Look 14:1-35
14 Pahn di Sabat day, Jeezas gaahn eet wahn meel da di hows a wan a di leeda a di Farisee dehn, ahn di peepl eena di hows mi-di wach ahn gud.
2 Ahn wahn man weh mi-di sofa fahn wahn siknis weh kaaz ih badi fi swel op* mi deh fronta Jeezas.
3 Soh Jeezas aks di teecha dehn a di Laa ahn di Farisee dehn: “Ih gens di Laa fi kyoar sohnbadi pahn di Sabat er nat?”
4 Bot dehn neva seh notn. Soh ih toch di man, heel ahn, an sen ahn hoam.
5 Den ih seh: “Tel mi, wich wan a unu wudn hori goh tek owt yu son er yu bul if ih jrap eena wahn wel pahn di Sabat day?”
6 Bot dehn kudn giv ahn wahn ansa.
7 Wen ih si som a di ges dehn mi-di chooz di bes seet dehn eena di plays, ih tel dehn wahn iloschrayshan. Ih seh:
8 “Wen sohnbadi invait yu da wahn marij fees, noh goh fain di bes seet fi sidong. Kaaz maybi dehn mi invait sohnbadi weh moa impoatant dan yoo.
9 Den di wan weh mi invait di too a unu wahn kohn tel yu, ‘Mek dis man sidong ya.’ Den yu wahn shaym, kaaz yu wahn haftu get op ahn goh sidong da di laas seet.
10 Dats wai, wen yu geh wahn invitayshan, goh sidong da di laas seet, soh dat wen di wan weh invait yu get deh, ih wahn tel yu, ‘Mi fren, wahn beta seet deh ya fi yu.’ Den aala di ada ges dehn wahn rispek yu.
11 Kaaz Gaad wahn hombl evribadi weh tink tu moch a dehnself, bot Hihn wahn prayz op di wan weh hombl ihself.”
12 Den ih tel di man weh mi invait ahn: “Wen yu ga wahn bankwit, noh invait yu frenz, yu bradaz, eni a yu relitiv dehn, ner yu rich nayba dehn. Kaaz dehn ku invait yu bak fi wahn meel tu, ahn dat da how yu wahn geh pay bak fi weh yu du.
13 Bot wen yu ga wahn bankwit, invait di wan dehn weh poa, weh kripl, weh kyaahn waak, ahn weh blain;
14 ahn yu wahn bee hapi, kaaz dehn kyaahn pay yu bak. Bot Gaad wahn pay yu bak eena di rezorekshan a di raichos wan dehn.”
15 Wen wan a di ges dehn hyaa dehnya tingz, ih tel Jeezas: “Di wan weh wahn eet* eena di Kingdom a Gaad, wahn bee hapi.”
16 Jeezas tel ahn: “Wahn man mi-di plan wahn big bankwit, an ih mi invait wahn lata peepl.
17 Wen di meel mi redi, ih sen owt ih slayv fi goh tel di invaitid ges dehn, ‘Unu kom, kaaz evriting redi.’
18 Bot aala dehn staat tu mek ekskyoos. Di fers wan seh, ‘Ah jos bai wahn feel an Ah need fi goh see’t, Ah sari, bot Ah kyaahn kom.’
19 Ahn wahn nada wan seh, ‘Ah jos bai ten kow* an Ah gwehn goh chrai dehn owt fi si how gud dehn werk; Ah sari, bot Ah kyaahn kom.’
20 Den wahn nada wan seh, ‘Ah jos geh marid, soh Ah kyaahn kohn.’
21 Soh di slayv kohn bak ahn ripoat dehnya tingz tu ih maasta. Den di maasta geh beks ahn tel di slayv, ‘Hori goh tu di mayn schreet an ali dehn eena di siti, an invait di poa, di kripl, di blain, ahn di wan dehn weh kyaahn waak.’
22 Wen di slayv kohn bak, ih seh, ‘Maasta, Ah don du weh yu mi aks mi fi du, ahn wi stil ga moa spays.’
23 Soh di maasta tel di slayv, ‘Goh pahn di road ahn layn dehn owtsaida di siti ahn kanvins dehn fi kom, kaaz Ai waahn mek mi hows geh ful op.
24 Ah di tel unu, non a di wan dehn weh Ah mi invait fers wahn eva geh fi tays mi food.’”
25 Now wahn big krowd a peepl mi-di chravl lang wid ahn, an hihn ton rong ahn tel dehn:
26 “If enibadi waahn bee mai disaipl, ih haftu lov mee moa dan how ih lov* ih pa, ih ma, ih waif, ih chiljren, ih breda, ih sista, an eevn ih oan laif.* If ih kyaahn du dat, den ih kyaahn bee mai disaipl.
27 If enibadi waahn bee mai disaipl, ih haftu kehr ih oan taacha stayk* ahn fala mi. If ih kyaahn du dat, den ih kyaahn bee mai disaipl.
28 Sopoaz wan a unu waahn bil wahn towa. Di fers ting yu wuda du da sidong ahn figa owt humoch evriting wahn kaas fi mek shoar dat yu gat inof moni fi finish it. Dat mek sens, noh chroo?
29 Adawaiz, yu mait lay di fongdayshan bot kyaahn finish di towa, an ada peepl wahn laaf aata yu.
30 Dehn wahn seh: ‘Dis man staat tu bil wahn towa bot now ih kyaahn finish it.’
31 Tink bowt dis tu, If wahn king weh gat 10,000 soalja maach fi meet wahn nada king weh gat 20,000 soalja, yu noh tink dat fers ih wuda sidong an aks fi advais fi si if ih ku win di waar er nat?
32 If ih si dat ih kyaahn win, ih wahn sen wahn groop a fi hihn soalja fi mek pees wail di ada king stil deh faar.
33 Soh den, nobadi weh kyaahn waak weh fahn di tingz weh dehn oan ku bee mai disaipl.
34 “Saalt gud, bot if saalt looz ih schrent, how ih wahn get bak ih saaltinis?
35 Yu kyaahn yooz it fi soil ner fi fertilaiza; yu jos wahn chroa it weh. Soh den, di persn weh ga ayz fi lisn, lisn gud.”
Futnoat
^ Er “sofa fahn jrapsi.” Wahn siknis weh kaaz di badi fi swel op bikaaz a tu moch waata.
^ Lit., “eet bred.”
^ Er “faiv payr a kow.”
^ Er “ih haftu lov mee moa ahn hayt.”
^ Er “soal.”
^ Si di Glasari, “Taacha stayk.”
