Look 3:1-38
3 Joorin Taibeeryos Seeza 15 yaaz a roolaship, wen Ponchos Pailat da-mi di govna a Judeeya, Herod* mi-di rool oava Gyalilee, fi hihn breda Filip mi-di rool oava di konchri a Itureeya ahn Chrakonaitis, ahn Laisayniyas mi-di rool oava Abileeni.
2 Joorin di taim a Kaiyafas ahn cheef prees Anas, Gaad mi gi wahn mesij tu Jan eena di wildanes; hihn da-mi Zakaraiya son.
3 Soh Jan gaahn chroo di hoal konchri rong di Jaadn di tel peepl fi geh baptaiz fi shoa dat dehn ripent ahn fi mek Gaad fergiv dehn sinz.
4 Ih mi hapm jos laik how di prafit Aizaiya mi seh: “Sohnbadi di hala owt eena di wildanes: ‘Pripyaa di way a Jehoava! Schraytn owt di road weh deh fronta ahn.
5 Ful op evri vali wid dert, ahn levl aaf evri mongtin ahn hil. Schraytn owt di road dehn weh kerv, ahn smood owt di road dehn weh rof;
6 an eena da way deh, evribadi wahn si di way how Gaad wahn giv salvayshan.’”
7 Soh wen di krowd mi-di goh tu Jan fi mek ih baptaiz dehn, hihn wuda tel dehn: “Unu da laik paiznos snayk, da hoo mi waan unu fi ron weh fahn di day a Gaad anga?
8 Soh den, du tingz weh shoa dat unu ripent. Noh fool unuself ahn seh, ‘Aybraham da fi wee faada.’ Kaaz Ah di tel unu, Gaad ku yooz dehnya saym stoan fi mek chiljren fi Aybraham.
9 In fak, di aks don deh da di root a di chree dehn. Soh den, evri chree weh noh bayr gud froot wahn geh chap dong ahn wahn geh chroa rait eena di faiya.”
10 Soh di krowd aks ahn: “Weh wi shuda du den?”
11 Ih ansa dehn ahn seh: “Di wan weh ga too shert shuda shayr wid di man weh noh ga non, ahn di wan weh ga sohnting fi eet shuda shayr wid di wan weh noh gat notn fi eet.”
12 Eevn di taks kalekta dehn gaahn fi geh baptaiz, ahn dehn aks Jan: “Teecha, da weh wee shuda du?”
13 Ih tel dehn: “Onli aks fi* di amonk a taks moni weh di laa seh sombadi fi pay, ahn notn haiya dan dat.”
14 Sohn soaljaz aks ahn di saym kweschan: “Weh wee shuda du?” Ih tel dehn: “Noh chretn peepl fi dehn moni ahn noh akyooz enibadi needa, bot unu mos satisfai wid weh unu get.”
15 Now di peepl mi-di ekspek di Krais fi kom, an aala dehn mi-di wanda weda Jan da di Krais er nat.
16 Soh Jan tel aala dehn: “Ai di baptaiz unu wid waata, bot sombadi els wahn soon kohn weh way moa powaful dan mee, an Ai noh eevn fit fi loos di laysn fan ih sandalz. Hihn wahn baptaiz unu wid hoali spirit ahn faiya.
17 Hihn ga wahn shovl eena ih han fi kleen op di floa wehpaat dehn chrash owt di weet, ahn hihn wahn gyada op di weet eena ih stoarhows, bot ih wahn bon op di chrash eena di faiya weh kyaahn owt.”
18 Jan mi teech dehn lata ada ting tu, ahn hihn kantinyu fi preech di gud nyooz tu di peepl.
19 Bot bikaaz Jan mi tel Herod, di roola a Gyalilee, bowt aal di rang tingz weh ih mi du, ahn bowt weh ih mi du wid ih breda waif, Heroadyas,
20 Herod komit wahn nada kraim: Ih lak op Jan eena prizn.
21 Now Jan mi baptaiz lata peepl, an ih baptaiz Jeezas tu. Az Jeezas mi-di pray, di hevn oapm op,
22 ahn di hoali spirit kohn dong pan ahn laik wahn dov, ahn wahn vais fahn owta hevn seh: “Yoo da mai Son, di wan weh Ah onli lov; yoo da di wan weh Ah pleez wid.”
23 Wen Jeezas staat ih minischri, hihn mi bowt 30 yaaz oal; peepl yoostu seh dat hihn da-miJoazef son.Joazef da-mi Heelai son.
24 Heelai da-mi Matat son.Matat da-mi Leevai son.Leevai da-mi Melkai son.Melkai da-mi Janai son.Janai da-mi Joazef son.
25 Joazef da-mi Matataiyas son.Matataiyas da-mi Aymos son.Aymos da-mi Nayhum son.Nayhum da-mi Eslai son.Eslai da-mi Nagai son.
26 Nagai da-mi Mayat son.Mayat da-mi Matataiyas son.Matataiyas da-mi Semeyin son.Semeyin da-mi Joasek son.Joasek da-mi Joada son.
27 Joada da-mi Joawanan son.Joawanan da-mi Reesa son.Reesa da-mi Zerubabel son.Zerubabel da-mi Sheyaltyel son.Sheyaltyel da-mi Neerai son.
28 Neerai da-mi Melkai son.Melkai da-mi Adai son.Adai da-mi Koasam son.Koasam da-mi Elmaydam son.Elmaydam da-mi Er son.
29 Er da-mi Jeezas son.Jeezas da-mi Eliyeezer son.Eliyeezer da-mi Joarim son.Joarim da-mi Matat son.Matat da-mi Leevai son.
30 Leevai da-mi Simiyan son.Simiyan da-mi Joodas son.Joodas da-mi Joazef son.Joazef da-mi Joanam son.Joanam da-mi Elaiyakim son.
31 Elaiyakim da-mi Meelya son.Meelya da-mi Mena son.Mena da-mi Matata son.Matata da-mi Naytan son.Naytan da-mi Dayvid son.
32 Dayvid da-mi Jesi son.Jesi da-mi Oabed son.Oabed da-mi Boawaz son.Boawaz da-mi Salmon son.Salmon da-mi Nashon son.
33 Nashon da-mi Aminadab son.Aminadab da-mi Arnai son.Arnai da-mi Hezron son.Hezron da-mi Peerez son.Peerez da-mi Jooda son.
34 Jooda da-mi Jaykop son.Jaykop da-mi Aizak son.Aizak da-mi Aybraham son.Aybraham da-mi Teera son.Teera da-mi Nayhor son.
35 Nayhor da-mi Seerog son.Seerog da-mi Reeyu son.Reeyu da-mi Peeleg son.Peeleg da-mi Eeber son.Eeber da-mi Sheela son.
36 Sheela da-mi Kayainan son.Kayainan da-mi Arpakshad son.Arpakshad da-mi Shem son.Shem da-mi Noawa son.Noawa da-mi Laymek son.
37 Laymek da-mi Metoosela son.Metoosela da-mi Eenak son.Eenak da-mi Jayred son.Jayred da-mi Mahaylaleel son.Mahaylaleel da-mi Kayainan son.
38 Kayainan da-mi Eenosh son.Eenosh da-mi Set son.Set da-mi Adam son.An Adam da-mi Gaad son.
