Look 4:1-44
4 Den Jeezas lef di Jaadn Riva, an ih mi ful a hoali spirit, ahn di spirit leed ahn tu di wildanes
2 fi 40 dayz, ahn rait deh di Devl mi temp ahn. Joorin da hoal taim deh, ih neva eet notn, soh ih mi hongri bad.
3 Den di Devl tel ahn: “If yoo da Gaad Son fi chroo, tel dis stoan fi ton intu bred.”
4 Bot Jeezas tel ahn: “Di Skripchaz seh, ‘Wahn man noh fi liv pahn jos food.’”
5 Soh di Devl kehr ahn op pahn wahn hai mongtin, an eena di blink a wahn aiy, ih shoa ahn aala di kingdom dehn a di ert.
6 Den di Devl tel ahn: “Ah wahn gi yu atariti oava aala dehnya kingdom ahn di gloari weh dehn gat, bikaaz dehn bilangz tu mee, an Ai ku giv it tu enibadi weh Ai waahn.
7 Soh, if yu jos neel dong ahn wership mi dis wan taim, aala dis wahn bee fi yoo.”
8 Jeezas tel ahn: “Di Skripchaz seh, ‘Da Jehoava yu Gaad yu fi wership, ahn da onli hihn wan yu fi serv.’”
9 Den di Devl kehr ahn da Jeroosalem, an ih put ahn pahn di haiyis paat a di templ, an ih tel ahn: “If yoo da wahn son a Gaad fi chroo, chroa dong yuself fahn ya,
10 kaaz di Skripchaz seh, ‘Hihn wahn gi fi hihn aynjel dehn wahn koman fi protek yu,’
11 ahn, ‘Dehn wahn kech yu soh dat yu noh eevn nak yu fut gens wahn stoan.’”
12 Jeezas tel ahn: “Di Skripchaz seh, ‘Yu noh fi tes Jehoava yu Gaad.’”
13 Soh wen di Devl finish temp ahn, ih lef ahn loan til wahn nada gud apachooniti kom op fi temp ahn.
14 Now Jeezas gaahn bak da Gyalilee ahn di spirit a Gaad mi deh wid ahn. Ahn peepl da di vilij dehn mi-di seh gud tingz bowt ahn.
15 An ih gaan eena di sinagag dehn fi teech dehn, ahn di peepl mi giv ahn aana.
16 Den ih gaan da Nazaret, weh ih mi groa op. An ih gaan da di sinagag pahn di Sabat laik weh ih mi aalwayz du. Wen ih stan op fi reed,
17 wahn man han ahn di skroal a di prafit Aizaiya, an ih oapm di skroal ahn fain di paat weh seh:
18 “Jehoava spirit deh pahn mi, bikaaz hihn chooz mee fi tel di gud nyooz tu poa peepl. Ih sen mi fi tel di slayv dehn dat dehn wahn bee free ahn dat di wan dehn weh blain wahn ku si. Ahn fi tel dehn wan weh di sofa dat dehn wahn bee free.
19 Aalso, ih sen mi fi tel dehn bowt di taim wen Jehoava wahn ku bles dehn agen.”
20 Afta Jeezas don reed fahn di skroal, ih han it bak tu di man ahn den sidong. Evribadi eena di sinagag mi-di stayr pan ahn.
21 Den ih tel dehn: “Tudeh, dis skripcha weh unu jos hyaa Ah reed, kohn chroo.”
22 An aala dehn staat tu seh gud tingz bowt ahn, an dehn mi sopraiz fi hyaa aala di nais werdz weh mi-di kom owta ih mowt. Bot som a dehn seh: “Hoal aan, dis da noh Joazef son?”
23 Jeezas tel dehn: “Ah noa dat unu wuda waahn tel mi dis praverb, ‘Dakta, kyoar yuself,’ ahn den tel mi, ‘Wi hyaa dat yu du wahn lata gud tingz da Kapernyam; wai yu noh du som ya da yu hoamtong tu?’”
24 Soh ih tel dehn: “Ah di tel unu di chroot, nobadi apreeshiayt wahn prafit eena fi hihn oan hoamtong.
25 Fi egzampl: Eena di dayz a Ilaija, dehn mi ga lata wido weh mi-di liv da Izrel; dat da-mi di taim wen ih neva rayn fi chree an a haaf yaaz, ahn no food neva deh fi eet no way.
26 Bot eevn soh, Gaad neva sen Ilaija tu non a dehn; ih mi onli sen ahn tu wahn wido weh mi liv da Zarefat, weh mi deh eena Saidan.
27 Ahn joorin di taim a Ilaisha di prafit, wahn lata peepl mi ga leprosi da Izrel. Bot non a dehn neva geh kyoar,* onli Nayman fahn Siriya mi geh kyoar.”
28 Wen aala di peepl weh mi deh eena di sinagag hyaa dehnya tingz, dehn geh beks.
29 Soh dehn get op ahn dehn hori kehr ahn owtsaida di siti; dehn kehr ahn tu di ej a di mongtin weh di siti mi bil pan fi push ahn aafa di ej.
30 Bot Jeezas waak rait chroo di krowd ahn gaan ih way.
31 Den Jeezas gaan da Kapernyam, weh da-mi wahn siti eena Gyalilee. An ih staat tu teech di peepl pahn di Sabat.
32 Dehn mi sopraiz wen dehn hyaa how ih teech, kaaz wat hihn mi-di teech dehn mi kohn fahn Gaad.
33 Now eena di sinagag, dehn mi ga wahn man wid wahn deemon eena ahn, an di deemon seh wid wahn lowd vais:
34 “Jeezas di Nazareen, wai yu di mek chrobl fi wi? Yoo kohn fi dischrai wi? Ai noa egzakli da hoo yoo. Yoo da di wan weh hoali ahn weh Gaad sen.”
35 Bot Jeezas skoal op di deemon; ih tel ahn: “Kip kwaiyet, ahn kom owta ahn.” Di deemon chroa dong di man pahn di grong fronta aala dehn, den ih kom owta ahn, bot ih neva hert ahn.
36 Wen di peepl si dis, dehn mi shak ahn dehn seh tu wan anada: “Luk how hihn taak tu da deemon! Hihn ga atariti ahn powa! Eevn di deemon dehn obay ih aadaz ahn dehn kom owta peepl!”
37 Soh di nyooz bowt Jeezas spred aal oava di konchri.
38 Afta Jeezas lef di sinagag, ih gaan da Saiman hows. Ahn Saiman mada-in-laa mi dehdeh, ahn shee mi ga wahn hai feeva. Soh dehn aks Jeezas fi pleez help ahn.
39 Jeezas waak oava tu weh shee mi deh an ih aada di feeva fi lef di uman, ahn di feeva gaan. Den rait away shee get op ahn staat mek food fi dehn.
40 Wen di son mi-di goh dong, evribadi weh mi ga wahn famili memba er fren weh mi sik, kehr dehn tu Jeezas, noh mata weh kaina dizeez dehn mi gat. Ahn hihn put ih han pahn eech wan a dehn an ih kyoar dehn.
41 Jeezas jraiv owt lata deemon fahn peepl tu; di deemon dehn mi-di krai owt ahn seh: “Yoo da di Son a Gaad!” Bot Jeezas skoal dehn ahn tel dehn noh fi seh notn, kaaz dehn mi noa dat hihn da di Krais.
42 Erli di neks day, ih lef fahn deh ahn gaan da wahn plays fi deh bai ihself. Bot di krowd staat tu saach far ahn, an wen dehn fain ahn, dehn bayg ahn fi stay wid dehn.
43 Bot hihn tel dehn: “Ai haftu preech di gud nyooz a di Kingdom a Gaad eena di ada siti dehn tu, bikaaz dis da di reezn wai Gaad sen mi.”
44 Soh ih kantinyu preech di gud nyooz eena di sinagag dehn da Judeeya.
Futnoat
^ Er “heel.”
