Look 17:1-37
17 Den Jeezas tel ih disaipl dehn: “Tingz weh kaaz peepl fi sin* wahn aalwayz deh. Bot chrobl wahn kohn pahn enibadi weh kaaz adaz fi sin!
2 Ih wuda beta if da persn tai wahn hevi rakstoan rong fi hihn nek ahn mek dehn chroa ahn eena di see dan fi mek hihn kaaz wan a dehnya lee wan ya fi sin.
3 Soh unu mos bee kyaaful. If yu brada sin gens yu, tel ahn bowt it, an if ih sari fi weh ih du,* fergiv ahn.
4 Eevn if ih sin gens yu sevn taimz fi di day an ih kohn bak tu yu sevn taimz ahn seh, ‘Ah sari,’* yu mos fergiv ahn.”
5 Now di apasl dehn tel di Laad: “Help wi fi ga moa fayt.”
6 Den di Laad seh: “If unu ga fayt di saiz a wahn mostad seed, unu wahn tel dis chree,* ‘Root owt yuself fahn deh ahn goh plaant yuself eena di see!’ an ih wahn obay unu.
7 “Sopoaz wan a unu ga wahn slayv weh di plow eena di feel er di tek kayr a di sheep dehn. Wich wan a unu wuda tel ahn, ‘Hori kohn sidong rong di taybl an eet’ wen ih kom een fahn di feel?
8 Insted, yu wahn tel ahn, ‘Get sohnting redi fi mek Ah eet, ahn put aan yu aypran ahn serv mi til Ah finish eet ahn jrink, den aftawodz yoo ku eet ahn jrink.’
9 Yoo tink di maasta wahn tank ahn fi weh ih du? No, bikaaz ih mi du weh ih mi sopoas tu du.
10 Saym way, wen unu finish du weh unu sopoas tu du, unu fi seh: ‘Wee noh dizerv notn, kaaz wee da jos slayv. Wee jos di du weh wi mi sopoas tu du.’”
11 Wail Jeezas mi-di goh tu Jeroosalem, ih paas chroo Samayrya ahn Gyalilee.
12 Wen ih mi-di goh eena wahn vilij, ten man wid leprosi kech sait a ahn, bot dehn mi stay faar.
13 Ahn dehn hala owt haad-wan: “Jeezas, Teecha, ga mersi pahn wi!”
14 Wen Jeezas si dehn, ih tel dehn: “Unu goh ahn shoa unuself tu di prees dehn.” Den az dehn mi-di goh pahn dehn way, dehn geh heel.
15 Wan a dehn ton bak ahn staat tu prayz Gaad wid wahn lowd vais wen ih noatis dat ih geh heel.
16 An ih neel dong fronta Jeezas wid ih fays tu di grong ahn tank ahn. Hihn da-mi wahn Samaritan man.
17 Jeezas seh: “Da neva ten man geh heel? Soh wehpaat di ada nain deh?
18 Wai non a dehn kohn bak fi prayz Gaad? Wai da onli dis man fahn wahn nada nayshan kohn bak?”
19 Den Jeezas tel ahn: “Get op ahn goh hoam, kaaz da yu fayt mek yu geh heel.”
20 Di Farisee dehn aks Jeezas: “Da wen di Kingdom a Gaad wahn kom?” Hihn tel dehn: “Di Kingdom a Gaad wahn kom eena wahn way weh peepl noh di ekspek.
21 Peepl noh wahn di seh, ‘See’t ya!’ er, ‘See’t oava deh!’ Kaaz di Kingdom a Gaad deh rait monks unu.”
22 Den ih tel ih disaipl dehn: “Di dayz wahn kohn wen unu wahn lang fi spen wahn day wid di Son a man, bot dat noh wahn pasabl.
23 Ahn peepl wahn tel unu, ‘Si ahn ya!’ er, ‘Si ahn deh!’ Bot unu mosn fala dehn.
24 Kaaz jos laik how laitnin flash fahn wan said a di skai tu di ada said, da rait soh ih wahn bee joorin di dayz a di Son a man.
25 Bot fers, hihn wahn haftu sofa wahn lata tingz, ahn dis jenarayshan wahn rijek ahn.
26 Moroava, jos laik how tingz mi stan eena di dayz a Noawa, da rait soh ih wahn bee joorin di dayz a di Son a man:
27 peepl mi-di eet ahn jrink, ahn di man an uman dehn mi-di geh marid rait op tu di day wen Noawa gaan eena di aak, ahn di Flod kom ahn dischrai aala dehn.
28 Di saym ting mi hapm eena di dayz a Lat: peepl mi-di eet ahn jrink, dehn mi-di bai ahn sel, dehn mi-di plaant eena dehn feel, ahn dehn mi-di bil hows.
29 Bot pahn di day wen Lat lef Sadam, ih rayn faiya ahn solfa fahn hevn ahn dischrai aala dehn.
30 Da rait soh ih wahn bee pahn di day wen di Son a man shoa ih powa tu peepl.
31 “Pahn da day deh, di persn weh deh pan ih howstap noh fi kohn dong ahn pik op ih bilanginz weh deh eena di hows, saym way, di persn weh deh owt eena di feel noh fi kohn bak ahn luk fi di tingz weh ih mi lef bihain.
32 Rimemba weh mi hapm tu Lat waif.
33 Enibadi weh chrai sayv ih laif* wahn looz it, bot enibadi weh looz ih oan laif wahn sayv it.
34 Ah di tel unu, da saym nait too peepl wahn deh eena wan bed; dehn wahn kehr wan, bot dehn wahn lef di ada wan.
35 Too laydi wahn di grain flowa da di saym mil; dehn wahn kehr wan, bot dehn wahn lef di ada wan.”
36 *——
37 Soh dehn aks Jeezas: “Laad, da wehpaat dis wahn tek plays?” Hihn tel dehn: “Eniway wehpaat ded badi deh, da rait dehsoh di eegl dehn wahn gyada.”
Futnoat
^ Er “fi stombl.”
^ Er “an if ih ripent.”
^ Lit., “ripent.”
^ Lit., “blak molberi chree.”
^ Er “soal.”
^ Si di futnoat da Machyu 17:21.
