man dehn fahn Penoowel fi bred tu, bot di man dehn fahn Penoowel tel ahn di saym ting weh di man dehn fahn Sokot tel ahn.
9 Soh den ih tel di man dehn weh liv da Penoowel: “Afta wi win di fait, Ai wahn kohn bak ahn haal dong disya towa.”
10 Now Zeeba ahn Zalmona mi deh da Karkor wid dehn aami. Da mi onli bowt 15,000 man weh stil mi dehdeh owta di hoal aami a di peepl fahn di ees, kaaz 120,000 soalja mi ded.
11 Gidiyan kantinyu op di road weh goh tu di ees a Noaba ahn Jogbeha; di peepl weh liv eena tent yooz da road deh. Ahn hihn atak di enimi dehn kyamp wen dehn neva ekspek it.
12 Wen di too Midiyanait king Zeeba ahn Zalmona ron weh, ih chays dehn dong ahn kech di too a dehn, ahn den di hoal kyamp staat tu panik.
13 Den Joawash son Gidiyan kohn bak fahn di waar chroo di lee road weh goh op da Heeres.
14 Pahn di way ih kyapcha wahn yong man fahn Sokot ahn staat tu kweschan ahn. Soh di yong man rait dong di naym a di prins an elda dehn da Sokot, an in aal da mi 77 man.
15 Soh den Gidiyan gaahn taak tu di man dehn da Sokot ahn tel dehn: “Si Zeeba ahn Zalmona ya. Memba wen unu mak mi ahn tel mi, ‘Da wai wee haftu gi bred tu yu aami? Unu don kyapcha Zeeba ahn Zalmona, den?’”
16 Den ih kehr di elda dehn fahn Sokot ahn beet dehn wid prikl bush fahn di wildanes ahn teech dehn wahn lesn.
17 An ih gaahn tayr dong Penoowel Towa ahn kil di man dehn fahn da siti.
18 Ih aks Zeeba ahn Zalmona: “Weh kaina man unu mi kil da Taybor?” Dehn ansa: “Dehn da-mi laik yoo, eech wan a dehn mi luk laik wahn king son.”
19 Den ih seh: “Dehn da-mi mai breda; aala wi ga di saym ma. Ah swayr eena di naym a di livin Gaad Jehoava dat if unu mi spayr fi dehn laif, Ah neva mi wahn haftu kil unu.”
20 Den ih tel ih fersbaan son Jeeter: “Get op ahn kil dehn.” Bot di yong man neva haal ih soad; ih mi frayd kaaz ih mi yong yet.
21 Soh Zeeba ahn Zalmona seh: “If yoo da man, get op ahn kil wi yuself.” Soh Gidiyan get op ahn kil Zeeba ahn Zalmona, an ih tek di medal weh shayp laik wahn moon fahn rong di nek a dehn kyamil.
22 Laytaraan, di Izrelait man dehn tel Gidiyan: “Rool oava wi, yoo ahn yu son ahn yu granson tu, kaaz yu sayv wi fahn di Midiyanait dehn.”
23 Bot Gidiyan tel dehn: “Ai noh wahn rool oava unu, ahn mi son noh wahn rool oava unu needa. Jehoava da di wan weh wahn rool oava unu.”
24 Den Gidiyan tel dehn: “Mek Ah jos aks unu fi wan ting: mek eech wan a unu gi mi wahn noaz ring fahn owta di tingz weh unu tek fahn unu enimi.” (Dehn enimi mi ga goal noaz ring bikaaz dehn da-mi Ishmaiyel disendant dehn.)
25 Dehn ansa: “Yes man, af koars wi wahn gi yu.” Soh dehn spred owt wahn roab, an eech man tek wahn noaz ring fahn owta di tingz weh dehn tek fahn dehn enimi ahn chroa it pahn di roab.
26 An aala di goal noaz ring weh ih mi aks fa mi way 45 pong,* ahn dat da widowt aala di medal weh shayp laik moon, di ayz ring, di perpl wul roab weh di Midiyanait king dehn yoostu wayr, ahn di neklis fahn di kyamil dehn.
27 Gidiyan tek da goal ahn yooz it fi mek wahn efod, ahn kehr it da ih siti Ofra, ahn put it sohnweh wehpaat evribadi ku see’t, an aala di Izrelait dehn ton dehnself intu spirichwal prastichoot ahn staat wership it deh. Ahn dat mi en op di bee wahn chrap fi Gidiyan an ih famili.
28 Soh di Izrelait dehn kanka di Midiyanait dehn, ahn dehn neva chalenj dehn* agen. Ahn di Izrelait dehn mi liv eena pees fi 40 yaaz joorin Gidiyan dayz.
29 Soh Joawash son Jerobayal gaahn bak hoam ahn stay deh.
30 Gidiyan mi ga 70 son kaaz ih mi ga lata waif.
31 Ih mi aalso ga wahn son wid ih ada waif weh mi liv da Sheekem, an ih naym ahn Abimelek.
32 Ahn Joawash son Gidiyan ded oal ahn hapi, ahn dehn beri ahn eena di saym toom weh dehn beri ih pa Joawash da Ofra, weh bilangz tu di Abi-ezrait dehn.
33 Az soon az Gidiyan ded, di Izrelait dehn mek dehnself laik spirichwal prastichoot tu di Bayal gaad dehn,* ahn dehn pik Bayal-beerit fi bee dehn gaad.
34 Di Izrelait dehn ferget bowt dehn Gaad Jehoava, hoo mi reskyu dehn fahn aala dehn enimi weh mi deh rong dehn.
35 Ahn wid aal di gud weh Jerobayal, er Gidiyan, mi du fi Izrel, dehn stil neva laayal tu fi hihn famili.
Futnoat
^ Si di Glasari, “Wildanes.”
^ Lit., “1,700 goal shekl.” Wahn shekl mi way 11.4 gramz. Si Apendiks B14.
^ Lit., “neva lif op dehn hed.”
^ Si di Glasari, “Bayal.”
