Look 6:1-49
-
Jeezas ga atariti oava di Sabat (1-5)
-
Jeezas heel wahn man weh mi ga wahn kripl han (6-11)
-
Di 12 apaslz (12-16)
-
Jeezas teech ahn heel (17-19)
-
Di wan dehn weh wahn bee hapi ahn di wan dehn weh wahn ga chroblz (20-26)
-
Lov unu enimi dehn (27-36)
-
Stap joj adaz (37-42)
-
Unu ku noa eech chree fahn di froot weh ih bayr (43-45)
-
Di hows weh bil gud; di hows weh noh ga wahn salid fongdayshan (46-49)
6 Wahn taim, Jeezas an ih disaipl dehn mi-di paas chroo sohn weet feel pahn di Sabat, an ih disaipl dehn staat tu pik aaf di hed fahn di weet ahn rob aaf di chrash eena dehn han soh dat dehn kuda mi eet di weet.
2 Wen som a di Farisee si dat, dehn seh: “Wai yu disaipl dehn du weh dehn noh fi du pahn di Sabat?”
3 Bot Jeezas tel dehn: “Unu neva reed weh Dayvid an ih soalja dehn mi du wen dehn mi hongri?
4 Ih gaan eena di hows a Gaad, ahn di hai prees giv ahn di hoali bred* fi mek hihn an ih soalja dehn eet. Now, akaadn tu di Laa, onli di hai prees mi fi eet dehndeh bred, nobadi els kuda mi eet dehn.”
5 Den ih tel dehn: “Di Son a man ga atariti oava di Sabat.”
6 Pahn wahn nada sabat day, Jeezas gaan eena di sinagag ahn staat tu teech. Wahn man mi dehdeh, an ih rait han mi kripl.*
7 Di skraib ahn di Farisee dehn mi-di wach Jeezas haad fi si if ih mi wahn kyoar enibadi pahn di Sabat, kaaz dehn mi waahn fain sohnting weh dehn kuda mi yooz gens ahn.
8 Bot hihn mi noa weh dehn mi-di tink, soh ih tel di man wid di kripl* han: “Get op ahn kohn stan op fronta evribadi.” Soh di man get op ahn gaahn stan op fronta dehn.
9 Den Jeezas aks dehn: “Unu tink ih gens di Laa fi du sohnting gud er bad pahn di Sabat, fi sayv wahn laif* er fi dischrai it?”
10 Soh afta ih luk rong pahn evribadi, ih tel di man: “Schrech owt yu han.” Den di man schrech owt ih han, an ih geh heel.
11 Bot dehn geh beks, ahn staat taak monks dehnself bowt weh dehn wahn du tu Jeezas.
12 Rong da saym taim deh, ih gaan op pahn wahn mongtin fi pray an ih mi spen di hoal nait di pray tu Gaad.
13 Wen day kom, ih kaal ih disaipl dehn ahn chooz 12 fahn monks dehn an ih kaal dehn apaslz.
14 Dehn naym da-mi: Saiman, weh Jeezas mi aalso kaal Peeta ahn fi hihn breda weh mi naym Anjru. Den yu mi ga Jaymz, Jan, Filip, Bartalamyoo,
15 Machyu, Tamas, Jaymz hoo da-mi Alfyos son, Saiman weh dehn mi kaal “di eega wan,”
16 Joodas hoo da-mi Jaymz son, ahn Joodas Iskariyat hoo mi bichray Jeezas laytaraan.
17 An ih kohn dong fahn di mongtin ahn fain wahn levl plays, ahn wahn big krowd a peepl mi dehdeh fahn aal rong; dehn mi kohn fahn Judeeya ahn Jeroosalem ahn di ayrya a Taiya ahn Saidan weh deh lang di koas. Aala dehn kohn fi hyaa weh hihn mi ga fi seh ahn fi mek hihn heel dehn siknis.
18 Eevn peepl weh di deemon dehn mi-di taament mi geh heel.
19 Ahn wen di peepl toch ahn, powa lef ahn, an aala dehn geh heel fahn dehn siknis. Bikaaz a dis, evribadi mi waahn toch ahn.
20 An ih luk pan ih disaipl dehn ahn seh:
“If unu poa now unu wahn stil bee hapi, kaaz di Kingdom a Gaad wahn bee fi unu.
21 “If unu hongri now, unu wahn stil bee hapi, kaaz unu wahn geh satisfai.
“If unu di krai now, unu wahn stil bee hapi, kaaz unu wahn laaf laytaraan.
22 “If peepl hayt unu, lef unu owt, insolt unu, rijek unu, ahn kaal unu wikid bikaaz unu di fala di Son a man, unu wahn stil bee hapi.
23 Wen dat hapm, unu wahn rijais ahn jomp fi jai kaaz unu wahn geh wahn big riwaad da hevn. Memba dat fi dehn ansestaz yoostu du dehndeh saym tingz tu di prafit dehn.
24 “Bot chrobl wahn kohn pahn unu weh rich, kaaz weh unu gat now da aal weh unu wahn get.
25 “Chrobl wahn kohn pahn unu weh satisfai now, kaaz unu gwehn hongri.
“Chrobl wahn kohn pahn unu weh di laaf now, kaaz unu wahn moan ahn krai laytaraan.
26 “Chrobl wahn kohn pahn unu weh peepl prayz op, kaaz dat da weh fi dehn ansestaz yoostu du tu di faals prafit dehn.
27 “Bot Ah di tel unu weh di lisn tu mi: Kantinyu fi lov unu enimi dehn, fi du gud tingz tu peepl weh hayt unu,
28 fi bles peepl weh kaal dong eevl pahn unu, ahn fi pray fi peepl weh di insolt unu.
29 If enibadi slap yu pahn wan said a yu fays, mek ih slap di ada said tu; if enibadi tek weh yu jakit, giv ahn yu shert tu.
30 Enibadi weh aks yu fi sohnting, giv ahn it; enibadi weh tek weh sohnting fahn yu, noh aks ahn bak far it.
31 “Aalso, chreet adaz di saym way how unu waahn dehn chreet unu.
32 “If unu lov peepl weh lov unu, weh kaina tanks unu dizerv? Kaaz eevn sinaz lov peepl weh lov dehn.
33 An if unu du gud tingz tu peepl weh du gud tingz fi unu, weh kaina tanks unu dizerv? Eevn di sinaz du di saym ting.
34 Aalso, if unu len* sohnting tu peepl weh ku giv unu bak sohnting, weh kaina tanks unu dizerv? Eevn di sina dehn len tu ada sinaz soh dat dehn ku pay dehn bak di ful amonk.
35 Bot unu fi kantinyu lov unu enimi dehn ahn fi du gud ahn len tu adaz ahn noh di hoap fi get bak eniting; an unu riwaad wahn bee grayt, an unu wahn bee chiljren a di Moas Hai, kaaz hihn kain eevn tuwaadz di wan dehn weh angraytful ahn wikid.
36 Kantinyu fi shoa mersi, jos laik how fi unu Faada shoa mersi.
37 “Moroava, stap joj adaz, ahn Gaad noh wahn joj unu; stap kandem ada peepl, ahn Gaad noh wahn kandem unu. Kantinyu fi fergiv adaz, ahn Gaad wahn fergiv unu tu.
38 Kantinyu giv tu adaz, ahn peepl wahn giv bak tu unu. Dehn wahn poar wahn big amonk eena unu pakit.* Dehn wahn shayk it tugeda ahn pres it dong gud, an ih wahn stil oavafloa. Kaaz di saym way unu deel wid adaz, da di saym way dehn wahn deel wid unu tu.”
39 Den ih tel dehn sohn iloschrayshan. Ih seh: “Unu tink wahn blain man ku gaid wahn nada blain man? No way, kaaz di too a dehn wahn jrap eena wahn hoal, noh chroo?
40 Wahn styoodent* noh haiya dan ih teecha, bot eech styoodent weh get aal di chraynin ih need wahn bee jos laik ih teecha.
41 Soh den, wai yu wahn luk pahn di splinta weh deh eena yu brada aiy bot noh noatis di big pees a stik weh deh eena fi yoo oan aiy?
42 How yu ku tel yu brada, ‘Mi brada, mek Ah tek owt di splinta weh deh eena yu aiy,’ ahn yoo ga wahn big pees a stik eena fi yoo wan? Yoo da wahn hipokrit man! Yu mos tek owt di big pees a stik fahn yu oan aiy fers, den yu wahn ku si gud how fi tek owt di splinta weh deh eena yu brada aiy.
43 “Kaaz wahn gud chree noh bayr bad froot, ahn wahn ratn chree noh bayr gud froot.
44 Unu ku noa eech chree fahn di froot weh ih bayr. Fi egzampl, peepl noh reep fig ner grayps fahn prikl bush.
45 Wahn gud man gat gud tingz stoar op eena ih haat an ih bring owt gud tingz fahn deh, bot wahn wikid man ga wikid tingz eena ih haat ahn bring owt wikid tingz; kaaz weh wahn man haat ful op wid, da dat ih wahn taak bowt.
46 “Soh den, da wai unu kaal mi ‘Laad! Laad!’ bot noh du weh Ah seh?
47 Ah wahn tel unu weh wahn persn weh kohn tu mee ahn weh hyaa mai werdz an obay dehn stan laik:
48 Da persn da laik wahn man weh mi waahn bil wahn hows; ih dig wahn deep hoal way dong tu di rak bed ahn lay di fongdayshan deh. Soh wen wahn flod kom, di riva beet gens di hows bot ih neva shayk di hows kaaz ih mi bil gud.
49 Pahn di ada han, di persn hoo hyaa mai werdz ahn noh obay dehn da laik wahn man weh mi bil wahn hows pahn di grong wid no fongdayshan. Wen di riva beet gens di hows, ih jrap dong rait away, ahn di hoal hows kompleetli dischrai.”
Futnoat
^ Er “shoabred.” Si di Glasari, “Hoali bred.”
^ Er “paralaiz.”
^ Er “paralaiz.”
^ Er “soal.”
^ Dis di taak bowt len widowt inchres.
^ Bak den, peepl kloaz neva ga pakit laik tudeh, bot dehn wuda foal di front pees a dehn kloaz fi mek wahn pakit. Dehn wuda put tingz een deh soh dat dehn ku kehr it.
^ Er “disaipl.”
