Maak 1:1-45
-
Jan di Baptis staat tu preech (1-8)
-
Jeezas geh baptaiz (9-11)
-
Saytan temp Jeezas (12, 13)
-
Jeezas staat tu preech da Gyalilee (14, 15)
-
Jeezas kaal ih fers disaipl dehn (16-20)
-
Jeezas jraiv owt di deemon (21-28)
-
Jeezas heel lata sik peepl da Kapernyam (29-34)
-
Jeezas gaahn pray bai ihself (35-39)
-
Jeezas heel wahn man wid leprosi (40-45)
1 Dis da how di gud nyooz bowt Jeezas Krais bigin:
2 Jos laik weh di prafit Aizaiya mi rait: “(Ah di sen mi mesinja heda yu.* Hihn wahn pripyaa yu way.)
3 Wahn lowd vais di kaal owt eena di wildanes: ‘Pripyaa di way a Jehoava! Schraytn owt di road weh deh fronta ahn.’”
4 Jan di Baptis mi-di preech eena di wildanes di tel peepl fi geh baptaiz fi shoa dat dehn ripent ahn fi mek Gaad fergiv dehn sinz.
5 Peepl fahn aala Judeeya ahn fahn Jeroosalem mi-di kohn tu hihn fi mek hihn baptaiz* dehn eena di Jaadn Riva, ahn fronta evribadi dehn kanfes dat dehn da-mi sinaz.
6 Now, Jan kloaz mi mek owta kyamil hyaa. Ih mi yooz wahn leda belt rong ih ways, an ih yoostu eet loakos ahn wail honi.
7 An ih mi-di preech seh: “Sombadi els wahn soon kohn weh way moa powaful dan mee. Az a mata a fak, Ai noh eevn fit fi stup dong ahn loos di laysn fan ih sandalz.
8 Ai baptaiz unu wid waata, bot hihn wahn baptaiz unu wid hoali spirit.”
9 Rong da saym taim deh, Jeezas kohn fahn Nazaret weh mi deh eena Gyalilee fi mek Jan baptaiz ahn eena di Jaadn Riva.
10 Az soon az ih kom op owta di waata, ih mi si hevn oapm op, ahn di hoali spirit, laik wahn dov, kohn dong pan ahn.
11 Ahn dehn hyaa Gaad seh fahn hevn: “Yoo da mai Son, di wan weh Ah onli lov; yoo da di wan weh Ah pleez wid.”
12 Ahn rait afta dat, Gaad spirit gaid Jeezas fi goh eena di wildanes.
13 Soh Jeezas stay eena di wildanes fi 40 dayz, ahn da rait dehsoh Saytan mi temp ahn. Hihn mi-di liv monks di wail animal dehn, bot di aynjel dehn mi-di help ahn.
14 Afta dehn ares Jan, Jeezas gaan da Gyalilee fi preech di gud nyooz fahn Gaad.
15 Hihn mi-di preech seh: “Now da di taim, ahn di Kingdom a Gaad deh ya. Soh ton fahn unu sin dehn ahn ga fayt eena di gud nyooz.”
16 Wail Jeezas mi-di waak langsaid di See a Gyalilee, ih si Saiman ahn Saiman breda weh mi naym Anjru; di too a dehn mi-di chroa dehn net eena di see, kaaz dehn da-mi fishaman.
17 Soh Jeezas tel dehn: “Fala mi, an Ai wahn shoa unu how fi saach fi peepl jos laik how unu goh kech fish.”
18 Ahn rait away dehn lef dehn net ahn fala hihn.
19 Afta ih gaahn wahn lee wayz fahn deh, ih si Zebidee too son dehn, Jaymz ahn Jan; dehn mi deh eena dehn boat di fiks dehn net,
20 ahn saym way ih kaal dehn. Soh dehn get op ahn lef dehn pa Zebidee rait deh eena di boat wid di res a werkaz ahn fala Jeezas.
21 Ahn dehn gaan da Kapernyam.
Az soon az di Sabat bigin, Jeezas gaan eena di sinagag* ahn staat tu teech.
22 Ahn di peepl kudn bileev di way how ih mi-di teech dehn, kaaz weh hihn mi-di teech mi kohn fahn Gaad; ih neva mi-di teech dehn laik di skraib dehn.
23 Saym taim, wahn man weh mi ga wahn deemon mi deh eena di sinagag, an ih hala owt seh:
24 “Jeezas di Nazareen, wai yu di mek chrobl fi wi? Yoo kohn fi dischrai wi? Ai noa egzakli da hoo yoo. Yoo da di wan weh hoali ahn weh Gaad sen!”
25 Bot Jeezas skoal op di deemon; ih tel ahn: “Kip kwaiyet, ahn kom owta ahn!”
26 Afta di deemon kaaz di man hoal badi fi shayk op, ih skreem pahn di tap a ih vais ahn kom owta di man.
27 Wel, di peepl mi sopraiz, ahn dehn staat taak monks dehnself ahn seh: “Da weh dis? Dis da wahn nyoo way fi teech! Hihn ga di powa fi jraiv owt di deemon dehn, ahn dehn obay ahn.”
28 Soh nyooz bowt Jeezas staat spred faas eena aal dairekshan eena di hoal ayrya a Gyalilee.
29 Afta Jeezas, Jaymz, ahn Jan lef fahn di sinagag, dehn gaan da Saiman an Anjru hows.
30 Now Saiman mada-in-laa mi-di lidong kaaz shee mi sik wid wahn feeva, ahn rait away dehn tel Jeezas bowt ahn.
31 Soh ih gaahn tu di laydi ahn hoal ih han ahn help ahn get op. Di feeva lef ahn, an shee staat mek food fi dehn.
32 Wen nait mi-di set een, afta di son mi don gaahn dong, di peepl staat tu bring aala dehn wan weh mi sik ahn ga deemon eena dehn;
33 an aala di peepl fahn di siti mi gyada tugeda rait deh da di doa.
34 Soh ih kyoar di wan dehn weh mi sik, ahn jraiv owt di deemon dehn, bot ih neva gi di deemon dehn wahn chaans fi seh eniting bowt hihn, kaaz dehn mi noa dat hihn da Krais.*
35 Erli di maanin, wail ih mi stil daak, Jeezas get op ahn gaan owtsaid. Ih fain wahn plays weh ih kuda mi deh bai ihself, an ih staat tu pray.
36 Bot Saiman ahn di ada disaipl dehn saach aal oava far ahn,
37 an wen dehn fain ahn, dehn seh: “Evribadi di luk fi yu.”
38 Bot ih tel dehn: “Mek wi goh sohnweh els; mek wi goh da di ada tong dehn weh deh kloas bai, soh dat Ai ku preech deh tu, bikaaz dis da wai Ai deh ya.”
39 An ih gaahn chroo di hoal a Gyalilee di preech eena di sinagag dehn ahn di jraiv owt deemonz.
40 Den wahn man weh mi ga leprosi kom op tu ahn, an get dong pan ih nee dehn ahn bayg ahn seh: “Laad, Ai noa dat if yoo waahnt, yu ku heel mi.”
41 Wel, Jeezas tek piti pahn di man, an ih schrech owt ih han ahn toch ahn, an ih tel di man: “Yes, Ah waahn heel yu! Yu heel.”
42 Ahn rait away, di man leprosi gaan, an ih geh heel.
43 Bot bifoa di man lef, Jeezas giv ahn schrik aadaz;
44 ih tel ahn: “Si dat yu noh seh notn tu nobadi, bot goh tu di prees mek ih si dat yu geh heel an aafa di gif weh di Laa a Moaziz seh fi giv az proof tu di prees dehn dat yu mi geh heel.”
45 Bot az soon az di man lef fahn deh, ih kudn stap taak bowt it; ih braadkyaas it tu evribadi soh dat ih mi haad fi mek Jeezas goh da wahn siti ahn nobadi noatis ahn. Soh ih fain difrent ayryaz weh nobadi mi liv. Ahn yet, peepl stil mi-di kohn tu ahn fahn aal oava di plays.
Futnoat
^ Lit., “fronta yu fays.”
^ Er “dip.”
^ Dis da weh di Jooz meet fi pray ahn reed di Skripchaz.
^ Dis ku aalso bee “dehn mi noa da hoo hihn.”
