Look 21:1-38
21 Now az Jeezas luk op, ih noatis di rich peepl di jrap een dehn doanayshan eena di moni baks.
2 Den ih si wahn poa wido di jrap een too smaal koin* weh mi bayli wert eniting,
3 an ih seh: “Bileev mi, dis poa wido put een moa dan aala dehn.
4 Aala dehnya peepl gi fahn di lata richiz weh dehn gat, bot shee, eevn doa ih soh poa, giv evriting weh ih mi gat fi liv pan.”
5 Layta, wen som a dehn mi-di taak bowt how di templ mi dekorayt op wid aal di priti stoan dehn ahn wid aala di tingz weh dedikaytid tu Gaad,
6 Jeezas seh: “Di dayz wahn kohn wen aala dehnya tingz weh unu di si ya now wahn geh nak dong, ahn nat wan stoan wahn lef eena ih plays.”
7 Den dehn aks ahn: “Teecha, da wen aala dehnya tingz wahn hapm, ahn wat wahn bee di sain fi mek wi noa wen aala dehnya tingz wahn tek plays?”
8 Hihn tel dehn: “Unu wach owt soh dat nobadi noh fool unu, kaaz lata peepl wahn kohn di yooz mai naym ahn seh, ‘Ai da di Krais,’ ahn, ‘Di taim deh kloas.’ Bot unu noh fi fala dehn.
9 Pahn tap a dat, wen unu hyaa bowt waar ahn raiyat, noh geh fraitn. Kaaz aala dehnya tingz haftu hapm fers, bot di en noh wahn kohn rait away.”
10 Den ih tel dehn: “Di nayshan dehn wahn fait gens wan anada ahn di kingdom dehn wahn fait gens wan anada.
11 Ahn sohn big ertkwayk wahn hapm, ahn food shaatij an aal kaina dizeez wahn deh aal oava di plays; ahn peepl wahn si tingz weh wahn mek dehn geh frayd ahn dehn wahn si sohn grayt sain eena di skai.
12 “Bot bifoa aala dehnya tingz hapm, peepl wahn ares unu ahn persikyoot unu, ahn dehn wahn han unu oava tu di sinagag dehn ahn dehn wahn put unu eena jayl. Ahn bikaaz a mai naym, dehn wahn kehr unu fronta di king ahn govna dehn.
13 Dis wahn bee unu chaans fi giv wahn witnis.
14 Soh den, mek op unu main noh fi praktis heda taim weh unu wahn seh fi difen unuself.
15 Ai wahn giv unu wizdom an Ai wahn help unu noa weh fi seh, an unu enimi dehn wahn kyaahn eevn aagyu wid unu.
16 Moroava, eevn unu payrents, unu breda dehn, an unu famili ahn frenz wahn bichray unu, ahn dehn wahn eevn put unu tu det.
17 Ahn peepl wahn hayt unu bikaaz unu da mai disaipl.
18 Bot nat eevn wan hyaa fahn aafa unu hed wahn geh laas.
19 An if unu bayr op til di en, unu wahn sayv unu laif.*
20 “Wen unu si soaljaz di kyamp rong Jeroosalem, den noa dat shee wahn soon geh dischrai.
21 Soh den, dehn wan weh deh eena Judeeya fi staat ron tu di mongtin dehn, ahn dehn wan weh deh eena Jeroosalem fi lef fahn deh, ahn dehn wan weh deh eena di vilij dehn kloas bai noh fi goh eena Jeroosalem needa,
22 kaaz dehndeh dayz wahn bee di taim fi mek Gaad joj di peepl, soh dat aala di tingz weh mi rait dong eena di Skripchaz wahn kohn chroo.
23 Joorin dehndeh dayz, di pregnant uman dehn ahn di wan dehn weh di ners dehn baybi wahn ga wahn harabl taim! Kaaz lata sofarin wahn deh aal oava di lan, ahn Gaad wahn ponish dehndeh peepl.
24 Ahn som wahn geh kil wid di soad, bot dehn wahn kehr adaz az priznaz da ada* nayshanz; ahn di nayshanz* wahn chrampl Jeroosalem til di set* taimz a di nayshanz* kohn tu wahn en.
25 “Peepl wahn si sain eena di son an eena di moon ahn di staar dehn. Di peepl pahn di ert noh wahn noa weh fi du kaaz a di lowd naiz a di rof see.
26 Peepl wahn faynt weh kaaz dehn wahn soh fraitn wen dehn si aal weh wahn hapm pahn di ert, kaaz di powaful tingz eena hevn wahn geh shayk op.
27 Ahn dehn wahn si di Son a man di kom eena wahn klowd wid powa ahn lata gloari.
28 Bot wen dehnya tingz staat tu hapm, stan op schrayt ahn lif op unu hed, kaaz di taim fi mek Gaad sayv unu deh kloas.”
29 Wid dat, Jeezas tel dehn wahn iloschrayshan; ih seh: “Noatis di fig chree an aal di ada chree dehn.
30 Wen di leef dehn staat tu sprowt, unu ku see’t fi unuself ahn noa dat soma deh kloas.
31 Saym way, wen unu si dehnya tingz di hapm, unu wahn noa dat di Kingdom a Gaad deh kloas.
32 Ah di tel unu di chroot, di peepl a dis jenarayshan noh wahn ded til dehn geh fi si aala dehnya tingz hapm.
33 Hevn an ert wahn geh dischrai, bot weh Ai seh wahn laas fareva.
34 “Bot unu mos bee kyaaful dat unu noh berdn unu haat di oavaeet, di jrink tu moch, ahn di wori bowt tingz weh unu need. Adawaiz, da day wahn kech unu bai sopraiz,
35 jos laik wahn chrap. Kaaz ih wahn kohn pahn evribadi weh liv pahn di ert.
36 Soh den, unu mos kip pahn di wach ahn kantinyu bayg Gaad wid aala unu haat fi sayv unu fahn aala dehnya tingz weh wahn haftu hapm ahn soh dat unu wahn ku stan op fronta di Son a man.”
37 Soh joorin di day Jeezas wuda teech eena di templ, bot ih wuda lef di siti fi spen di nait pahn di mongtin weh naym di Mongt a Alivz.
38 An erli eena di maanin peepl wuda goh da di templ fi lisn tu ahn.
Futnoat
^ Lit., “too lepta.” Too lepta da-mi di pay weh wahn persn get fi ten minits werk.
^ Er “sayv unu soal.”
^ Er “da aala di.”
^ Er “di Jentailz,” weh da peepl hoo da noh Jooz.
^ Er “apointid.”
^ Er “di Jentailz,” weh da peepl hoo da noh Jooz.
