Look 11:1-54
11 Wahn day, afta Jeezas mi finish pray, wan a ih disaipl dehn tel ahn: “Laad, teech wi how fi pray; teech wi jos laik how Jan mi teech ih disaipl dehn.”
2 Soh hihn tel dehn: “Weneva unu pray, seh: ‘Faada, wi waahn yu naym bee hoali.* Wi waahn yu Kingdom kom.
3 Pleez gi wi di food* weh wi need fi tudeh.
4 Ahn fergiv wi fi wi sin dehn, di saym way wee fergiv ada peepl weh sin gens wi;* ahn pleez help wi fi noh giv een tu temtayshan.’”
5 Den Jeezas tel dehn: “Sopoaz wan a unu ga wahn fren, an unu goh tu ahn eena di midl a di nait ahn tel ahn, ‘Mi fren, pleez gi mi chree bred noh,
6 kaaz wan a mi fren dehn jos kohn da mi hows fahn wahn lang jerni, an Ah noh gat notn fi aafa ahn.’
7 Bot fahn eensaida di hows hihn tel ahn: ‘Stap bada mi man. Ah don lak op mi doa, ahn mee ahn mi pikni dehn don deh eena bed. Ah kyaahn get op ahn gi yu eniting rait now.’
8 Ah di tel unu, eena di en, ih wahn get op ahn giv ahn wateva ih need, noh bikaaz dehn da fren, bot bikaaz hihn mi kip aan di bayg.
9 Soh, unu mos kip aan di aks, an unu wahn geh weh unu di aks fa; kip aan di saach, an unu wahn fain weh unu di saach fa; kip aan di nak, ahn di doa wahn oapm fi unu.
10 Kaaz evribadi weh aks wahn get, an evribadi weh saach wahn fain, an evribadi weh nak pahn di doa, ih wahn oapm fi dehn.
11 Tink bowt it, wich pa monks unu wuda giv ih son wahn snayk if ih aks ahn fi wahn fish?
12 Er if ih aks ahn fi wahn eg, yu tink ih wuda giv ahn wahn skyaapyan?
13 Soh if unu weh wikid noa how fi gi gud gif tu unu chiljren, den fi shoar unu Faada da hevn wahn gi hoali spirit tu di wan dehn weh di aks ahn far it!”
14 Layta, Jeezas mi jraiv owt wahn deemon fahn wahn man. Bikaaz a di deemon, di man kudn taak. Afta di deemon kom owta di man, ih kuda mi taak, ahn di peepl kudn bileev it.
15 Bot som peepl seh: “Hihn geh di powa fi jraiv owt deemonz fahn Biyelzibob,* di roola a di deemon dehn.”
16 Ahn sohn ada wan mi-di aks ahn fi shoa dehn wahn sain fahn hevn fi chrai tes ahn.
17 Jeezas mi noa weh dehn mi-di tink, soh ih tel dehn: “Wahn kingdom weh di fait gens ihself noh wahn mek it, an if wahn famili di fait gens ihself, dehn wahn faal apaat.
18 Saym way, if Saytan di fait gens ihself, yu tink ih kingdom wahn mek it? Bikaaz da unu di seh dat Ai geh powa fahn Biyelzibob fi jraiv owt di deemonz.
19 If da Biyelzibob di gi mee di powa fi jraiv owt deemonz, den da hoo di gi fi unu disaipl dehn di powa fi jraiv owt di deemonz? Dat da wai fi unu oan disaipl dehn wahn joj unu.
20 Bot if da Gaad gi mee di powa fi jraiv owt deemonz, den di Kingdom a Gaad deh ya an unu noh eevn noa it.
21 Wen wahn schrang man wid aala ih wepan dehn di gyaad ih palis, evriting weh ih oan wahn stay sayf.
22 Bot wen sombadi weh schranga dan hihn kohn gens ahn an kanka ahn, ih wahn tek weh aala ih wepan dehn weh ih mi-di chros eena, an ih wahn shayr owt aala di tingz weh hihn oan.
23 Hooeva noh deh pahn mai said deh gens mi, ahn hooeva noh di gyada peepl wid mi di skyata dehn.
24 “Wen wahn deemon kom owta wahn man, di deemon paas chroo difrent dezert di saach fi wahn plays fi res, bot wen ih kyaahn fain non, ih seh, ‘Ah gwehn bak da mi hows weh Ah mi lef.’
25 Wen ih get deh, ih fain di hows kleen ahn wel fiks op.
26 Den di deemon goh ahn fain sevn moa spirit weh moa wikid dan hihn. Wen dehn get eena di hows, dehn liv deh. Soh den, di man en op eena wahn sichuwayshan weh wers dan di wan bifoa.”
27 Now az Jeezas mi-di seh dehnya tingz, wahn uman fahn monks di krowd hala owt: “Gaad bles di uman weh mi kehr yu eena ih woom ahn weh mi ners yu!”
28 Bot Jeezas seh: “No, Gaad wahn bles dehn wan weh lisn tu hihn ahn du weh ih seh!”
29 Wen di krowd a peepl staat tu geh biga, Jeezas tel dehn: “Dis wikid jenarayshan di aks fi si wahn mirakl, bot di onli mirakl weh dehn wahn geh fi si da weh mi hapm tu Joana.
30 Jos laik how Joana en op di bee wahn sain fi di peepl dehn da Niniveh, da rait soh di Son a man wahn bee wahn sain fi dis jenarayshan.
31 Di kween a Sheeba wahn rayz op bak fahn di ded pahn Jojment Day lang wid di peepl dehn fahn dis jenarayshan, ahn shee wahn kandem dehn. Kaaz shee mi kohn fahn faar fi hyaa di wizdom weh Salaman mi gat. Bot sombadi grayta dan Salaman deh ya.
32 Di peepl a Niniveh wahn rayz op bak fahn di ded pahn Jojment Day lang wid dis jenarayshan ahn kandem dehn, bikaaz di peepl a Niniveh mi ripent wen Joana mi preech tu dehn. Bot sombadi grayta dan Joana deh ya.
33 Afta sombadi lait wahn lamp, ih noh wahn put it anda wahn baaskit, noh chroo? No, ih wahn put it pahn wahn lampstan soh dat evribadi weh kom eena di hows ku si di lait.
34 Di lamp a di badi da yu aiy. Soh den, if yu aiy foakos pahn wan ting,* den yu hoal badi wahn bee brait.* Bot if yu aiy wikid, den yu hoal badi wahn bee daak.
35 Soh den, kyaaful dat di lait weh deh eena unu da noh loan daaknis.
36 If yu hoal badi brait ahn no paat a it daak, den yu hoal badi wahn bee laik wahn lamp weh gi brait lait.”
37 Wen Jeezas seh dis, wahn Farisee aks ahn fi kohn da ih hows fi eet. Soh Jeezas gaan da ih hows ahn sidong rong di taybl.
38 Now wen di Farisee si dat Jeezas neva wash* ih han dehn bifoa ih eet, ih geh sopraiz.
39 Bot di Laad tel ahn: “Unu Farisee, unu mek shoar dat di owtsaida di kop ahn dish kleen, bot eena unu haat unu greedi ahn wikid.
40 Bot dat noh mek no sens; unu noh tink dat di wan weh mek di owtsaid mek di eensaid tu?
41 Bot wen unu gi gif tu di poa peepl dehn,* gi fahn unu haat, den unu wahn bee kleen.
42 Bot chrobl wahn kohn pahn unu Farisee, kaaz unu gi di ten persent a di mint ahn di roo* an evri ada herb* weh groa eena unu gyaadn, bot stil unu rijek Gaad jostis ahn lov! Da chroo, unu mi haftu gi di ten persent, bot unu noh fi ignoar dehnya ada tingz.
43 Chrobl wahn kohn pahn unu Farisee, bikaaz unu lov fi tek di bes seet da di sinagag dehn, an unu lov wen peepl hayl unu op eena di poblik plays dehn!*
44 Chrobl wahn kohn pahn unu, kaaz unu da laik dehn grayv* weh peepl ku bayli si, ahn dehn waak op pan it ahn noh eevn noa it!”
45 Den wan a di teecha a di Laa tel ahn: “Teecha, yu di insolt wee tu wen yu seh dehnya tingz.”
46 Jeezas tel ahn: “Chrobl wahn kohn pahn unu teecha a di Laa tu, kaaz unu mek op roolz weh da laik sohn hevi load fi di peepl kehr, bot unu noh eevn wilin fi lif op wan finga fi mek di load laita!
47 “Chrobl wahn kohn pahn unu, bikaaz unu bil di toom dehn* fi di prafits, bot da fi unu ansesta dehn mi kil dehn!
48 Unu noa weh unu ansesta dehn mi du, ahn yet unu agree wid dehn, kaaz unu di bil di toom dehn eevn doa dehn mi kil di prafit dehn.
49 Bot Gaad waiz, dats wai ih mi seh: ‘Ah wahn sen sohn prafit an apasl tu dehn, ahn dehn wahn kil ahn persikyoot som a dehn,
50 soh dis jenarayshan wahn geh chaaj fi di blod fahn aala di prafit dehn weh dehn mi kil fahn sins di biginin a di werl.
51 Dehn wahn geh chaaj fi di blod a Aybl rait dong tu di blod a Zakaraiya, hoo dehn mi kil bitween di alta ahn di templ.’ Yes, Ah di tel unu, dis jenarayshan wahn geh chaaj fi aala dis.
52 “Chrobl wahn kohn pahn unu teecha a di Laa, kaaz unu tek weh di kee weh oapm op di doa fi geh di nalij a Gaad. Unu neva gaan een, an unu chrai stap adaz fahn goh een tu!”
53 Soh wen Jeezas lef fahn di hows, di skraibz ahn di Farisee dehn staat tu put presha pan ahn an aks wan kweschan afta di ada,
54 kaaz dehn mi-di wayt fi mek ih seh sohnting weh dehn kuda mi yooz gens ahn.
Futnoat
^ Er “mek wi sangtifai yu naym; mek wi chreet yu naym wid rispek.”
^ Lit., “bred.”
^ Er “weh oa wi.”
^ Wahn neks naym fi Saytan.
^ Er “klayr.” Lit., “simpl.”
^ Er “ful a lait.”
^ Di way di Farisee dehn an ada Jooz yoostu wash dehn han mi bays pahn Jooish chradishan.
^ Si di Glasari, “Gifs tu di poa.”
^ Wahn plaant weh dehn yooz az wahn medisn ahn fi flayva food.
^ Er “ada vejitabl.”
^ Er “di maakit dehn.”
^ Er “memoaryal toom.”
^ Er “di memoaryal toom dehn.”
