Koloashanz 3:1-25
3 Bot if Gaad giv unu laif lang wid Krais, den kantinyu fi werk haad fi di tingz weh deh da hevn, wehpaat di Krais di sidong pahn di rait han said a Gaad.
2 Kip yu main set pahn di tingz da hevn, noh pahn di tingz weh deh pahn di ert.
3 Kaaz unu ded, bot unu laif deh eena di han dehn a di Krais, di wan weh yoonaitid wid Gaad.
4 Wen di Krais apyaa, di wan hoo gi laif, unu wahn apyaa lang wid hihn tu, ahn shayr eena fi hihn gloari.
5 Soh den, kil eni rang dizaiyaz weh unu gat eena unu badi soh dat unu noh en op di du sohnting sekshwali imoaral* er sohnting doti. Noh mek di dizaiya fi ga seks kanchroal unu, noh du bad tingz, ahn noh bee greedi, kaaz if unu greedi da jos laik if unu di wership aidol.
6 Ahn Gaad wahn shoa ih anga gens enibadi weh du dehnya tingz.
7 Unu yoostu praktis tingz laik dehndeh.
8 Bot now, unu need fi geh rid a aala dehndeh tingz, ahn raat an anga tu. Unu noh fi du wikid tingz, unu noh fi insolt op wan anada, an unu noh fi taak bowt tingz weh doti.
9 Noh lai tu wan anada. Ahn jos laik how unu tek aaf doti kloaz, geh rid a di oal persn* weh unu yoostu bee ahn di tingz weh unu yoostu du eena di paas.
10 Ahn jos laik how unu put aan kleen kloaz, put aan di nyoo persn* weh Gaad gi wi wen wi geh fi noa hihn beta. Kaaz da den wi wahn chaynj fi wee wayz ahn shoa di saym wayz laik Gaad.
11 Ahn wid dis nyoo persn, evribadi eekwal. Ih noh mata hoo da Greek, er hoo da Joo, er hoo serkomsaiz fahn hoo noh serkomsaiz, er hoo da wahn farina, er hoo da wahn Sitiyan,* er hoo da wahn slayv, er hoo free, kaaz Krais involv eena evriting, ahn wee deh anda hihn.
12 Now, unu da di wan dehn weh Gaad pik, di wan dehn weh hoali ahn weh ih lov. Soh den, unu mos shoa tenda afekshan, kompashan, ahn kainis tuwaadz wan anada. An unu mos bee hombl, an unu mos kip pees wid wan anada, an unu mos bee payshent wid wan anada.
13 Kantinyu fi put op wid wan anada ahn fergiv wan anada wid aala unu haat, eevn if sombadi du sohnting fi hert unu. Jos laik how Jehoava fergiv unu wid aala fi hihn haat, unu mos fergiv wan anada di saym way.
14 Pahn tap a dat, jres op unuself wid lov, kaaz lov bring peepl tugeda eena wahn perfek way.
15 Aalso, unu mos mek di pees weh kohn fahn di Krais kanchroal unu haat, kaaz Gaad mi kaal unu soh dat unu ku bee wan badi ahn ga dis pees. An unu mos aalwayz shoa wahn tankful atichood.
16 Mek di teechinz a di Krais ful op unu haat. Da way deh, unu wahn bee waiz. Unu mos kip aan di teech an inkorij wan anada wid di saam dehn, wid prayz tu Gaad, wid sangz fi wership, ahn sangz fi shoa tanks, an unu mos sing tu Jehoava wid aala unu haat.*
17 Wateva unu du er seh, unu mos du it eena di naym a wi Laad Jeezas, an unu mos gi tanks tu Gaad di Faada chroo hihn.
18 Unu sistaz weh marid, unu mos put unuself anda di atariti a unu hozban. Dis da weh wahn uman hoo da wahn falowa a Krais fi du.
19 Unu bradaz weh marid, unu mos kip aan di lov unu waif ahn noh geh beks wid dehn.*
20 Unu chiljren, unu mos aalwayz bee obeedyant tu unu payrents, kaaz wen unu du dat, di Laad wahn pleez wid unu.
21 Unu bradaz weh ga chiljren, unu noh fi provoak unu chiljren, kaaz dehn wahn geh sad.*
22 Unu slayv, unu mos aalwayz bee obeedyant tu unu maasta dehn weh deh ya pahn di ert, noh onli wen dehn di wach unu, jos bikaaz unu waahn pleez dehn, bot insted, unu mos obay dehn wid wahn sinsyaa haat an owta rispek fi Jehoava.*
23 Eniting weh unu du, du it wid aala unu haat,* laik if unu di du it fi Jehoava ahn noh fi peepl,
24 kaaz unu noa dat unu wahn get unu riwaad fahn Jehoava, ahn da hihn di sayv da riwaad fi unu. Soh den, slayv fi Krais, unu Maasta.
25 Bot di persn weh du rang wahn definaytli geh ponish bikaaz a di rang weh ih du. Gaad wahn joj evribadi ahn hihn noh wahn shoa fayvritizm.
Futnoat
^ Di Greek werd da por·neiʹa. Si di Glasari, “Sekshwal imoraliti.”
^ Lit., “oal man.” Dis di rifaa tu di oal persn wi yoostu bee.
^ Er “di nyoo persn wi kohn fi bee.”
^ “Sitiyan” di rifaa tu peepl weh adaz luk dong pan bikaaz a di way how dehn bihayv.
^ Er “eena unu haat.”
^ Er “noh chreet dehn eena wahn rof way.”
^ Er “geh diskorij.”
^ Er “wid wahn sinsyaa haat ahn wahn fyaa a Jehoava.”
^ Si di Glasari, “Soal.”
