Look 13:1-35
13 Da saym taim deh, som a di peepl weh mi deh rong Jeezas tel ahn bowt di peepl fahn Gyalilee weh Pailat mi kil; ahn hihn mi kil dehn wail dehn mi-di aafa op sakrifais.
2 Jeezas tel dehn: “Unu tink dehndeh peepl fahn Gyalilee mi ded bikaaz dehn da-mi sohn wers sinaz dan aala di ada peepl fahn Gyalilee?
3 Af koars nat! Bot Ah di tel unu, if unu noh ripent, unu wahn ded tu.
4 Er how bowt di 18 man weh di towa da Siloawam mi jrap pan ahn kil—unu tink dehn mi moa gilti a sin dan di ada peepl weh liv da Jeroosalem?
5 Af koars nat! Bot Ah di tel unu, if unu noh ripent, aala unu wahn ded tu, jos laik dehn.”
6 Den Jeezas tel dehn wahn iloschrayshan; ih seh: “Wahn man mi ga wahn fig chree eena ih grayp aachad, bot wen ih kohn fi get sohn fig, ih neva fain non pan it.
7 Soh ih tel wan a di man dehn weh werk eena ih aachad, ‘Da don chree yaaz dat Ah di kohn chrai geh fig fahn aafa dis chree, bot Ah noh get notn. Chap it dong man! Ih onli di tek op spays.’
8 Di man tel ahn, ‘Maasta, mek wi wayt wan moa yaa, an Ah wahn dig rong it an Ah wahn put fertilaiza pan it.
9 An if ih bayr froot, den ih gud, bot if ih noh bayr notn, Ah wahn chap it dong.’”
10 Now Jeezas mi-di teech eena wan a di sinagag dehn pahn di Sabat.
11 Wahn laydi mi dehdeh weh mi sik fi 18 yaaz sayka wahn eevl spirit. Shee mi ben oava ahn kudn schraytn op ihself ataal.
12 Wen Jeezas si ahn, ih tel ahn: “Mis, yu free fahn yu siknis.”
13 Den Jeezas put ih han pan ahn, an rait away shee schraytn op an ih staat tu prayz Gaad.
14 Bot di hed aafisa a di sinagag mi beks bad, kaaz Jeezas mi kyoar di laydi pahn di Sabat, soh ih tel di krowd: “Siks dayz deh fi mek unu werk, soh unu kohn pahn dehndeh dayz fi geh kyoar, noh pahn di Sabat.”
15 Bot di Laad tel ahn: “Unu da sohn hipokrit. Wich wan a unu wudn loos unu bul er dongki ahn kehr ahn fi jrink waata pahn di Sabat?
16 Dis uman da wahn disendant a Aybraham, ahn Saytan mek shee sofa fi 18 yaaz. Soh unu noh tink ih rait fi mek Ai free shee fan ih siknis pahn di Sabat?”
17 Wel, wen Jeezas seh dehnya tingz, aala di peepl weh mi deh gens ahn mi feel shaym, bot di ada peepl mi hapi fi si di wandaful tingz weh hihn mi du.
18 Soh Jeezas kantinyu fi seh: “Weh Ah kuda kompyaa di Kingdom a Gaad tu, ahn da how Ah kuda eksplayn it tu unu?
19 Da laik wahn mostad seed weh wahn man plaant eena ih gyaadn, an ih groa til ih ton intu wahn chree, ahn di berd dehn eena di skai kohn mek nes eena di branch dehn.”
20 Agen ih seh: “Weh Ah kuda kompyaa di Kingdom a Gaad tu?
21 Da laik ees weh wahn uman miks wid chree big jaar* a flowa til di hoal doa rayz.”
22 Wail Jeezas mi deh pan ih way tu Jeroosalem, hihn gaahn fahn siti tu siti ahn fahn vilij tu vilij di teech peepl.
23 Now wahn man aks ahn: “Laad, da chroo dat onli wahn lee bit a peepl wahn geh sayv?” Hihn tel dehn:
24 “Unu mos werk haad fi get een chroo di naro doa, bikaaz lata peepl wahn chrai get een bot dehn wahn kyaahnt.
25 Wen di oana a di hows get op ahn lak di doa, unu wahn deh owtsaid di stan op ahn di nak pahn di doa ahn seh, ‘Laad, pleez oapm di doa fi wi.’ Bot hihn wahn tel unu: ‘Ai noh noa da hoo unu.’
26 Den unu wahn staat tu seh, ‘Wee mi eet ahn jrink lang wid yu, ahn yoo yoostu teech pahn fi wee mayn schreet dehn.’
27 Bot hihn wahn tel unu, ‘Ai noh noa da hoo unu. Get fahn fronta mi, kaaz unu du loan wikid tingz!’
28 Wen unu si Aybraham, Aizak, ahn Jaykop, an aala di prafit dehn eena di Kingdom a Gaad, bot unu deh owtsaid, da den unu wahn di moan ahn baal ahn grain op unu teet.
29 Moroava, peepl wahn kohn fahn di ees ahn di wes ahn fahn di naat ahn di sowt, ahn dehn wahn sidong an eet rong di taybl eena di Kingdom a Gaad.
30 Soh, wahn lata peepl weh da laas wahn bee fers, ahn wahn lata peepl weh da fers wahn bee laas.”
31 Da saym taim deh, sohn Farisee kom op tu Jeezas ahn tel ahn: “Ih beta yu lef fahn ya, kaaz Herod waahn kil yu.”
32 Jeezas tel dehn: “Goh tel da faks, ‘Ai wahn di jraiv owt deemonz ahn heel peepl tudeh ahn tumaaro, ahn pahn di terd day Ah wahn finish mi werk eena dis ayrya.’
33 Bot noh mata weh hapm, Ah need fi kantinyu mi werk tudeh ahn tumaaro ahn di neks day, kaaz wahn prafit noh fi geh kil eena no ada plays dan Jeroosalem.
34 Jeroosalem, Jeroosalem, unu da di wan weh kil di prafit dehn ahn stoan di wan dehn weh Gaad mi sen. Unu noh noa da humoch taim Ah mi waahn gyada unu chiljren tugeda jos laik how wahn hen gyada ih baybi chikin dehn anda ih wing? Bot unu neva waahnt.
35 Ahn now, Gaad don lef unu templ.* Ah di tel unu, unu noh wahn si mi til di day unu seh: ‘Jehoava bles di wan weh kom eena fi hihn naym!’”
