Look 7:1-50
7 Wen Jeezas mi finish tel di peepl weh ih mi ga fi tel dehn, ih gaan da Kapernyam.
2 Now, wahn aami aafisa mi ga wahn slayv weh mi sik bad; ih mi deh pahn daiyin. Di aami aafisa mi onli lov di slayv.
3 Wen di aami aafisa mi geh fi hyaa bowt Jeezas, ih sen som a di Jooish leedaz fi aks ahn fi pleez kom ahn heel ih slayv.
4 Dehn gaan op tu Jeezas ahn bayg ahn fi kom; dehn seh: “Dis man dizerv fi mek yu du dis far ahn,
5 kaaz hihn lov wi nayshan ahn hihn mi bil wi sinagag.”
6 Soh Jeezas gaahn lang wid dehn. Bot az ih mi-di geh kloas tu di hows, di aami aafisa sen som a ih frenz fi tel Jeezas: “Ser, noh bada yuself, kaaz Ai noh gud inof fi mek yu kohn da mai hows.
7 Dat da wai Ah mi tink dat Ai noh gud inof fi eevn meet yu. Bot jos seh di werd, ahn mi servant wahn geh heel.
8 Bikaaz Ai da wahn man weh ga atariti tu; Ai ga soaljaz weh deh anda mai koman; Ah jos tel dis wan, ‘Goh!’ an ih goh. Ah tel wahn nada wan, ‘Kom!’ an ih kom. An Ah tel mi slayv, ‘Du dis!’ an ih du it.”
9 Wen Jeezas hyaa weh di man seh, ih mi sopraiz, an ih ton rong ahn fays di krowd weh mi-di fala ahn, an tel dehn: “Ah di tel unu, nat eevn eena Izrel Ai fain enibadi wid soh moch fayt.”
10 Wen di man dehn weh di aami aafisa mi sen gaahn bak da di hows, dehn si dat di slayv mi don geh beta.
11 Lee wail afta dat, hihn chravl tu wahn siti weh dehn kaal Nayn, an ih disaipl dehn ahn wahn big krowd a peepl mi-di chravl wid ahn.
12 Az ih reech di siti gayt, ih si sohn peepl di kehr owt wahn ded man; hihn da-mi ih ma onli* son. Pahn tap a dat, shee da-mi wahn wido. Ahn wahn big krowd a peepl fahn di siti mi deh wid di laydi.
13 Wen di Laad si ahn, ih mi feel sari far ahn, an ih tel ahn: “Noh krai.”
14 Wid dat ih gaan op tu di schrecha weh di badi mi deh pan, an ih toch it; ahn di peepl weh mi-di bak it stay wan spat. Den ih seh: “Yong man, Ah koman yu fi get op!”
15 Ahn di ded man get op ahn staat taak, ahn Jeezas giv ahn bak tu ih ma.
16 Now, di peepl mi shak ahn dehn staat tu prayz Gaad; dehn mi-di seh: “Gaad rayz op wahn grayt prafit fahn monks aala wi,” ahn, “Gaad noh ferget bowt fi hihn peepl.”
17 Ahn di nyooz bowt weh Jeezas mi du spred aal chroo di tong dehn eena da ayrya an aala di tong dehn eena Judeeya.
18 Now Jan disaipl dehn kohn ripoat tu ahn bowt aala di tingz weh Jeezas mi du.
19 Soh Jan sen too a ih disaipl tu di Laad fi aks ahn: “Yoo da di wan weh wi di wayt fa, er wee fi ekspek wahn difrent persn?”
20 Wen dehn reech Jeezas, di man dehn seh: “Jan di Baptis sen wi fi aks yu, ‘Yoo da di wan weh wi di wayt fa, er wee fi ekspek wahn difrent persn?’”
21 Da saym taim deh, ih kyoar wahn lata peepl weh mi gat aal kaina siknis, ahn som weh mi gat sohn seeryos dizeez. Ih jraiv owt di deemon dehn fahn peepl, an ih heel wahn lata blain peepl soh dat dehn kuda mi si.
22 Den ih tel Jan disaipl dehn: “Unu goh ahn tel Jan bowt aal weh unu si ahn hyaa: Peepl weh mi blain ku si now ahn peepl weh mi kripl ku waak now. Peepl weh mi ga leprosi geh heel ahn peepl weh mi def ku hyaa now. Di ded kohn bak tu laif ahn di poa peepl di hyaa di gud nyooz.
23 Di persn weh noh fain no reezn fi dowt da hoo mee* wahn bee hapi.”
24 Afta Jan disaipl dehn lef fahn deh, Jeezas staat tu taak tu di krowd bowt Jan; ih seh: “Da hoo unu mi gaahn fi si eena di wildanes? Wahn persn weh da laik wahn plaant* weh di sway bowt eena di breez?
25 Da hoo unu mi gaahn fi si? Wahn man weh jres op eena ekspensiv kloaz? No. Kaaz peepl weh jres op eena ekspensiv kloaz liv eena palis.
26 Wel da hoo unu mi gaahn fi si den? Wahn prafit? Yes, Ai di tel unu, hihn da wahn prafit, ahn faar moa impoatant dan di ada prafit dehn.
27 Hihn da di wan weh di Skripchaz mi taak bowt weh seh: ‘Ah di sen mi mesinja heda yu,* ahn hihn wahn pripyaa di way fi yu.’
28 Ah di tel unu, op tu now, nobadi pahn ert grayta dan Jan, bot eevn wahn persn weh noh ga wahn hai pozishan eena di Kingdom a Gaad grayta dan hihn.”
29 Wen aala di peepl ahn taks kalekta dehn hyaa dis, dehn aksep dat Gaad raichos, kaaz da Jan mi baptaiz dehn.
30 Bot bikaaz Jan neva baptaiz di Farisee ahn di teecha dehn a di Laa, dehn neva waahn du weh Gaad mi seh fi du.
31 Den Jeezas seh: “Da hoo Ah kuda kompyaa dis jenarayshan tu? Ahn da hoo dehn stan laik?
32 Dehn da laik yong chiljren weh di sidong eena di maakit plays dehn ahn di hala owt tu wan anada ahn seh: ‘Wee mi play di floot fi unu, bot unu neva daans; wee mi sing sohn sad sang fi unu, bot unu neva krai.’
33 Saym way, Jan di Baptis neva kohn di eet ahn jrink laik sohn ada man, bot unu seh: ‘Hihn ga wahn deemon eena ahn.’
34 Now di Son a man kom, ahn hihn di eet ahn jrink, bot unu seh: ‘Hihn da wahn greedi man an ih jrink tu moch; hihn da fren wid di taks kalekta dehn ahn di sinaz!’
35 Bot eniwayz, di raichos tingz weh wahn persn du wahn proov dat ih waiz.”
36 Now wan a di Farisee dehn mi stay di invait Jeezas fi kohn eet da ih hows. Soh Jeezas gaan da ih hows.
37 Wen wahn laydi weh da-mi wahn sina mi geh fi hyaa dat Jeezas mi-di eet da di Farisee hows, shee bring wahn alabasta jaar wid perfyoom ail.
38 Den shee neel dong bai Jeezas fut ahn staat tu krai, ahn Jeezas fut dehn geh wet op wid fi shee tyaaz, soh shee staat tu jrai dehn aaf wid fi shee oan hyaa. Den shee kis ih fut dehn ahn poar perfyoom ail pahn dehn.
39 Wel, wen di Farisee weh mi invait ahn si dis, ih seh tu ihself: “If dis man da wahn prafit fi chroo, hihn wuda noa weh kaina uman dis weh di toch ahn; hihn wuda noa dat shee da wahn sina.”
40 Bot Jeezas mi noa weh ih mi-di tink, soh ih tel ahn: “Saiman, Ah ga sohnting fi tel yu.” Saiman tel ahn: “Da wat Teecha? Tel mi!”
41 Jeezas tel ahn: “Too man mi oa wahn nada man sohn moni; wan a dehn mi oa ahn 500 denayriyai,* ahn di ada man mi oa ahn 50.
42 Wel, dehn kudn pay ahn bak, soh ih kyansl* weh dehn mi oa ahn. Soh weh yoo tink, wich wan a dehn wahn lov ahn moa?”
43 Saiman tel ahn: “Ah wuda seh di wan weh mi oa ahn di moas.”* Jeezas tel ahn: “Yu rait wen yu seh dat.”
44 Wid dat, ih ton tu di laydi ahn tel Saiman: “Yu si dis laydi ya? Ai kom eena yu hows, bot yoo neva giv mi no waata fi wash mi fut dehn. Bot dis laydi wash mi fut dehn wid fi shee tyaaz ahn shee jrai dehn aaf wid ih hyaa.
45 Yoo neva welkom mi wid wahn kis, bot fahn di taim Ai kom eena yu hows, dis laydi noh stap kis mi fut dehn.
46 Yoo neva poar ail pahn mi hed, bot dis laydi poar perfyoom ail pahn mi fut dehn.
47 Bikaaz a dis, Ah di tel unu, eevn doa shee sin wahn lat, Ai fergiv ahn. Ahn sayka dis, shee shoa mi wahn lata lov. Bot di persn weh geh lee bit a fergivnis, shoa lee bit a lov tu adaz.”
48 Den ih tel di laydi: “Ah fergiv yu sin dehn.”
49 Dehn wan weh mi deh da di taybl wid ahn staat tu seh monks dehnself: “Da hoo dis man? How hihn ku fergiv sinz?”
50 Bot Jeezas tel di laydi: “Goh eena pees, kaaz yu fayt sayv yu.”
Futnoat
^ Lit., “onli-bigatn.”
^ Er “fain no reezn fi stombl bikaaz a mee.”
^ Lit., “reed.” Wahn kaina taal graas weh groa eena swampi ayrya.
^ Lit., “fronta yu fays.”
^ Si di Glasari, “Denayriyos.”
^ Er “mi wilin fi fergiv.”
^ Er “weh ih mi fergiv di moas.”
