Koloashanz 4:1-18
4 Unu bradaz weh ga slayv di werk fi unu, unu mos chreet unu slayv dehn eena wahn raichos ahn fyaa way, kaaz unu noa dat unu ga wahn Maasta da hevn tu.
2 Unu mos pray aal di taim ahn noh giv op; neva ferget fi pray, ahn gi tanks tu Gaad.
3 Ahn pray fi wee tu, soh dat Gaad ku help wi fi fain wahn way fi preech di werd ahn fi taak bowt di hoali seekrit* bowt di Krais. Kaaz dis da di saym reezn wai Ah deh chayn op da prizn.
4 Yes, pray fi mi soh dat Ah ku preech ahn taak bowt it di way Ah shud.
5 Unu mos kantinyu fi bee waiz eena di way how unu liv unu laif wen unu deh rong peepl hoo da noh paat a di kangrigayshan, ahn yooz unu taim* fi du di tingz weh moa impoatant.
6 Jos laik how saalt mek food tays gud, unu fi seezn unu werdz wid kainis fi mek dehn tays gud tu. Eena da way, unu wahn noa how fi gi wahn ansa tu eech persn.
7 Mi brada Tikikos, weh Ah onli lov, wahn tel unu evriting weh hapm tu mi; hihn da aalso wahn faytful slayv fi di Laad jos laik wee.
8 Ah di sen ahn tu unu soh dat unu ku noa how wi di du, ahn soh dat ih ku komfert unu haat.
9 Ah di sen Onesimos lang wid ahn tu; hihn da mi faytful brada weh Ah onli lov, ahn hihn yoostu dehdeh wid unu; di too a dehn wahn tel unu bowt evriting weh di hapm oava ya.
10 Wi brada Aristarkos, weh da wahn prizna laik miself, sen heloa fi unu. Ahn Maak, Baarnabas kozn, sen heloa fi unu tu (dis da di saym Maak weh Ah mi tel unu fi welkom if ih kohn vizit unu),
11 ahn Jeezas, weh dehn kaal Jostos, sen heloa tu. Dehnya bradaz da Jooz* ahn dehn da di onli wan dehn weh mi werk lang wid mi fi preech bowt di Kingdom a Gaad, ahn dehnya saym bradaz mi reeli gi mi lata komfert.*
12 Wi brada Epafras, hoo da wahn slayv fi Krais ahn weh yoostu deh lang wid unu, aalso sen heloa. Hihn aalwayz di pray fi unu soh dat unu ku bee machoar bradaz ahn ga schrang bileef eena evriting weh ga fi du wid di wil a Gaad.
13 Ai persnali si how haad hihn werk fi unu ahn fi di bradaz da Layodiseeya ahn Hirapolis.
14 Aalso, Look, wi brada ahn dakta weh wi onli lov, sen heloa, ahn wi brada Deemas tu.
15 Pleez tel di bradaz da Layodiseeya ahn sista Nimfa ahn di kangrigayshan weh meet da fi shee hows heloa fi mi.
16 Ahn wen unu don reed dis leta, sen it tu di kangrigayshan da Layodiseeya soh dat dehn ku reed it tu, an aks dehn fi di leta weh Ah mi sen tu dehn soh dat unu ku reed it monks unuself.
17 Ahn pleez tel Arkipos dis fi mi: “Werk haad eena di minischri weh yu mi aksep fahn di Laad, soh dat yu ku finish weh ih tel yu fi du.”
18 Dis da mee, Paal, an Ai di rait dis greetin wid mi oan han. Ahn pleez noh ferget dat Ah stil deh ya chayn op da prizn. Ah pray dat di grayt kainis* a Gaad deh wid unu.
Futnoat
^ Er “saykrid seekrit.” Si di Glasari, “Hoali seekrit.”
^ Lit., “ahn bai owt di taim.”
^ Er “Dehnya bradaz mi geh serkomsaiz.”
^ Er “mi reeli schrentn mi.”
^ Si di Glasari, “Grayt kainis.”
